“Qamqa alli precursorchi kankiman”

1. ¿Ima nirqantaq huk Testigo precursora këpaq?

¹ “Manachi ni ima trabäjopis rasumpa kushishqa këta tarinäpaq y Diospa kaqchö alli kanäpaq yanapamanmantsu karqan” nirqanmi Kathe B. Palm. Pëqa mëtsika watana hinantin Chile nacionpa yachatsikur purishqa precursöram. Tsënö llapan tiemponwan yachatsikoqkuna alläpa yanapakuyanqanman pensar, itsa pipis “qamqa alli precursorchi kankiman” nishqa kashunki.

2. Diosta servinqantsik imanir alläpa kushikïpaq kanqanta willakaramï.

² Kushishqam kawakuntsik. Jesuspaqqa, Teytampa munëninta rurë imëka kallpata qokoq mikï cuentam karqan (Juan 4:34). Tsëmi Jehoväta servirninqa rasumpa kushishqa këta tariyänampaq kaqta qateqninkunata yachatsirqan. Tsëqa rasunmi, Dios munanqankunata rurarqa kushishqam kantsik. Y tiempontsikta, kallpantsikta y ima kapamanqantsiktapis nuna mayintsikrëkur qorqa, más kushishqam kashun (Hech. 20:31, 35).

3. ¿Imapitataq kushikushun más yachatsikoq yarqurqa?

³ Hina yachatsikoq más yarqurqa, masmi tarintsik Bibliapita yachakï munaqkunata y tsëmi más kushishqa kantsik. Precursornö yachatsikoq yarqur qallaptikiqa, itsa mana wiyakïta munaqnö nunakuna kayanqa, pero más yarqurqa, yachakïta munaqkuna atskaraq kayanqantam cuentata qokurinki. Huk watanö precursor këkarnam, precursorkunapaq escuëlachö imëkata yachakunki y tsëmi yanapashunki alli yachatsikoq kanëkipaq (2 Tim. 2:15). Imëpis yachatsikïkarqa murunqëki wayoqta rikaq cuentam, rikärinki yachatsikunqëki nunakunata yanapanqanta (Ecl. 11:6).

4. ¿Imamanraq pensayanman colegiota ushëkaq jövenkuna?

⁴ Joven, ¿precursor kankimanku? Colegiota ushanëkipaq ichikllana pishiptin, ¿pensëkankinaku shamoq tiempochö imata ruranëkipaq kaqta? Kananyaqqa estudiaptikim alläpaqa tiempïki kashqatsu. Pero colegiota usharirqa, ¿imataraq ruranki? Llapan tiempïkiwan trabajanëkipa rantin, ¿imanirtaq Diosman mañakunkitsu precursor regular kanëkipaq? Precursor karqa, tukïläya nunakunatam Bibliapita parlapanki, imëkata pasarpis allim tsarakunki, ordenädom kanki y shumaq yachatsikïtam yachakunki, y tsëqa llapan kawënikichömi yanapashunki.

5. ¿Imanöraq teytakuna y congregacionchö kaqkuna jövenkunata yanapayanman precursor kayänampaq?

⁵ Teytakuna, ¿wambrëkikunata yanapëkäyankiku llapan tiemponkunawan Jehoväta serviyänampaq? Parlayanqëki y rurayanqëkim pëkunata yanapanqa Diospa Gobiernompita yachatsikïta puntaman churayänampaq (Mat. 6:33). Colegionta usharir precursor tikrashqa Ray shutiyoq jövenmi kënö nin: “Precursor karqa alläpa kushishqam kawakunki neqmi imëpis mamänï”. Hina congregacionchö kaqkunapis parlakïninkunawan y yanapakïninkunawanmi precursor kë alläpa alli kanqanta rikätsikuyanman. Espäñapita Josëmi kënö nin: “Imëka rurëpitapis precursor kë jövenkunapaq más alli kanqantam congregacionnïchö niyaq. Precursor këta kuyayaptin, tsëpaq allita parlayaptin y rurëninkunawan yanapayämaptinmi alläpa sasatsu [ajatsu] karqan precursor tikrarinäpaq”.

6. ¿Imataraq rurashwan precursor kë noqantsikpaqnö mana kanqanta pensarqa?

⁶ ¿Imataq tsapämashwantsu? Itsa pipis “precursor këta munëqa manam shoqüchö yurintsu” ninman. Tsënö pensarqa, imanö sientekunqëkita Jehoväta kënö willë: “Precursor kë mana noqapaqnö kanqanta pensarpis, qam munanqëkitam rurëta munä” (Sal. 62:8; Pro. 23:26). Nïkur Palabranchö y markanchö yanapakïkunata ashi. Mëtsikaq precursor regularkunam puntataqa precursor auxiliar kayarqan, y tsë rurayanqampita alläpa kushikurmi, precursor regular këta imëkanöpapis tïrayarqan (Sal. 34:8).

7. Killachö 70 hörasta mana cumplinëkipaq kaqta pensarqa, ¿imakunatataq rurankiman?

⁷ Itsa 70 horas rurëta mana puëdenëkipaq kaqta pensar mantsapakunki. Tsënö karqa, ¿imanirtaq wakin precursorkunata tapurinkitsu hörankunawan imanö cumpliyanqanta? (Pro. 15:22.) Nïkurna atska horariokunata rurë yanapashunëkipaq kaqta akranëkipaq. Itsa cuentata qokurinki mana precisaq kaq rurëkunata haqirirqa, horëkiwan cumplinëki mana alläpa sasa kanqanta (Efe. 5:15, 16).

8. ¿Imanirtaq alli kanman tiempontsikwan imata rurëkanqantsikta rikänantsik?

⁸ ¿Imëka rurëyoqllaraqku këkanki? Kawënintsikchöqa imëkapis cambiarëkanmi, tsëmi imëpis pensanantsik tiempontsikwan imata ruranantsikpaqpis. Këman pensari, ¿ichikllanaku pishin jubilakunëkipaq? Randym jubilakunampaq pishikaptinraq trabäjonta haqirirqan, y kënömi nin: “Tsë ruranqämi yanapamarqan warmïwan ishkä precursor kayanapaq y Diospita yachatsikoqkunata wanayanqan markaman ëwayänäpaq. Mëtsika bendicionkunatam tarirqö... pero llapampitapis más hatun kaq bendicionqa kashqa alli concienciayoq kanqämi”.

9. ¿Imatataq casädokuna alli pensayänan?

⁹ Wakin casädokunaqa alli pensarirmi cuentata qokuyashqa ishkankuna llapan hunaq trabajayänan mana alläpa precisanqanta. Tsëpaqqa gastonkunatam mermätsiyashqa y wallka cosasllawannam kawayan, pero tsë rurayanqanqa alläpa allipaqmi. Tutëllaraqmi Johnpa warmin, precursora kananrëkur llapan hunaq trabajëta haqirishqa. Tsëmi John kënö nin: “Warmï llapan hunaq Jehoväpa kaqta ruranqampita más alliqa, manam imapis noqapaq kantsu”.

10. ¿Imataq cristiänokunata yanapan precursor këman pensayänampaq?

¹⁰ Kuyakoq y markäkoq kanqantsiktam rikätsikun. Yachatsikunapaq Jehová nishqa kaptinmi, tsë rurë precisanqannöqa ni imapis noqantsikpaq kantsu. Ichik tiempollachönam kë llapan mana alli rurëkuna ushakärinqa y Jehoväpa shutinta parlaqkunallam salvashqa kayanqa (Rom. 10:13). Llapan shonquntsikwan Jehoväta kuyar y noqantsikrëkur ruramunqankunapita agradecido karqa, yachatsikunapaq Tsurin nimanqantsikta paqwëmi rurëta munashun (Mat. 28:19, 20; 1 Juan 5:3). Hinamampis, ushakë tiempokunachöna kawëkanqantsikta musyanqantsikmi yanapamäshun kë mundopa imëkankunata provechanapa rantin, imëkanöpapis alli yachatsikunapaq (1 Cor. 7:29-31).

11. ¿Imanöraq chaskikushwan pipis “qamqa alli precursorchi kankiman” nimashqa?

¹¹ Precursor regular këqa manam atska hörata rurananllatsu; Diosta adorëkanqantsiktam rikätsikuntsik. Tsëmi, pipis “qamqa alli precursorchi kankiman” nishuptikiqa kushishqa chaskikunëki. Diosman mañakï y qampis wakinkunanö precursor kanëkipaq kallpachakï.

[4 kaq päginachö ninqan]

Teytakuna, ¿wambrëkikunata yanapëkäyankiku llapan tiemponkunawan Jehoväta serviyänampaq?

[5 kaq päginachö ninqan]

Yachatsikunapaq Jehová nishqa kaptinmi, tsë rurë precisanqannöqa ni imapis noqantsikpaq kantsu.