¿Yarpankiku precursor regular kanqëkita?
1. ¿Imata rurartaq wakinkunaqa kushishqa këta tariyashqa? Y, ¿wakinkunaqa imanirtaq precursor këninkunata haqiriyarqan?
1 Atska watakunapam, waranqëpayan precursorkuna llapan tiemponkunawan kushishqa ‘yachatsicuyashqa alli willaquita’ (Hech.5:42). Tsënö kaptimpis, wakinkunaqa kawëninkunachö imapis pasashqa kaptinmi precursor këninkunata haqiriyarqan. Qamtapis tsënö pasashushqa kashuptikiqa, ¿yapë precursor kanëkipaq pensashqankiku?
2. ¿Imanirtaq unë precursor kashqa kaqkuna kutiyänampaq kaqman yarpäyanman?
2 Imapis cambiarëkanmi. Itsa precursor kakunëkita tsapäshoqniki kananqa kannatsu. Këman yarpärishun, itsachi punta watakunachöqa 90 horas kaptin cumplïta puëderqëkitsu, pero kananqa 70 hörasllanam. Itsachi kananqa más wallka tiempollana trabajëkanki, o familiëkita rikänëkipaq kaqchöpis tiempïki sobrëkanna, tsëqa, ¿manatsuraq yapë precursor kankiman? Huk panim, qeshyapäkonqampita alliyärirnin precursora këman kutirqan 89 watayoq këkar. ¿Imanirtaq kutirirqan? Alliyärir huk watapana hospitalman manana ëwashqa karmi, ¡yapë precursora këman kutirqan!
3. ¿Imanötaq familiëkichö pillatapis yanapayankiman precursor kanampaq?
3 Qam mana precursor kashqa kaptikipis, itsa huk kastëki precursor këninta haqirirqan edäyashqa teytanta o mamanta cuidanampaq o hukkunarëkurpis (1 Tim. 5:4, 8). Tsënö kaptinqa, ¿manatsuraq qam o pillapis familiëkipita yanapariyankiman yapë precursor kanampaq? ¿Imanirtaq tsëpaq llapëki parlariyankitsu? (Pro. 15:22). Familiachö pillapis precursor kanampaq yanapakoqkunaqa, alläpam kushikuyanqa Jehoväta servichö tsënö yanapakuyanqampita.
4. ¿Imataraq rurankiman precursor këman manaraq kutita puëderninqa?
4 Ama llakikïtsu imapis precursor kanëkipaq kaqta tsapäshuptikïqa. Precursor këta munanqëkiqa alläpam Jehová Diosta kushitsin (2 Cor. 8:12). Antis precursor kanqëkichö yachakunqëkikunata kanampis rurëkë. Y Jehoväta willë precursor këta munanqëkita y mäkoq mäkoqlla këkë precursor kanëkipaq tiempïkita rikar (1 Juan 5:14). Itsachi tiempo pasariptin Jehová Dios ‘puncuta quichaq cuenta yanapecushunqui mecho tsechopis nunacunata willaparinëkipaq’, tsënöpa yapë precursor regular karnin kushikurinëkipaq (1 Cor. 16:9).