Yachatsikunqantsikchö pacienciayoq kanqantsikta rikätsikushun
1. ¿Imanötaq Jehová rikätsikushqa nunakunawan alläpa pacienciayoq kanqanta?
1 Jehoväqa alläpa pacienciawanmi nunakunata imëpis tratan (Éxo. 34:6; Sal. 106:41-45; 2 Ped. 3:9). Y alläpa pacienciayoq kanqantaqa más rikätsikushqa, hinantin Patsachö alli willakïninkunata musyatsikurmi. Jehoväqa casi 2.000 watakunanam alli shonquyoq nunakuna pëta reqiyänampaq tukïta rurashqa, y kanan witsampis tsënöllam rurëkan (Juan 6:44). Y noqantsikqa, ¿imanöraq Jehovänö alläpa pacienciayoq kanqantsikta rikätsikushwan yachatsikunqantsikchö?
2. Territoriontsikchö yachatsikurnin, ¿imanötaq pacienciayoq kanqantsikta rikätsikuntsik?
2 Wayin wayin yachatsikïchö. Jehová Diosnö alläpa pacienciayoq kanqantsiktaqa rikätsikuntsik, nunakuna wiyakïta mana munayaptimpis ‘mana jamaypa’ yachatsikurninmi (Hechos 5:42, QKW). Pacienciayoq karmi aguantantsik chikimashqa, mana alli parlamashqa y yachatsikunantsikta michämashqapis (Mar. 13:12, 13). Hina pacienciayoq kanqantsiktaqa rikätsikuntsik, Diospita yachakïta munaqkunata tarinan sasaraq kaptimpis, mana haqishpa më tsëchö yachatsikurninmi.
3. ¿Imanirtaq atska pacienciayoqraq kanantsik yachakïta munaqkunaman kutinapaq y estudio Biblicokunata qonapaq?
3 Bibliata estudiaqkunawan. Huk plantata mururir wayunqanyaq cuidananqa atska pacienciapaqran. Wanun hichëta y parqupëta puëderpis, winatsitaqa manam puëdentsiktsu (Sant. 5:7). Hina tsënöllam Jehoväpa kaqchöpis ichikllapayan ichikllapayan nunakuna poquyan (Mar. 4:28). Itsa wakin Biblia yachakïkaqkunapaqqa sasaraq kanqa punta religionninkunapa mana alli yachatsikïninkunata y costumbrenkunata haqiyänan. Tsëmi estudiëkaqkuna poquyänanta munarpis, obligashwantsu llapanchö ras cambiayänampaqqa, tsëpa rantinqa, Diospa santo espïritun shonqunkunata kuyutsir yanapanqanyaqmi shuyänantsik (1 Cor. 3:6, 7).
4. ¿Imanötaq pacienciayoq kanqantsik yanapamäshun Jehoväta mana sirveq kastantsikkunata yachatsinapaq?
4 Jehoväta mana sirveq kastantsikkunawan. Kastantsikkuna Jehoväta reqiyänanta munarpis, alli tiempochö pëkunawan creenciantsikkunapita parlakurinapaqqa, atska pacienciataran wanantsik, y manam huk kuti parlapanqantsikllachöqa llapan musyanqantsikpitaqa yacharatsishwantsu (Ecl. 3:1, 7). Tsëyaqqa, alli portakïnintsikwan rikätsishun rasumpa kaq Diosta servinqantsikta, y listo këkäshun shumaq y respëtowan Jehoväpita yacharatsinapaq (1 Ped. 3:1, 15). Rikanqantsiknöpis, pacienciawan yachatsikunqantsikqa alläpa allim, y ciëlochö Teytantsiktapis kushitsinqam.