Bibliapita yachakïta munaqta tarinantsikpaq pitsqa yanapakïkuna
1. ¿Imatataq ruranantsik Bibliapita yachatsinantsikpaq pitapis mana tarirqa, y imanir?
1 ¿Sasaraqku o ajaraqku Bibliapita yachakïta munaqta tarinëkipaq? Ama qelanëtsu, sïgui ashir. Jehoväqa bendecinmi munëninta rurayänampaq kallpachakoqkunata (Gal. 6:9). Qateqninchömi qampaq pitsqa yanapakïkuna kan.
2. ¿Imanötaq directo nirinqantsik yanapakun pitapis Bibliapita yachatsir qallanantsikpaq?
2 Directo niri. Pï mëmi musyayan Täpakoq revistata nunakunata dejapunqantsikta, pero manam musyayantsu munaqkunata Bibliapita yachatsinqantsiktaqa. Yapëchö wayin wayin yarqurqa, ¿imanirtaq pitapis directo ninkitsu Bibliapita yachatsinëkipaq? Watukaq kutinqëki nunakunatapis nï. Mana munayaptinqa publicacionkunata apapur sïgui yachakïta munayänampaq. Juk wawqim mëtsika watakunapana juk nunapaqwan warmimpaq revistata apapoq. Juk kutim tsëllaraq yarqamushqa revistata apapunqampita kutikunampaqna këkar, “¿munayankimantsuraq Bibliapita yachakïta?” nir tapurirqan. Tsë höram awniriyarqan, y kananqa ishkannam bautizado kayan.
3. ¿Imanirtaq pensanantsiktsu reunionkunaman shamoqkunaqa llapampis Bibliapita yachakïkäyanqantana?
3 Yachatsikuyänan Wayiman shamoqkunawan parlë. Ama pensëtsu reunionkunaman shamoqkunaqa llapampis Bibliapita yachakïkäyanqantana. Juk wawqim kënö nin: “Noqawan yachakïkaqkunataqa casi pullan kaqpita mastam reunionkunachö tarirqö”. Juk mana alläpa parlakoq warmim, bautizakushqana warmi wamrankunawan 15 watapana reunionkunaman ëwëkarqan. Reunión qallanqan höram chaq y ushariptinllam ëwakoq. Juk kutim, juk pani nirqan Bibliapita yachatsinampaq. Tsë warmiqa rasllam awnirirqan y kananqa bautizakushqanam. Yachatseq panim kënö nin: “¡Alläpam llakinä Bibliapita yachatsita munanqäta ninäpaq 15 wata pasanantaraq shuyaranqäpita!”.
4. ¿Imatataq rurashwan Bibliapita yachakïta munaqkunata tarinantsikpaq?
4 Jukkunata yanapëta procurë. Juk panim jukkunata estudionman yanaqan. Yachakur ushariyaptinmi, yanaqinta permisota mañarir yachakïkaqta tapurin pitapis yachakïta munaqta reqinqanta. Jina allim kanman watukaq kutishqa Yachatsikun librota chaskimaqnintsikta tapurishqa pillapis tsë librota munanqanta. Jinamampis, capaz wakin publicadorkuna o precursorkunaqa tiemponkuna mana tinkuptin pipis yachakïta munaqta yanapëta puëdiyantsu. ¿Imanirtaq qam yanapanëkipaq nirinkitsu?
5. ¿Imanirtaq juk wawqipa o panipa mana Testigo majanta tapurishwan Bibliapita yachakïta munanqanta?
5 Mana Testigo majanta parlapë. ¿Kanku congregacionnikichö mana Testigo majayoq wawqi o pani? Wakinkunaqa manam munayantsu majan Bibliapita yachatsinanta, pero jukwan yachakïtaqa munayanmi. Más alliqa kanqa Testigo kaqta majanwan imanö y imë parlanantsik más alli kanqanta tapurinqantsikmi.
6. ¿Imanirtaq Bibliapita yachakïta munaqta tarinantsikpaq mañakunantsik alläpa precisan?
6 Jehoväpa yanapakïninta mañakï. Ama ichikllapaq churëtsu Jehoväman mañakï yanapakunqanta (Sant. 5:16). Jehoväqa nimantsik munënimpaqnö mañakushqaqa wiyamänantsikpaq kaqtam (1 Juan 5:14). Tiempota mana tareq wawqim Bibliapita yachakïta munaqta tarinampaq Jehoväta mañakurqan. Warminnam alläpa yarpachakoq estudiota tarir atiendenampaq nunampa tiempon mana kanampaq kaqta, y masraq tukï problëmayoqta tariptinnäqa. Tsëmi pëpis Jehoväman mañakurqan. Ishkampa mañakïnintam Jehoväqa contestarqan, awmi, ishkë semana pasarinqanllachömi juk precursora Bibliapita yachakïta munaq nunata tarirqan y wawqita nirqan atiendenampaq. Warmi kaqmi kënö nin: “Ni imëpis estudiota mana tariyänampaq kaqta pensaqkunataqa, tsë asuntopaq mana dejëta mañakuyänampaqmi nï. Manam ni imëpis pensayarqätsu kë jatun kushikïta tariyänäpaq kaqtaqa”. Mana qelanarqa qampis tarinkim Bibliapita yachakïta munaqta, y kushishqam yanaparinki “llanulla nänipa” purir “wiñe cawaquita tari[nampaq]” (Mat. 7:13, 14).