Wallka tiempoyoq kaqkunapaq yanapakïkuna
1. ¿Imanirtaq wakinkunaqa estudio biblicota dirigiyänampaq awnikuyantsu?
1 Wakinkunaqa wallka tiempoyoq karninmi estudio biblicota dirigiyänampaq pitapis awnikuyantsu. Rasun kaqchöqa, juk estudianteta atiendinapaqqa tiempotaran necesitantsik; puntallapitanam preparakunantsik, estudiätsinantsikmi y tukï sasakunapa o ajakunapa pasaptimpis yanapanantsikmi. Apóstol Pablupis Tesalönicachö wawqikunata y panikunata yanapanampaq alläpa kallpachakunqantam nirqan (1 Tes. 2:7, 8). ¿Imanötaq tiempota tarishwan estudio biblicota diriginantsikpaq?
2. ¿Imanötaq Jehoväta alläpa kuyanqantsikta rikätsikuntsik?
2 Jehoväta sirwinantsikpaqqa tiempotam necesitantsik. Tukïta rurarninmi Diostaqa adorantsik. Llapan semänakunam tiempota rakintsik reunionkunaman ëwanantsikpaq, yachatsikunantsikpaq, Bibliata leinantsikpaq y mañakunantsikpaqpis. Këman pensarishun: juk casada warmiqa, alläpa ocupada këkarpis kuyashqa majampaqqa tiempota rakinmi. Tsënöllam noqantsikpis Diosta alläpa kuyarnin, pëta adoranantsikpaq tiempontsikta kushishqa rakintsik (Efes. 5:15-17; 1 Juan 5:3). Jesusqa nirqan, pëpa qateqninkuna kayänampaq nunakunata yanaparqa Diosta adoranqantsikchö alläpa precisaq rurëta cumplikanqantsiktam (Mat. 28:19, 20). Tsëta yarpanqantsikmi yanapamäshun tsë cargo chaskinqantsikta cumplinantsikpaq.
3. ¿Imataraq rurashwan tiempontsik mana tinkuptimpis estudio biblicota diriginantsikpaq?
3 Pero ¿imataraq rurashwan alläpa qeshyashqa, trabajashqa o congregacionchö cargoyoq kashqa tiempontsik mana tinkuptinqa? Wakinkunaqa, alläpa qeshyarninmi wayiman ëwayänampaq estudiantenkunata niyan. Wakin publicadorkunanam viäjepa ëwakurnin telëfonopa o Internetpa estudio biblicota dirigiyan. Wakinkunanam, mana puëdiyanqan hörakuna juk publicadorkunata encargayan estudiantenkunata watukayänampaq.
4. ¿Ima bendiciontataq tarishun estudio biblicota dirigirninqa?
4 Pabluqa alläpa kushishqam sientikurqan rasumpa kaqta yachatsikunanrëkur kallpanta y tiemponta utilizanqampita (Hech. 20:35). Tesalönicachö yanapakunqan alläpa alli yarqushqa kaptinmi Jehoväta agradecikurqan (1 Tes. 1:2). Wallka tiempoyoq këkarpis estudio biblicota dirigirqa, kushishqam sientekushun Dios nimanqantsikta rurëkanqantsikpita.