Ama mantsakïtsu
1. ¿Imanirtaq yachakonqantsikpita upällaqa kakuntsiktsu?
1 Jehovapa testigonkunaqa manam yachakonqantsikpita upällaqa kakuntsiktsu, tsëpa rantenqa Diospa Reinompita willapäkurmi imëpis purintsik (Pro. 3:27). Diospa Reinon ruramunampita nunakuna yachakuyänampitaqa manam ni ima más alli kanmantsu. Itsa willapäkïcho atska hora purikanki nunakunata revistan haqipurnin o mëcho këkaq nunakunata willaparnimpis, tsënö rurëkaptikipis, itsa estudio bíblico qonëki pishipushunkiraq. ¿Imanirtaq estudio tarita tïrankitsu?
2. ¿Imanirtaq estudio biblicota qokunkitsu?
2 Wakinkunaqa estudio bíblico qoyta mantsayan: alli yachatsikïtaqa manam yachätsu nirnin, o manam alläpaqa tiempö kantsu nirnin. Kë yachatsikïkuna yanapashunëkitam shuyaräyä, tsënöpa mana mantsakushpa huk estudio biblicota qallanëkipaq (Mat. 28:19; Hech. 20:20).
3. ¿Bibliapita yachatsikïta puedishwantsuraq?
3 Manam tsëpaqnötsu kä: Itsa Bibliapita yachatsikïta mantsakunkiman escuelacho mana alläpa estudiashqa karnin, o manam tsë rurëpaqnötsu kä nirnin. ¿Yarpankiku punta cristianokuna “mana letra reqeq y lluta nunakunalla kayanqanta”? Tsënö karpis Diospita alli yachatsikoqmi kayarqan. ¿Mëchöraq yachakuyarqan? “Jesuswanmi puriyarqan” ninmi Bibliaqa (Hech. 4:13). Awmi, Alli Maestropitam yachakuyarqan. Noqantsikpis pëpita yachakushwanmi, y imanöpis yachatsikonqanqa këkan Bibliachömi. Tsëmi escuelacho mana alläpa estudiashqa karpis, llapantsik Diospita alli yachatsikïkunata chaskikantsik, tsë kaqmi alläpa väleqqa (Isa. 50:4; 2 Cor. 3:5).
4. ¿Imatataq yachakuntsik Amospita?
4 Höraqa, Jehová alli reqishqa nunakunata chachaqpam willapätserqan waktsa nunakunawan. Profeta Amosmi kënö nerqan: “Manam profëtatsu, ni profëtapa tsurintsu karqä; üsha täpakoqlla y higos poqunampaq tuksipakoqllam karqä” (Amós 7:14). Tsënö karpis Amosqa mana mantsashpam, becerro adoraq sacerdote Amasiasta willaparqan mana alli rurëkanqampita (Amós 7:16, 17). Tsënö kaqllam noqantsikpis yarpashwan, Diospita kë willapäki kanqanta, y yachatsimäshunmi imanöpapis ruranapaq (2 Tim. 3:17).
5. Rurakïnintsik alläpa këkaptimpis, ¿imanirtaq estudio biblicota qallanapaq tïrashwan?
5 Manam tiempö kantsu: Rasumpam, atska rurakïyoq kanki, tsëpis, ¿manaku tiempïkita rakishqanki imëpis willapäkunëkipaq? Estudio biblicota qallëta tïrarnenqa, más kushikïtam tarinki. Tsënö yachatsikurllam rikanki Diospa Palabran nunakunapa kawëninta shumaq altsanqanta (Heb. 4:12). Jehovaqa alläpam kushin, nunakunata ‘rasumpa kaq yachatsikïkunata musyatsïta’ tïrashqa (1 Tim. 2:4). Angelkunapis alläpam kushiyan, huk nuna hutsampita wanakurnin Diosta servir qallëkuptin (Luc. 15:10).
6. ¿Ima rurënintsiktaq kan Jehovapa munëninchö?
6 “Diosqa munan tukïläya nunakuna salvakuyänanta y rasumpa kaqta yachakuyänantam” (1 Tim. 2:4). Y noqantsiknam yanapakuntsik Diospa munënin rurakänampaq. ¡Tsë rurënöqa manachi ni imapis kanmantsu! Tsëmi, ¡ama mantsëtsu estudio bíblico qokïta!