‘Llapan runacunawan shumag alli cawacuyanqui’
1. Wayinkunachö shumaq mana chaskimashqaqa, ¿Bibliapa ima musyatsikïninkunatataq yarpänantsik?
1 Jehoväpa markanqa tranquilo y alli kawakuyänampaq willapäkoq markam (Is. 52:7). Tsënö kaptimpis, wakin nunakunaqa wayinkunaman ëwashqaqa piñakuyan o ajäkuyanmi. Tsënö pasakuptin mana ras piñakunapaq y plëtur mana kakunapaq yanapakïkunata rikärishun (Rom. 12:18, NTCN).
2. ¿Imanirtaq precisan alli tanteaq kanantsik?
2 Alli tanteaq kë. Rasumpa kaqta mana musyëta munarmi o problëmakunayoq karmi wakinkunaqa shumaq chaskimantsiktsu. Quizá, mana alli hörachö o problëmankunapita piñashqachöna chärishwan. Yachatsinqantsik mana gustaptinqa, capazchi wakinkuna llutanta Testïgokunapaq niyanqanta wiyayashqa (2 Cor. 4:4). Tsënö piñakuyanqampita noqantsik culpannaq kanqantsikta alli tantiyëkur musyëmi yanapamäshun mana plëtur kakunapaq (Prov. 19:11).
3. ¿Imakunachötaq wiyamaqnintsikkunata respetakoq kanqantsikta rikätsikuntsik?
3 Respetakoq kashun. Atskaq nunakunam creiyanqankunaman chipyëpa confiakuyan (2 Cor. 10:4). Claro, cada unom decidin wiyëta o mana wiyëtapis. Creiyanqankunataqa manam imëpis mana respëtuwanqa tratashwantsu o imatapis mana musyayanqantanötsu rikätsishwan. Ëwakï nimashqaqa, respëtowanmi witikunantsik.
4. ¿Ima ninanta ‘alli shimintsicpa’ parlakïqa?
4 Kuyakïwan parlashun. Ofendimashqapis, ‘alli shimintsicpam parlapäshwan’, tsë ninanqa, tranquilo y kuyakïwan parlapëmi (Col. 4:6; 1 Ped. 2:23). Plëtunantsikpa rantinqa o trukanqa imakunachö igual creinqantsiktam parlashwan. Yachëllapa tantiëta procurashun imanir juknöpa pensanqanta. Höraqa, mana piñakunampaqmi parlapëta dejarinantsik (Prov. 9:7; 17:14).
5. ¿Yachatsikunqantsikchö mana plëtukoq kashqaqa ima allikunataq pasakunman?
5 Mana piñakoq kashqaqa, quizá imanö tratanqantsikta yarpärir Bibliapa yachatsikïninta wiyariyanqa pillapis yapëchö watukaptin (Rom. 12:20, 21). Alläpa chikimaqnintsikpis tiempowanqa capaz cristiano mayintsikman tikrarinman (Gal. 1:13, 14). Cambianan o mana cambianan kaptimpis, mana ras piñakunqantsikta o ajakunqatsikta y mana plëtukoq kanqantsikta rikätsikushqaqa, yachatsikïkanqantsiktam shumaqyätsishun y Jehovätam alabashun (2 Cor. 6:3).