Profëtakunapita yachakushun: Amos
1. ¿Imanötaq Amos ruranqan kallpata qomantsik?
1 ¿Imëllapis pensarqunkiku waktsa o mana alläpa estudiashqa kar Diospita yachatsikïta mana puëdinqëkita? Tsënö pensashqa kaptikiqa, Amos ruranqanmi yanapashunki. Pëqa juk üsha mitseqllam karqan y höra hörallam trabajapakoq, peru Jehoväqa juk alläpa precisaq musyatsikïta willakunampaqmi utilisarqan (Amos 1:1; 7:14, 15). Y kanan witsampis, pënö nunakunatam Jehoväqa utilisan (1 Cor. 1:27-29). ¿Imakunachö mastaq Amos ruranqan yanapamäshun yachatsikïnintsikchö?
2. ¿Imanirtaq alli tsarakushwan yachatsikunqantsikta michëkämashqapis?
2 Michëkäyaptimpis allim tsarakurqan. Norti kaq Israelpa chunka kastankunapaq Diospa profecïanta Amos willakuptinmi, mana rasumpa kaq Dioskunata adoraq Amasïas sacerdöti nirqan pëkunaqa religionyoqna kayanqanta y tsë markapita ëwakunampaq (Amos 7:12, 13). Amos ruranqanta Rey Jeroboan michänanrëkurmi, Amasïasqa llutanmampa Amos willakunqanta tumaratsirqan (Amos 7:7-11). Peru Amosqa manam mantsapakurqantsu. Kanan witsampis, Diospa markampa contran churakarninmi wakin religiösukunaqa polïticokunapa yanapakïninta ashiyan. Tsënö kaptimpis, Jehoväqa awnimantsik imëka arma contrantsik churakarpis mana imanamänapaq kaqtam (Is. 54:17).
3. ¿Ima ishkë musyatsikïkunatataq willakuntsik kanan witsan?
3 Diospa juiciumpita y shamoq tiempuchö bendicionkunapaqmi parlarqan. Israelpa chunka kastankunapaq Diospa juiciunta willakushqa karpis, jutinta apaq libruchöqa, Amosqa Jehovä markanta altsanampaq y bendicinampaq kaqtam qellqarqan (Amos 9:13-15). Noqantsikpis Diospa ‘juisiun junaqpaqmi’ willakuntsik, peru manam tsëllatatsu willakuntsik, Diospa ‘alli willaquininkunaqa’ maspis kanmi (2 Pëd. 3:7; Mat. 24:14). Armagedonchö mana alli kaqkunata Jehovä ushakäratsirninmi, Patsata juk shumaq paraïsuman tikraratsinqa (Sal. 37:34).
4. ¿Imanirtaq següru këkantsik Jehoväpa munëninta cumplinapaq kaqta?
4 Tsëläya michëkämashqa Diospa Gobiernumpita willakïqa, pëta wiyakunapaq y pëllata sirwinapaq awnikunqantsiktam pruëbaman churan (Juan 15:19). Peru segürum këkantsik Amosta yanapanqannölla, munëninta ruranapaqqa noqantsiktapis yanapamänapaq kaqta (2 Cor. 3:5).