Yachatsikurnin tiempuntsikta alli provechashun
Jehoväpa testïgunkunaqa 1.945.487.604 hörakunam yachatsikurquntsik 2014 watachö, këmi rikätsikun Jehoväta sirwirnin ocupädu këta munanqantsikta (Sal. 110:3; 1 Cor. 15:58). ‘Ichicllana cay tiempu’ ushakänampaq pishikaptinqa, ¿manatsuraq churapakashwan nunakunata mas yachatsinapaq? (1 Cor. 7:29, NTCN).
Tiempuntsikta alli provechanantsikrëkurmi yachatsikunqantsikchöqa tukïta ruranantsik nunakunata yachatsinapaq. Tantiyarinapaq, yachatsikunqantsikchö juk o mas hörakuna Bibliapita piwampis mana parlarninqa, ¿imataraq rurashwan? Cada markam jukläya, y tsëmi qateqninchö yanapakïkuna itsa yanaparamäshun tiempuntsikta alli provechanapaq (1 Cor. 9:26).
Wayin wayin yachatsikur. Mëtsika watapam publicadorkunaqa wayin wayin yachatsikur yachatsikïninkunata qallayashqa. Tsënö kaptimpis, mëtsikaq nunakunam junaqpaqa trabajaq ëwakuyan. Tsëqa, ¿manatsuraq yachatsikushwan tardikunapa o ampikunapa? Tsë hörakunam nunakunaqa wayinkunachö y tiempuyoq këkäyan. Y qoyakunapa cällikunachö y negociukunachö yachatsikunqantsikqa itsa alli yarqunqa.
Cällikunachö yachatsikur. Nunakuna mas puriyanqan sitiukunamanmi mësakunatawan mostradorta churayanman, y imëpis congregacionpa territoriunkunamanmi churayanman (rikäri 2013 wata juliu killa Diospita Yachatsikunapaq höjapa 5 kaq päginanta). Peru tsëpa nunakuna manana puriyaptinqa, congregacionchö yachatsikïta rikaqmi nunakuna mas puriyanqan juk sitiuman mostradorta churayänampaq nirinman.
Yachakï munaqkuna y Bibliapita yachakïkaqkuna. Höraqa yachatsikunqantsikchö pitapis manam tarintsiktsu. Tsëqa, ¿manatsuraq tsë hörakuna kutirishwan yachakï munaqkunaman y Bibliapita yachakïkaqkunata yacharatsinapaq? Tantiyarinapaq, wayin wayin yachatsikunqantsik säbadu qoyapa alli kaptinqa, ¿manatsuraq tardikunapa y ampikunapa Bibliapita yachakïkaqkunata watukarishwan? O yachakï munaqkunaman cärruntsikwan kutirninqa, itsa mas alliqa kanman cärruntsikchö juk ishkëlla ëwanqantsik, tsënöpa yachatsikunqantsikchö masta rurarinapaq.
Rasunmi, ëka tiempu yachatsikunqantsiktaqa yupëta puëdintsikmi, peru alli yarqupumashqam masqa kushikushun. Yachatsikunqantsikchö pillawampis mana parlarninqa, jukmampa rurëta procurashun. Yachatsikunqantsikchö tiempuntsikta alli provechanapaq Jehovä ‘Diosta mañacushun’ (Mat. 9:38).