Casädukunaqa wanuyanqanyaqmi juntu kayänan

Alli kawakoq casädukunaqa Jehoväpa shonquntam kushitsiyan y kikinkunapis kushishqam kawakuyanqa (Mr 10:9). Juk cristiänu casädu vïdanchö kushishqa y imëyaqpis juntu këta munarqa, Bibliachö këkaq consëjukunatam cäsukunan piwampis casakunampaq kaqta akrarqa.

Juk jövin piwampis casakunampaqqa ‘wëta cuenta këninmi pasashqa kanan’. Tsë edä jövinkunaqa, masqa pununakuyllamanmi yarparäyan y manam alli pensëtapis yachayantsu (1Co 7:36). Japallëki kanqëkiyaq Jehoväwan mas amïgu y alli jövin o shipash kanëkipaq tiempuykita alli provechë. Tsënöpam casakurqa mas alli qowa o warmi kanki.

Piwampis manaraq casakurmi ‘shonqunchö pë imanö kanqanta’ alli rikänëki (1Pë 3:4). Peru imallachöpis mana següru karqa pëwan parlë. Casädu vïdachöpis manam biennikillatatsu ashinëki, sinöqa pëpa biennintam ashinëki (Flp 2:3, 4). Soltëru o soltëra këkar Bibliachö consëjukunata cäsukuptikiqa, casakuptikipis yanapashunkim y kushishqam casädu vïdëkichö kawakunki.

¿IMANÖTAQ ALISTAKÏKASHWAN CASÄDU KAWAKÏPAQ? 3 KAQ: ALLIRAQ RIKË NEQ VIDEUTA RIKÄRIR, KËKUNATA CONTESTË:

• Kë pani y Shanë jutiyoq wawqiqa, ¿imanötan reqinakuykäyanqanchö këkäyarqan?

• Shanë jutiyoq wawqita mas reqinqanchöqa, ¿imatatan pani rikarqan?

• ¿Imanötan kë panita papäninkuna yanapayarqan, y imatatan rurarqan?