Teyta Dios wiyamänapaqqa, ¿imanötan mañakunantsik?
Bibliachömi nin, pillapis mañakuptinqa Teyta Dios wiyanqanta (Salmus 65:2). Mëchö këkarnin, imë höra karnin, fuertipa karnin o shonquntsikllachö karnimpis, Teyta Diosmanqa mañakuyta puëdintsikmi. Diosnintsik kuyakoq y alli Teyta karmi teytantsiktanö rikänata munan (Mateu 6:9). Y imanö pëman mañakunapaq kaqtapis yachatsimantsikmi.
JESUSPA JUTINCHÖ TEYTA DIOSMAN MAÑAKUSHUN
“Teytata jutïchö imatapis mañakuyaptikiqa, pëqa mañakuyanqëkita qoyäshunkim” (Juan 16:23).
Jesus ninqanqa yachatsimantsik kikin Diosnintsikta mañakunapaqmi. Y manam Diosnintsikqa munantsu santukunapa, angelkunapa o wanushqa familiantsikkunapa jutinchö mañakunata, sinöqa Jesuspa jutinchö mañakunatam munan. Noqantsikrëkur Jesus wanushqa kaptinmi, jutinchö mañakunqantsikta Teyta Diosqa wiyan. Jesusmi kënö nirqan: “Mana noqawanqa, manam ni pipis Teytaman shamïta puëdintsu” (Juan 14:6).
LLAPAN SHONQUNTSIKWAN MAÑAKUSHUN
“Llapan shonquntsikwan pëta mañakushun” (Salmus 62:8).
Teyta Diosman mañakurninqa, juk kuyakoq teytantsikwan parlanqantsiknömi pëtaqa mañakunantsik. Juk librullapita o kutin kutin kaqllata mañakunantsikpa rantinmi respëtuwan y llapan shonquntsikwan mañakunantsik.
TEYTA DIOSTA KUSHITSINQAN KAQKUNATA MAÑAKUSHUN
“Munëninmannö kaqta imatapis mañakushqaqa, pëqa wiyamantsikmi” (1 Juan 5:14).
Bibliachömi nimantsik, Teyta Dios noqantsikpaq imata ruramunampaq kaqta y noqantsik imata ruranapaq kaqtapis. “Munëninmannö kaqta imatapis mañakushqaqa” Teyta Diosqa wiyamäshunmi. Y pëta mas reqinapaqqa Bibliatam alli estudianantsik, tsëmi yanapamäshun Diosman imanö mañakunapaq kaqta musyanapaq. Tsënö rurashqaqa Teyta Diosnintsikqa mañakunqantsikkunata wiyamäshunmi.
¿IMAKUNATATAN MAÑAKUSHWAN?
Wananqantsikkunapaq mañakushun. Këkunapaqmi mañakunantsik: mikuypaq, röpapaq y mëchö täränapaq. Y mañakunantsikmi imatapis decidinqantsikchö yanapamänapaq, imëka pruëbakunachö alli tsarakunapaq, jutsata ruranqantsikpita perdonamänapaq, pëman mas markäkunapaq o yärakunapaq y imëkakunapitapis cuidamänapaq (Lücas 11:3, 4, 13; Santiägu 1:5, 17).
Nuna mayintsikpaq mañakushun. Alli teytakunaqa wamrankuna kuyanakuyänantam munayan. Tsënöllam, Jehovä Diospis Teytantsik karnin juknintsik juknintsik kuyanakunata munan. Tsëmi Teyta Diosqa majantsikpaq, wamrantsikkunapaq, familiantsikkunapaq y amïguntsikkunapaq mañakunantsikta munan. Apostol Santiägum kënö nirqan: “Juknikikuna juknikikunapaq mañakuyë” (Santiägu 5:16).
Agradecikushun. Teyta Diosnintsikqa imëkatam noqantsikpaq ruramun. Tsëtam Palabran Bibliachö kënö nimantsik: “Ciëlupita tamyata y tiempunchö alli cosëchata qoyäshurniki, mëtsika mikïwan pachëkikunata juntatsin y shonqïkikunatam alläpa kushitsin” (Hëchus 14:17). Tsënö noqantsikpaq imëkata Teyta Dios ruramunqampitam agradecikunantsik. Y nimanqantsikkunata wiyakurnimpis agradecikunqantsiktaqa rikätsikuntsikmi (Colosensis 3:15).
MAÑAKURNIN SÏGUISHUN
Mañakunqantsikkunata Teyta Dios mana wiyanqanta pensarmi höraqa llakikushwan. Tsëqa, ¿Teyta Diosnintsik mana kuyamanqantsiktaku rikätsikun? Manam. Rikärishun imanir mañakur sïguinapaq kaqta.
Qallananchömi Estëbanpaq parlarqantsik. Pëmi kënö willakun: “Teyta Diosman mana mañakurqa, manachi kanannöqa kushishqatsu këkäman karqan”. ¿Imatan Estëbantaqa yanaparqan? Pëqa Bibliapita yachakurmi qallëkurqan, tsëchömi yachakurqan kutin kutin Teyta Diosman mañakunampaq kaqta. Tsëtam kënö nin: “Teyta Diostam alläpa agradecikü amïgükuna yanapayämanqampita. Tsëmi kananqa kushishqana kawakü”.
¿Imatan pasakurqan Jeniwanqa? Jutsata rurashqa karmi mañakunqanta Teyta Dios mana wiyanqanta pensarqan. Tsëmi kënö nin: “Alläpa llakikurninmi imanir tsënö sientikunqäta musyanäpaq Teyta Diosta rogakurqä”. ¿Imanötan Teyta Diosman mañakunqan yanaparqan? Pëmi kënö nin: “Teyta Diosman mañakurmi musyarirqä imanö pë kuyamanqanta. Mana väleqnö sientikuptïpis Teyta Diosqa manam tsënötsu rikämaq. Y llakishqalla mana kanäpaqpis yanapamarqanmi”. Y kënöpis willakunmi: “Mañakunqämi yanapamarqan Teyta Diosta kuyakoq amïgutanö y kuyakoq Teytatanö rikänäpaq. Teyta Dios munanqanta ruraptïqa yanapëkämanqallam y manam imëpis dejaramanqatsu”.
Llapan pasakunqankunapitam Isabel kënö willakun: “Mana sänu këkarnimpis wamrä kushishqa kanqanta rikarmi alläpa kushikü, y Teyta Dios mañakunqäta wiyanqampitam agradecikü”.
Kananqa Isabelta ima pasanqanta rikärishun. Qeshyaq këkaptinmi doctorkuna niyarqan wamranqa mana sänu yurinampaq kaqta, tsëmi Isabelqa alläpa llakikurqan. Y wakin nunakunapis abortanampaqmi niyarqan. Pëmi kënö nin: “Tsë höram alläpa llakikurnin wanukuytapis munarqä. Tsëmi kutin kutin yanapëkamänampaq Teyta Diosman mañakurqä”. Doctor ninqannömi Isabelpa wamranqa sänutsu yurirqan. Mañakunqanta Teyta Dios wiyanqanta willakurmi Isabelqa kënö nin: “Wamrä yurinqampitaqa 14 watanam pasarishqa, y sänu mana karnimpis kushishqa kanqanta rikarmi Teyta Diosta alläpa agradecikü”.
Isabel tsënö ninqanqa yarpätsimantsik, Salmus libruta qellqaq nuna kënö ninqantam: “TEYTA DIOS, cäsushuqniki nunakuna mañakayämushqantaqa imëpis wiyankim. Pëkunataqa kallpatam qonki y ankupankim” (Salmus 10:17). Teyta Diosman mañakuytaqa manam imëpis dejanantsiktsu.
Bibliachömi tarintsik Jesus mañakunqanta y discïpulunkunata yachatsinqan mañakuyta. ¿Imatatan tsëpita yachakuntsik?