¿Ushakë imë kanampaq kaqtatan Jesusqa nirqan?
Yachakurinqantsiknöpis, Bibliachö ushakëpaq parlarqa manam kë Patsa o llapan nunakuna ushakäyänampaqtsu nikan, sinöqa mana allikunata ruraq nunakunallam ushakäyanqa. Peru, ¿imë ushakäyänampaq kaqtaqa Bibliachö willakunku?
JESUSMI KËNÖ NIRQAN:
“Mäkoq mäkoqlla këkäyë, porqui manam musyayankitsu ni imë junaq ni imë höra kanampaq kaqta” (MATEU 25:13).
“Rikarëkäyëlla, riyaq riyaqlla këkäyë, porqui manam musyayankitsu dispunishqa tiempu imë kanampaq kaqta” (MARCUS 13:33).
Ushakë imë kanampaq kaqtaqa manam pï nunapis musyantsu. Peru “imë junaq y imë höra” kanampaq kaqtaqa Teyta Diosqa musyanmi (Mateu 24:36). Tsëqa, ¿ushakëpaq ichikllana pishinqanta manatsuraq musyashun? Jesusmi qateqninkunata nirqan ushakë junaq chämunampaq imakuna pasakunampaq kaqta.
SEÑALKUNA
Ichikllachöna ushakë kanampaq kaqta musyanapaqmi Jesusqa këkuna pasakunampaq kaqta nirqan: “Juk nacionmi juk nacionpa contran sharkunqa y juk gobiernum juk gobiernupa contran sharkunqa, y më tsëchömi mikï pishinqa y patsa feyupa kuyunqa” (Mateu 24:3, 7). Y nirqanmi ‘muyakoq qeshyakuna kanampaq’ kaqtapis (Lücas 21:11). ¿Jesus ninqankunaqa cumplikëkanku?
Kanan witsanqa mëtsikaq nunakunam sufrikäyan guërrakuna kaptin, mikuy pishiptin, patsa feyupa kuyuptin y muyakoq qeshyakuna kaptin. 2004 watachömi patsa alläpa kuyuptin oceänu Indicu niyanqan lamar yarqaramurqan, tsëchömi cäsi 225.000 mil nunakuna wanuyarqan. Y kima wata COVID-19 qeshya kanqan witsanchömi 6,9 millonpitapis mas nunakuna entëru patsachö wanuyashqa. Jesus ninqannöpis këkunam rikätsimantsik ushakëpaq ichikllana pishinqanta.
“USHANAN JUNAQKUNA”
Bibliachöqa ushakë manaraq chämuptin imakuna pasakunampaq kaqtam nin, y tsë tiemputam “ushanan junaqkuna” nir reqintsik (2 Pëdru 3:3, 4). 2 Timoteu 3:1-5 nin ushanan junaqkunachö nunakuna chipyëpa mana alli kayänampaq kaqta (rikäri “Ushakë junaq manaraq chämuptin” neq recuadruta). ¿Manaku kananqa rikantsik kikinkunallapaq imatapis asheq nunakunata, qellë kuyaqta, chikikoqta, y wakinkunata mana alli trataqta? Këkunam rikätsimantsik ushakë junaqpaq ichikllana pishinqanta.
Peru, ¿ëka junaqkunaraq ushanan junaqkunaqa kanqa? Ichik tiempulla kanampaq kaqtam Bibliachöqa nin. Tsëpitam Teyta Diosqa ‘patsata ushakëkätseqkunata ushakätsinqa’ (Revelacion [Apocalipsis] 11:15-18; 12:12).
PATSAQA ICHIKLLACHÖNAM JUK SHUMAQ HUERTA KANQA
Teyta Diosqa patsätsishqanam imë junaq y imë höra llapan mana allikunata ushakätsimunampaq kaqta (Mateu 24:36). Diosqa “manam munantsu pipis ushakänanta” (2 Pëdru 3:9). Sinöqa Shumaq Patsachö mana wanurna kawakunatam munan, tsëmi pëqa reqinantsikta y cäsukunantsikta munan.
Teyta Diosqa, Shumaq Patsachö kawayänampaq nunakuna imata rurayänampaq kaqta musyayänampaqmi, entëru Patsachö Bibliapita yachatsikuyänampaq patsätsimushqa. Tsëpaqmi Jesusqa kënö nirqan: “Llapan nacion nunakuna musyayänampaqmi, Gobiernupita alli willakïkuna entëru patsachö willakushqa kanqa, y tsëpitanam, ushakë chäramunqa” (Mateu 24:14). Jehoväpa testïgunkunaqa entëru Patsachömi mëtsika millon hörakuna Bibliapita nunakunata yachatsiyan. Awmi, Jesus ninqannömi ushakë junaq manaraq chämuptinqa entëru Patsachö Diospita yachatsikuyänan karqan.
Kë Patsachö gobiernukunaqa ichikllachönam ushakäyanqa. Peru kushikuypaqqa Diosta cäsukoqkunaqa Shumaq Patsachömi mana wanushpa kawakushun. Qateqnin kaqchömi masllata musyarishun Shumaq Patsachö kawëta munarqa imata ruranapaq kaqta.
Ushakë junaqkunapa Jesucristu willakunqankunaqa alläpam kushitsimantsik.