Yachakunqantsiknömi nunakunaqa warë warätin alli kawakuyta munar suertita qateqkunaman ëwayashqa, universidäkunachö estudiayashqa, qellëta ashiyashqa y alli nuna kayänampaqmi kallpachakuyashqa. Y tsëkunamanmi alläpa confiakuyan. Peru tsëkunata rurëqa juk sitiuta ëwëta munar mana reqeq nunata tapukuynömi kanman. Tsëqa, ¿manaku warë warätin imanö alli kawakunapaq kaqta pipis musyan?
BIBLIALLACHÖMI ALLI CONSËJUKUNATA TARINTSIK Imatapis rurëta munarqa o decidita munarqa, pipis noqantsikpita mas yachaq y mayor nunakunatam tapukuntsik. Tsënöllam warë warätin alli kawakuyta munarpis, noqantsikpita mas yachaq y confiakuypaq nunaman markäkunantsik o yärakunantsik. Tsë yanapakuytaqa tarintsik unë qellqayanqan libruchömi, tsë libruta qellqayanqampitaqa 3.500 watanönam pasarishqa. Tsë libruqa Diospa Palabran Bibliam.
¿Imanirtan Bibliachö ninqankunamanqa confiakunantsik? Kikin Teyta Dios qellqatsimushqa kaptinmi. Peqa ‘wiñëpa kawaq Awkinmi’, y ‘unëpita imëyaqpis kawaq Diosmi’ (Daniel 7:9; Salmus 90:2 ). “TEYTA DIOSMI ciëluta kamashqa. Kë patsatapis kamarmi shumaq patsakätsishqa” (Isaïas 45:18 ). Kikin Diosmi jutin Jehovä kanqanta nimantsik (Salmus 83:18 , TNM ).
Ima costumbriyoq o ima kastapita kayaptimpis llapan nunakunata igualpa rikänapaq kaqtam Diosqa Palabran Bibliachöqa yachatsimantsik. Y më tsë nacionpita kayaptimpis mëtsikaq nunakunatam Bibliachö këkaq consëjunkunaqa yanapashqa. Diospa Palabran Bibliataqa mëtsika idiömakunamanmi traduciyashqa y cäsi llapan nunakunapam Bibliankuna kan. Tsëmi idiömankunachö kaptin fäcil-lla entiendiyan y alli kawakuyänampaq yanapan. Bibliachömi kënö nin:
‘Diosqa llapantapis igualpam rikan, y më nacionchöpis pëta mantsaqta y alli kaqta ruraqtaqa, pë chaskinqam’ (HËCHUS 10:34, 35 ).
Juk teytaqa wamrankunata kuyarninmi yanapan. Tsënöllam Jehovä Diospis kuyakoq Teytantsik kar Palabran Bibliawan yanapamantsik (2 Timoteu 3:16 ). Diosmi kamamarquntsik y musyanmi kushishqa kawakunapaq imata ruranapaq kaqta, tsëmi Diospa Palabranman confiakunantsik.
BIBLIAQA CONFIAKUYPAQMI
Bibliachöqa unënam willakushqa karqan kanan tiempuchö imakuna pasakunampaq kaqta y nunakunapis imanö kayänampaq kaqta . Tsëpitaqa 2.000 watanönam pasashqa. Tsëmi Bibliachö ninqankunamanqa confiakunantsik.
IMA PASAKUNAMPAQ KAQTA WILLAKUNQAN
“Juk nacionmi juk nacionpa contran sharkunqa, y juk gobiernum juk gobiernupa contran sharkunqa. Patsam feyupa kuyunqa, jina më tsëchömi mikï pishinqa y muyakoq qeshyakuna kanqa” ( LÜCAS 21:10, 11 ).
NUNAKUNA IMANÖ KAYÄNAMPAQ KAQTA WILLAKUNQAN
“Ushanan junaqkunachöqa alläpa mana alli tiempukunam kanqa, alläpa sasa tiempukuna. Porqui nunakunam kayanqa kikinkunallata kuyakoq, qellëta kuyaq, alabakoq, precisaq tukoq, Diospa contran churakaq, teytankunata mana wiyakoq, mana agradecikoq, jaqikoq, mana kuyakoq, ima acuerdumampis chëta mana munaq, chikikur tumpakoq, peqanta tsarëta mana yachaq, alläpa lïsu, alli kaqta mana kuyaq, nuna mayinta rantikoq, munëninta rurakoq, pasëpa alli tukoq, Diosta kuyanampa rantin kikimpa munëninllata asheq” ( 2 TIMOTEU 3:1-4 ).
Unëna Bibliata qellqayashqa kaptimpis, tsëchö llapan ninqankuna cumplikaqta rikarqa, Hong Kong markapita Leung jutiyoq nunanöchi pensanki. Pëmi kënö nin: “Bibliata qellqayanqampita mëtsika watakuna pasashqa kaptimpis, ¿imanötan nunakunalla qellqayashqa kaptinqa tsëchö ninqankunaqa cumplikëkan? Tsëqa rikätsikun nunakunapita mas yachaq y musyaq Bibliata qellqatsimushqa kanqantam”.
Bibliachö willakunqanqa mëtsikam cumplikashqa. Tsëmi rikätsikun Bibliaqa Diospa Palabran kanqanta. Jehovämi kënö nin: “Noqapita mas juk Diosqa manam kantsu. Manam ima ïdulupis noqaman iwalantsu. Noqam unëpita patsa ima kananpaq kaqtapis willakatsï” (Isaïas 46:9, 10 ). Tsëmi warë warätin imakuna pasakunampaq kaqta Bibliachö ninqanmanqa confiakunantsik.
BIBLIAQA KANAN Y SHAMOQ TIEMPUCHÖPIS YANAPASHUNKIM
Diospa Palabran Bibliachö consëjukunata cäsukurqa allim kawakunki. Tsëpaq wakinllata rikärishun.
QELLËPAQ Y TRABÄJUPAQ
“Atskata ganar mana jamashpa uryanantsikpa rantinqa wallkallata ganarpis jamashqantsikmi mas alli këkan. Mana jamashpa uryarqa vientuta tsarita munaqnömi këkantsik” ( ECLESIASTES 4:6 ).
FAMILIAKUNAPAQ
“Llapëkikunam cada ünu warmikikunata kikikikunatanö kuyayänëki; jina warminam, qowanta shonqupita patsë respetanan” ( EFESIUS 5:33 ).
WAKINKUNATA IMANÖ TRATANAPAQ
“Llutallaqa imapitapis ama piñakïtsu ni cäsïtsu. Piñakurqa mana alli rurëmanmi chäkurinki” ( SALMUS 37:8 ).
Bibliachö ninqankunata cäsukurqa kanan witsan y shamoq tiempuchöpis kushishqam kawakunki. Teyta Diosmi Palabran Bibliachö shamoq tiempuchö imanö kawakunapaq kaqta änimantsik.
ALLI Y YAMËNAM KAWAKUSHUN
“Alli shonquyoq nunakunapaqmi kë patsa herenciankuna kanqa. Y tsëchömi imëyaqpis tranquïlu kawakuyanqa” ( SALMUS 37:11 , TNM ).
LLAPANTSIKPAQMI MIKUYNINTSIK Y WAYINTSIKPIS KANQA
“Wayinkuna sharkatsirmi kuyashqä nunakuna tsëchö täräyanqa. Üvasta plantakurmi wayïninta mikukurnin kawakuyanqa” ( ISAÏAS 65:21 ).
MANAM PIPIS QESHYANQANATSU
“Wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu” ( REVELACION 21:4 ).
¿Imatatan rurankiman tsënö kawakunëkipaq? Qateqnin kaqchömi tsëta yachakurinki.