AMA CHIKIKOQ KASHUNTSU
3 | Pensënintsikkunapita chikikoq këta ushakätsishun
Bibliachömi nin:
“Pensënikikunata cambiar jukläyana tikrayë, tsënöpa Diospa alli, pëta kushitseq y chipyëpa alli munënin ima kanqanta kikikikuna rikäyänëkipaq” (ROMÄNUS 12:2).
¿Ima ninantaq tsëqa?
Diosnintsikqa musyanmi imata yarpashqantsikta (Jeremïas 17:10). Imatapis ninapaq o ruranapaqqa alliran pensantsik, peru chikikoq këta dejanapaqqa manam tsëllatatsu ruranantsik. Chikikuyqa pensënintsikchö y shonquntsikchömi yurin, tsëmi tsëpita chipyëpa ushakätsinantsik. Tsënöllam cambiëta puëdishun y chikikoq kashunnatsu.
Këta rurë:
Capaz shonquykichö pitapis chikipëkanki. Tsënö karqa imanir chikipëkanqëkitam alli musyanëki. Tsëta musyanëkipaqqa këkunamanmi pensanëki: “¿Imanötan rikä juk nacionpita y juk color nunakunata? ¿Alliku reqï imanö kayanqanta, juk markapita o juk color kayanqanllapitaku chikipä?”. Tsënö kaptinqa chikitsikoq mensäjikuna Internetchö yarqamuptin o pelïculakunachö yarqamuptinqa ama rikëtsu.
Diospa Palabran Bibliam shonquntsikchö y pensënintsikchö pitapis mana chikinapaq yanapamantsik
Mana allita pensanqantsikta o munanqantsikta musyëqa manam fäciltsu. Peru Diosqa, ‘shonqu imata pensanqanta y imata munanqantam musyan’, tsëmi Palabranchö nimanqantsikkunaqa yanapamäshun pensanqantsik alli o mana alli kanqanta musyanapaq (Hebrëus 4:12). Tsëmi Bibliachö yachakunqëkita imata pensanqëkiwan igualatsinëki. Tsëpitanam Bibliachö ninqannö pensanëkipaq kallpachakunëki. Diospa Palabranmi pensënintsikchö y shonquntsikchö ‘alli patsakashqa’ këkaq chikikuyta ushakätsita puëdin (2 Corintius 10:4, 5).