Jehoväman confiakoqkunaqa allim tsarakuyan

Religion asuntupita imatapis mana musyanqanta pensarmi, noqaqa tsënö nimaptin burlakur asikurqä. Tsëpitanam, “¿imatataq qamqa Biblia asuntupita musyanki?” nir tapurqä. Y manam imapis nimarqantsu. Tsëpitanam willamarqan Testïgu mamänin Bibliapita yachatsishqa kanqanta. Tsëmi masllata musyëta munar tapuparqä.

Tsë kutiqa paqasyaqmi parlakuyarqä. Amïgümi entienditsimarqan kë mundutaqa Satanas gobernëkanqanta Biblia yachatsikunqanta (Juan 14:30). Tsëta wiyarninqa espantakurqämi. Imëpis pensarqä kë munduta Dios gobernanqantam. Peru pensanqäqa manam igualarqantsu kë munduchö imëka mana allikuna pasakunqanta rikanqäwan. 26 watayoqllaraq karpis, imëka mana allikuna pasakunqankunaman yarpachakurmi punuyta puëdeqtsu kä.

Papänïqa Estädus Unïduschömi ejercituchö avionta manejaq. Y wamra kanqäpitam musyarqä imë karpis guërra qallarinampaq kaqta. Tsëpaqqa, juk botonta lapiriyänanllam pishirqan. Ejercituqa guërrapaq listum këkarqan. Vietnamchö guërra kanqanrëkurmi, California universidächö karpis imëka mana allikunapa pasarqä. Estudiantikunam reclamakur marchakunata rurayaq, y noqapis yanapakoqmi kä. Policïakunaqa garrutiwanmi qatikachäyämaq, y bomba lacrimogenawan qatikachäyämaptinmi shütëtapis y rikëtapis mana puëdir qeshpir ëwakuyaq kayä. Tsë tiempukunaqa alläpa feyum karqan. Polïticukunatam wanutsiyaq y nunakunaqa reclamakurmi imëka mana allikunata rurayaq. Nunakunaqa manam musyayaqtsu pita yanapayänampaq kaqta. Noqapis manam pasakunqankunata entiendeqtsu kä.

1970 watachömi Alaskapa norti kaq lädunta trabajaq ëwakurqä, tsëchöqa allim pagayämaq. Tsëpitanam, Inglatërrachö Londres markata ëwarqä. Tsëchö mötuta rantirirmi sur kaq lädupana ëwakurqä, manam musyarqätsu mëpa ëwëkanqätapis. Tsëpita killakuna pasariptinnam Africa nacionman chärirqä. Tsënö viajarmi rikarqä nacionninkunachö imëka mana allikuna pasaptin y libri këta munar, noqanöpis qeshpir ëwakuyta munaq mëtsika nunakunata.

Imëka mana allikunata rikarmi, Biblia ninqannö kë munduta Satanas gobernëkanqanta pensarqä. Peru musyëtam munarqä kë munduta Dios imanir mana gobernanqanta.

Tsëtaqa juk ishkë killakuna pasariptinmi musyarirqä. Y tiempuwannam imëka mana allikunapa pasëkarpis Jehovä Diosnintsikta kuyaq nunakunata reqirqä, y pëkunataqa alläpam kuyarqä.

IRLANDA DEL NORTI: “BOMBAKUNA Y BÄLAKUNA KANQAN”

Londres markata kutirirnam amïgüpa mamäninta ashirqä, y pëqa juk Bibliatam qaramarqan. Tiempuwannam Païses Bäjusta, Amsterdam markata ëwakurqä. Tsëchö këkarmi, juk kuti posti jawanchö Bibliata leyikaptï juk Testïgu chäramur Bibliapita maslla entienditsimarqan. Tsëpitanam Irlanda nacionpa Dublin markanta ëwakurqä, y Testïgukunapa sucursalninmanmi ëwarqä. Punkuta tocakuriptïmi pasatsiyämarqan y tsëchömi Arthur Matthewsta reqirqa. Pëqa atska watapanam Testïgu kanaq. Bibliapita yachakuyta munanqäta niriptïmi yachatsimänampaq änimarqan.

Yachakuykanqäqa alläpam gustamarqan. Testïgukunapa librunkunata, revistankunata y Bibliatapis allipam leyeq kä. Reunionkunachöqa, wamrakunapis parlakuyaqmi y Diosta mana sirweq yachaq nunakuna mana musyayanqankunatam musyayaq. Musyayaqmi mana alli rurëkuna imanir kanqanta, Dios pï kanqanta y nuna wanuriptin ima pasanqanta. Tsë nacionchöqa manam pitapis reqeqtsu kä, tsëmi Testïgukunalla amïgükunaqa kayarqan. Pëkunam yanapayämarqan Jehoväta kuyanäpaq y mandakunqanta cäsukunäpaq.

1972 watachömi bautizakurqä, y juk wata pasariptinllam precursor regular karqä. Tsëpitanam Irlanda del Nortipa Newry markata yanapakoq ëwakurqä, tsëchöqa wallkaqllam Testïgukuna kayarqan. Y rumipita rurashqa takshalla wayitam arrendarqä. Amänukunallachömi wäkakuna kaq, tsëmi discursüta yachakoqqa tsë wäkakuna kaqman ëwaq kä. Wäkakunaqa kutipaqnömi discursaptï rikaräyämaq, peru manam muuu niyämaqllapistsu. Peru discursarnin wiyamaqnïkunata rikëta yachakunäpaqqa allim yanapamarqan. 1974 watachönam, precursor especial karqä, y compañërüqa Nigel Pitt jutiyoq wawqim karqan. Pëwanqa kananyaqpis alli amïgum kayä.

Tsë witsankunaqa, Irlanda del Nortichöqa imëka guërrachönömi nunakuna pelyayaq. Tsëmi wakin nunakunaqa, “bombakuna y bälakuna kanqan sitiu” nir tsë markata reqiyaq. Tsëchöqa cada junaqmi cällikunachö pelyayaq, nunakunata francotiradorkuna illapayaq, mëchöpis lluta illapanakuyaq y bombatapis pashtatsiyaq. Tsë problëmaqa karqan religionkunapa y polïticukunapa culpanmi. Peru wakin religionkuna y catölicukunaqa musyayaqmi polïtica asuntuman Testïgukuna mana mëtikuyanqanta, tsëmi libri yachatsikuyta puëdiyaq kayä. Y nunakunaqa willayämaqmi më sitiuchö y imë höra peligru kanampaq kaqta, tsëmi tsë sitiukunamanqa ëwayaqnatsu kayä.

Tsënö kaptimpis, höraqa peligrösum karqan. Juk kutim, compañërü Dennis Carriganwan juk markata yachatsikoq ëwayarqä. Pëpis precursormi karqan. Tsë markachöqa manam Testïgukuna kaqtsu, y juk kutillam ëwashqa kayarqä. Tsëchömi juk warmiqa, “këkunaqa Gran Bretäñapita soldädukunam kayan” nir acusayämarqan. Capazchi tsënöqa pensarqan irlandes nunakunanö mana parlayaptï. Alläpam mantsakäyarqä. Musyayarqämi soldädukunawan alli parlaqta rikarqa wanuratsiyämänampaq kaqta, o qonquchö o qonqurchö illapayämänampaq kaqta. Kutikuyänäpaqmi cärruta shuyëkäyarqä, manam mas pasajërukuna karqantsu y alläpam alalarqan. Tsënam acusayämaq warmipa restaurantinman juk cärru chärirqan. Y warminam tsë cärruchö ëwaq ishkan nunakunata alläpa cölerashqa noqakunapaq quejakurqan. Tsënam nunakunaqa cärrunkunawan noqakuna këkäyanqäman shayämurqan y cärrükuna imë höra chämunampaq kaqtam tapuyämarqan. Viajayänäpaq kaq cärru chäramuptinnam choferwan parlayarqan, peru manam wiyayarqätsu imata parlayanqanta. Noqakunallam pasajëru kayarqä, y tsë markapita qarqayämänampaq kaqta y imëka mana allita rurayämänampaq kaqtam pensayarqä. Peru manam imapis pasarqantsu. Cärrupita bajayanqä höranam choferta tapurqä, “tsë nunakunawanqa, ¿imapitataq parlayarqëki?” nir. Pënam nimarqan: “Ama yarpachakuytsu. Pikuna kayanqëkitam willarqö. Manam imapis pasayäshunkitsu”.

1976 watachömi, Dublin markachö jatun asamblëa rurakarqan.a Tsëchömi reqirqä Inglatërrachö precursöra especialnö yanapakoq Pauline Lomax panita. Pëqa alläpam Jehoväta kuyaq, humildim y yachanëpaqmi kaq. Pëwan turin Rayqa, wamra kayanqampitam Jehoväpita yachakushqa kayänaq. Paulinewanqa reqinakuyanqäpita juk watallatam casakuriyarqä, y Irlanda del Nortipa Ballymena markanchömi precursor especialnö yanapakuyarqä.

Juk tiempupam Belfast, Londonderry markakunachö y juk markakunachö congregacionkunata watukar yanapakuyarqä. Tsë markakunaqa alläpa peligrösum karqan. Tsëchömi reqiyarqä Jehoväta sirwiyänanrëkur creenciankunata y chikikoq kayanqanta dejashqa wawqi panikunata. Alläpa markäkoq o yärakoq kayanqanta rikarqa espantakuyarqämi. Jehovämi pëkunata bendicikarqan y imëka mana allipitapis tsapëkarqanmi.

Irlandachömi 10 watapa karqä. Y 1981 watachönam, Galaad escuëlapa 72 cläsinman invitayämarqan. Escuëla ushariptinnam Siërra Leönaman mandayämarqan, tsë markaqa Africa Occidentalchömi këkan.

SIËRRA LEÖNA: POBRI KËKARPIS JEHOVÄMAN CONFIAKUYAN

Tsë markachöqa, juk wayillachömi 11 misionërukunawan kayarqä. Llapäkunam utilizäyaq kayä juk cocinata, kima bäñukunata, ishkë düchata, juk telëfunuta, juk lavadörata y juk secadörata. Luzqa cada rätum ëwakoq y wayipa tëchunchöqa mëtsika rätakunam kaq, y jawa kaq pïsumannam cobra nir reqiyanqan culebrakuna yëkayämoq.

Alli kawayänäpaq imëkäkuna mana kaptimpis, Diosnintsikpita yachatsikurmi kushishqa kayarqä. Nunakunaqa Bibliata respetayaqmi y yachatsiyaptïpis kushishqam wiyakuyaq. Mëtsikaqmi Bibliata estudiayarqan y Testïgu tikrayarqan. Tsëchöqa, “don Robert” niyämaqmi y Paulinetanam, “doña Robert” niyaq. Peru sucursalpaq maslla trabajarmi Diospita yachatsikoqqa alläpa yarqoqnatsu kä. Tsëmi Paulinetaqa “doña Pauline” nirna reqiyaq y noqatanam, “don Pauline” niyämaq. Paulinetaqa tsënö qayayaptin gustaqmi.

Tsë markachö wawqi panikunaqa pobrim kayaq, peru Jehovämi tariyänampaq yanapaq, höraqa mana creipaqnömi kaq (Mat. 6:33). Juk panipam wamrankunawan tsë junaq mikuyänanllapaq qellënin kapurqan. Peru malariawan qeshyëkaq wawqipa qellënin mana kaptinmi, jampim rantinampaq llapan qellëninta qarëkurqan. Peru tsë junaqllam tsë paniman juk warmi chärir aqtsanta peinapunampaq pagarirqan. Tsënö cäsukunaqa seguïdum pasakoq.

NIGERIA: JUK COSTUMBRITANA YACHAKÜ

Siërra Leönachöqa nuëvi watapam yanapakuyarqä. Peru tsëpitaqa Nigeria Betelchöna yanapakuyänäpaqmi niyämarqan. Tsë sucursalqa jatunmi karqan. Noqaqa Siërra Leönachö ruranqänöllam oficïnachö trabajaq kä, peru Paulinepaqqa manam yachakänan fäciltsu karqan. Pëqa Siërra Leönachö karqa 130 hörakunam yachatsikoq y mëtsikaqtam Bibliapita yachatseq, peru Nigeriachö karqa juk cuartullachömi röpakunata jirarnin kaq. Tsëmi yachakänanqa fäciltsu karqan. Peru tsëpitam entiendirirqan, llapan ruranqankunata wawqi panikunaqa alläpa agradecikuyanqanta. Tsëmi Betelchö yanapakoqkunataqa yanapakur sïguiyänampaq shumaq parlapaq.

Nigeriachöqa costumbrinkuna jukläyam kaq. Juk kutim, juk wawqi oficïnäman juk panita pushamurqan. Y makïwan saludanä këkaptinmi puntaman qonqurikuykurqan. Noqaqa mantsakarmi Hëchus 10:25 y 26 y Apocalipsis 19:10 ninqanta yarpärirqä. “¿Ima nïkütan?” nirmi pensarqä. Tsëpitanam kënö pensarirqä: “Biblia ninqankunata alli musyaptinchi Betelmanqa invitayämushqa”.

Ruranqan mana gustamashqa kaptimpis parlaparqämi, y ëwakuriptinnam imanir tsëta rurashqa kanqanta maslla musyapakurqä. Tsënam musyarirqä wakin markakunachöqa costumbrinkuna kaptin y respetakoq karnin tsënö rurayanqanta, y manam pitapis adorëta munartsu tsënö rurayänaq. Tsënö kanqantaqa Bibliapis ninmi (1 Sam. 24:8). Manaraq musyapakur imatapis nirqa, tsë panita llakiratsïmanchi karqan.

Nigeriachöqa Jehovä Diosman alläpa markäkoq wawqi panikunatam reqirqä. Jukqa karqan Isaiah Adagbonab jutiyoq wawqim. Pëqa jövin këkarmi Jehoväpita yachakushqa kanaq, y lepra qeshyayoq kaptinmi lepra qeshyayoqkuna kayanqan sitiuman apashqa kayänaq. Tsëchöqa pëllam Testïgu karqan. Yachatsikunanta michäkuykäyaptimpis, pëqa lepra qeshyayoq 30 nunakunatam yanaparqan Testïgu kayänampaq, y tsëchömi juk congregacion karqan.

KENIA: PACIENCIAWANMI TRATAYÄMARQAN

1996 watachönam niyämarqan Kenia Betelchöna yanapakunäpaq. Tsë nacionmanqa qallananchö willakunqänöpis, jövin këkarllam charqä y masqa manam ëwashqatsu karqä. Kenia Betelchöqa cercopiteco verdi niyanqan mönukunam kaq. Y panikunapa frütankunatam suwar ushayaq. Juk kutim, juk pani qonqëkur ventänanta kicharëkaqta dejarinaq. Chärinampaqqa, mëtsika mönukunam cuartunman yëkuykur llapan mikuyninta ushariyänaq. Paniqa rikëkur qayararqanmi, y qayaranqanta wiyëkurnam mönukunapis qayararnin ventänapa saltar ëwakuyarqan.

Kenia nacionchöqa suajïli idiömata parlaq congregacionchömi yanapakuyarqä. Y pöcu tiempullatam reunionchö librupita yachatsikunäpaq niyämarqan. Tsë reuniontaqa kananqa, Bibliapita Yachakunapaq nirmi reqintsik. Suajïli idiömata mana yacharmi reunionta diriginäpaqqa, tapukuykunata alli yachakoq kä. Y tapuptï qellqarëkanqantanö mana contestayämuptinqa, manam ni imata entiendeqtsu kä. Imata niyanqanta mana entiendirmi ima rurëtapis musyaqtsu kä. Tsënö kaptimpis, wawqi panikunaqa pacienciayoq y humildi karmi shumaq tratayämarqan.

ESTÄDUS UNÏDUS: IMËKAYOQ KARPIS JEHOVÄMANMI CONFIAKUYAN

Kenia nacionchöqa manam ni juk watapis kayarqätsu. 1997 watachömi, Nueva Yorkchö këkaq Brooklyn Betelchöna yanapakuyänäpaq niyämarqan. Tsëchö nunakunaqa imëkayoqmi kayaq (Prov. 30:8, 9). Imëkayoq karpis, wawqi panikunaqa Jehovämanmi markäkuyan o yärakuyan. Tiempunkunata y qellëninkunataqa manam rïcuyäyänampaqtsu utilizäyaq, sinöqa Jehoväta sirwiyänampaqmi.

Jehoväta sirwiyanqä watakunachöqa rikäyarqömi imëkapa pasarpis wawqi panikunaqa Jehovä sirwita mana dejayanqanta. Irlandachöqa nunakuna wanutsinakuyanqan sitiukunachömi kayaq, Africachönam alläpa karuchö y pobri kayaq y Estädus Unïduschönam imëkayoq kayaq. Tsënö karpis, Jehoväta sirwitaqa manam dejayaqtsu. Jehoväqa alläpachi kushikun imëkapa pasarpis kuyayanqanta rikarnin.

Watakunaqa Job 7:6 textuchö ninqannöpis, “telarwan awaq nunapa lanzadërampitapis mas rasmi o sasmi” pasarishqa. Kananqa, Nueva Yorkchö këkaq Warwick Betelchönam yanapakuyä. Gobernamaqnintsik Jesucristuta imëkanöpa yanapëqa alläpam gustayäman y kushishqam kayä. Reynintsik Jesucristuqa ichikllachönam pëta sirweq nunakunata bendicimunqa (Mat. 25:34).