Jehoväqa alläpam bendicimashqa

INGLATËRRA nacionchö këkaq Yorkshire provinciachömi 1923 wata yurikurqä. Mayor kaq turïpaqa Bobmi jutin karqan. 9 watayoqnöllaraq këkaptïmi, mana alli religionkuna nunakunata imanö engañanqanta rikätsikoq librukunata teytä leyirirqan y alläpam gustarqan, porqui pushakoq religiösukunapa mana alli portakïninkunatam pëqa chikeq. Juk ishkë watakuna pasariptinnam, wayïkunaman chäramurqan Bob Atkinson jutiyoq nuna y juk tocadiscuwanmi turi Rutherfordpa discursunta wiyaratsiyämarqan. ¡Teyta leyinqan librukuna ninqannöllam yachatsikïninqa kanaq! Tsënam teytäkunaqa tsë nunata kënö niyarqan: “¿Manatsuraq cada tardi meriendakunapaq shamunkiman, tsënöpa tapukïnïkunata Bibliawan contestayämänëkipaq?”. Y pënam invitayämarqan Hemsworth nishqan markachö rurayanqan reunionman. Karu këkaptimpis ëwarmi qallëkuyarqä, y juk congregacionmi formakärirqan. Y congregacionkunata watukaqkunata posadatsir y precursorkunata wayïkunaman mikoq invitarmi qallëkuyarqä. Pëkunawan juntu kayanqäqa alläpam yanapamarqan.

Familiäqa juk negociutam kichashqa karqan. Peru teytäqa turïtam kënö nirqan: “Precursor këta munaptikiqa kë negociuta jaqirishunmi”. Tsëmi turïqa 21 watayoq këkar precursornö yanapakoq ëwakurqan. Y ishkë watallatanam, 16 watayoq këkar noqapis precursöra tikrarirqä. Tocadiscuwan y tarjëta de testimonio nishqanwanmi yachatsikoq kä, y masqa japallällam yarqoq kä. Peru Jehoväqa bendicimarqanmi. Bibliapita yachatsinqä warmi y familiankunam Testïgu tikrayarqan. Y juk wata pasariptinqa precursöra especialmi nombrarayämarqan. Yanaqïqa Mary Henshall nanam karqan y Testïgukuna mana kanqan Cheshire markamanmi mandayämarqan.

Tsë witsanqa Ishkë kaq Jatun Guërram këkarqan y warmikunatapis tröpaman yanapakoq ëwayänäpaqmi niyämarqan. Wakin religionchö yachatsikoqkunataqa ëwayänampaq manam exigiyaqtsu, tsëmi noqakunapis llapan tiempükunawan Diospita yachatsikoq karnin exigiyämänantaqa pensayarqätsu. Peru manam tsënötsu karqan, sinöqa juk killapam carcelarätsiyämarqan. Y 19 watata cumplirirnam tröpaman ëwëta mana munar, ishkë cortikunaman ëwarqä, y ishkanchöpis concienciäta respetayarqanmi. Tsë tiempukunachöqa Jehovä alläpam yanapamarqan (Is. 41:10, 13).

JUK MUSHOQ YANAQIYOQ TIKRARÏ

1946 watam Arthur Matthewsta reqirirqä. Pëqa guërraman ëwëta mana munanqampitam carcelchö kima killa llawiränaq. Y tsëpita yarqaramurnam teytäkuna täräyanqan markachö precursor especialnö yanapakïkaq wawqin Dennis kaqta ëwakunaq. Pëkunataqa teytanmi Jehoväpita yachatsinaq y jövinllaraq këkarmi bautizakuyänaq. Peru wawqin Dennista Irlandachö yanapakunampaq mandariyaptinnam, japallanllana quedakunaq. Tsënam alli precursor kaptin teytäkunaqa wayïkunachö täränampaq invitayänaq. Wayïta visitakoq ëwaptïqa Arthurmi plätukunata awir yanapamaq. Y tiempuwanqa cartanakurmi qallëkuyarqä. 1948 watam Arthurtaqa kima killapa yapë carcelayarqan. Tsënö kaptimpis 1949 wata enëru killam casakuriyarqä. Y precursor këtaqa manam jaqita munayarqätsu. Tsëmi qellënïkunataqa llutaqa gastayaqtsu kayä. Y vacacionnïkunatam provechayaq kayä frütata pallapakurnin trabajayänäpaq. Jehovä yanapayämaptinmi precursornö yanapakurnin sïguiyarqä.

Tsëpita juk watatam Irlanda del Nortichö yanapakuyänäpaq niyämarqan. Puntataqa ëwayarqä Armagh markatam, tsëpitanam Newry markata. Tsëchö nunakunaqa cäsi llapanmi catölicu kayaq, y juk religionpita kaqtaqa chikipäyaqmi. Tsëmi Diospitaqa yachëllapa yachatsikuyaq kayä. Reunionkunataqa rurayaq kayä wayïkunapita 16 kilömetruchönö këkaq juk cristiänupa wayinchömi y puwaqnöllam ëllukäyaq kayä. Y tsëchö quedakurninqa patsachömi punuyaq kayä, peru qoyapaqa alli buënum desayünuta upuyaq kayä. Kananqa tsë sitiukunachöqa mëtsikaq testïgukunam kayan, tsëqa ¡alläpam kushitsiman!

“¡NOQAKUNA ËWAYÄSHAQ!”

Turïwan warmin Lottieqa, Irlanda del Nortichömi precursor especialnö sirwikäyarqan. Y 1952 wata Belfast markachö Jatun Asamblëamanqa juntum ëwayarqä. Posadatsiyämaq turiqa posadatsishqam kanaq Gran Bretañachö këkaq sucursalta rikaq Pryce Hughes turitapis. Y juk tardim parlayarqä Irlandachö täraq nunakunapaq yarqamushqa El camino de Dios es el de amor nishqan follëtupaq. Tsënam turi Hughesqa niyämarqan Irlanda nacionchö catölicukunaqa Diospita yachatsikïta mana chaskikuyanqanta, Testïgukunata posädankunapita qarquyanqanta y sacerdötikunana maqayänampaq nunakunata willapäyanqanta. Y tsëpitanam kënö nirqan: “Cärruyoq parëjakunatam wanayä jinantin Irlandapa ëwar tsë follëtuta repartikayämunampaq”.a Y qallananchö willakunqänöpis, “¡noqakuna ëwayäshaq!” niyarqämi.

Dublin markachöqa Rutland nanam, imëka mama cuenta precursorkunata imëpis posadatseq, y pë kaqchömi noqakunapis juk tiempupa quedakuyarqä. Tsëpitanam wakin cösasnïkunata rantikurirnin, turï Bobpa carrëtayoq mötunwan chuskükuna cärru ranteq ëwayarqä. Y mushoqta mana karpis alli cärrutam taririyarqä. Peru mëqäpis manejëta mana yacharmi, rantikayämaqnïkunata niyarqä wayïkunaman apamunampaq. Qowä Arthurqa, entëru tardim cämachö jamëkur manejëkaq cuenta practicarnin karqan. Waränin qoyanam Arthur cärruta jorqar afanakïkaptin, Mildred Willett misionëra chäramurqan. Pëqa manejëta yachanaqmi y jinan höram yacharatsiyämarqan. Rätuntaqa manejëta yachëkäyarqänam y ëwakuyänäpaq listunam këkäyarqä.

Tsëpitaqa, posädatanam ashiyäna karqan. Peru kënömi niyämarqan: “Cärruwan sutana wayichöqa ama quedakuyankitsu, porqui yachatsikuyänëkita chikikoqkunaqa rasllam kayariyanqa”. Tsëmi wayita ashiyarqä, peru mana tarirnam cärrullachö punuyarqä. Waräninnam cärruwan sutana llantayoq ishkë cämayoq taksha wayillata tariyarqä. ¡Tsëchömi taräyänä karqan! Wakinqa allim kayarqan, tsëmi permitiyämarqan wayïkunata chakrankunapa kuchunman cuadratsiyänäpaq. Y tsëchö wayïkunata jaqirirmi, yachatsikuyänäpaqqa 20 kilömetrutanö karuta ëwayaq kayä. Y wayïkunata juk läduman jorqarirnam, punta cuadraranqan sitiuman kutiyaq kayä yachatsikuyänäpaq.

Ëwayanqä markakunachöqa llapan nunakunamanmi chäyarqä, y 20 milpitapis mastam follëtukunata repartikuyarqä. Y Gran Bretäñachö sucursalmanmi yachakïta munaq nunakunapa jutinkunata mandayarqä. Kananqa mëtsika Testïgukunam kayan, y tsëtaqa alläpam kushikü.

INGLATËRRATA KUTIYÄ, TSËPITANAM ESCOCIATA

Juk ishkë watakuna pasariptinnam Londres markapa sur kaq lädumpa mandayämarqan. Y juk ishkë semänallatam Arthurtaqa sucursalpita qayariyarqan congregacionkunata watukar yanapakunampaq. Watukakunampaq juk semäna yacharatsirmi Escocia nacionchö congregacionkunata watukaq mandayämarqan. Tsëmi Arthurqa discursunta alleq preparakïtapis puëdirqannatsu, peru pëqa imatapis ruranampaqqa listum këkaq. Tsënö kanqanqa, ¡alläpam yanapamarqan! Mëtsika watakunapam Testïgukuna mana kanqan sitiukunachö kayarqä, tsëmi cristiänu mayïkunawan juntu këqa juk bendicion karqan.

1962 watam Arthurta invitariyarqan Galaad Escuëlaman. Tsë escuëlaqa chunka killataran ushaq y noqataqa manam invitayämarqantsu, tsëmi decidiyänäqa fäciltsu karqan. Peru kikillä mëtsika killakuna quedakunä kaptimpis, Galaad Escuëlaman Arthur ëwanampaqmi decidiyarqä. Tsëmi noqataqa yapë mandayämarqan Hemsworth markachö precursor especialnö yanapakunäpaq. Arthur kutiramuptin juk watallatanam Watukakoqkunata Rikaq kanampaq nombrariyarqan. Y asignacionnïkunaqa karqan Inglatërrapa uma kaq lädu, Escocia y Irlanda del Norte nacionkunam.

IRLANDACHÖ MAS CARGUKUNATA CHASKIYÄ

Arthurtaqa 1964 watam Irlandachö sucursalta rikänampaq nombrariyarqan. Congregacionkunata watukë y congregacionkunata watukaqkunata rikëqa alläpam gustayämarqan. Tsëmi Betelchö trabajëtaqa mantsapakurqä. Peru kananqa alläpam kushikü tsëchö trabajanqäpita y alleqmi cuentata qokurqö, gustuntsikpaq mana kaptimpis nimanqantsikta rurashqaqa Jehovä bendecimanqantsikta. Betelchöqa publicacionkunata paquetar, cocinar y limpiapakurmi trabajaq kä. Jina asamblëakuna kaptinqa congregacionkunata watukakoqkunata rikaqnömi yanapakuyarqä, y jinantin nacionchö mëtsika cristiänukunatam reqiyarqä. Jinamampis Bibliapita yachatsiyanqä nunakuna Jehoväta llapan puëdiyanqanmannö sirwikaqtam rikäyarqä. Y Irlandachö cristiänu mayintsikkunawanqa juk familianöllam tikrayarqä. ¡Tsëqa jatun bendicionmi kashqa!

IRLANDACHÖ IMËPIS MANA RIKÄYANQAN PASAKUN

Irlandachöqa 1965 watam Dublin markachö juk jatun asamblëa rurakarqan y 3.500 Testïgukunam më tsë nacionpita ëwayarqan.b Tsë asamblëa rurakänanta michäkïkäyaptimpis alläpa allim yarqurqan. 3.948 nunakunam ëllukäyarqä y 65 nunakunam bautizakuyarqan. Juk nacionpita ëwaqkunataqa, Dublin markachö vecïnukunam posadatsiyarqan. Tsëmi agradecikurnin pëkunaman cartata mandayarqan. Y vecïnukunaqa Testïgukuna alli portakushqa kayanqantam niyarqan. Tsë asamblëaqa Irlandachö nunakuna allipana rikämänapaqmi yanapakurqan.

República de Irlandawan Irlanda del Nortiqa polïtica y religionrëkurmi chikinakuyaq. Peru Testïgukunaqa 1966 watam Irlanda del Nortitapis Dublin markachö këkaq sucursalna atiendinampaq patsäratsiyarqan. Mëtsikaq catölicukuna y juk religionchö kaqkunapis Testïgu tikrarirnin juk shonqulla Jehoväta sirwiyanqanta rikëqa, ¡alläpa kushikïpaqmi karqan!

KAWËNÏKUNA CAMBIARIN

2011 watachömi kawënïkuna cambiarirqan. Dublinchö këkaq sucursalmi Londres sucursalwan juntakarqan, tsëmi tsë Betelmanna mandayämarqan. Tsë witsanqa Parkinson qeshyawan Arthur qeshyaptinmi alläpa yarpachakïyoq këkarqä. Kuyashqa qowäqa 2015 wata 20 de mäyum wanukurqan. Pëwanqa 66 watapam Jehoväta juntu sirwiyarqä.

Kë qepa watakunaqa alläpa llakikïpaqmi kashqa. Qowätaqa alläpam llakï. Peru tsënö llakikïkunapa pasarninqa Jehoväwanmi mas amïgu tikrantsik. Jina mëtsika cristiänukuna Arthurta kuyashqa kayanqanta musyëmi alläpa shoqaman. Irlandapita, Gran Bretañapita y Estädus Unïduspitam shumaq cartakunata chaskirqö. Jina Arthurpa wawqin Dennis, warmin Mavis y sobrinäkuna Ruthwan Judy animayämanqanqa alläpam yanapamashqa. Y tsëtaqa, ¡alläpam agradecikü!

Isaïas 30:18 textum alläpa yanapaman y kënömi nin: “Peru Jehoväqa listum këkanqa yanapayäshunëkipaq y llakipäyäshunëkipaq. Porqui Jehoväqa justiciata ruraq Diosmi. Kushishqam kayan imë hörapis pëman confiakoq kaqkunaqa”. Llapan problëmantsikkunata altsaramunampaq kaqta y shumaq trabäjuta Jehovä qomänapaq kaqta musyëqa alläpam shoqaman.

Llapan rurayanqäman pensarqa, clärum rikäri, Irlanda nacionchö yachatsikïta kikin Jehovä diriginqanta y bendicinqanta. Alläpam kushikü puëdinqämannö yanapakunqäpita. Awmi, nimanqantsikta rurashqaqa Jehoväqa bendicimantsikmi.