Kuyakoq kashun y yachatsikuyta dejashuntsu

1. ¿Imatataq entienditsikayämurqan 2023 wata rurakaq reunionchö?

JEHOVÄPA Testïgunkunata Pushaqkuna 2023 watachö rurayanqan reunionqaa, ¡alläpa shumaqmi karqan! Tsë reunionchömi entienditsikayämurqan wakin creinqantsikkunata juknöpana entiendinqantsikta y Diosnintsikpita yachatsikunqantsiktapis juknöpana informanapaq kaqta. Këllaman pensarishun: entienditsikayämurqanmi alläpa sufrimientu witsanchö Alläpa Puëdeq Babiloniata ushakätsiyaqta rikarqa, wakin nunakuna Jehoväman creikuyta puëdiyänampaq kaqta. Y 2023 wata noviembri killapitaqa, Diosnintsikpita yachatsikunqantsikta jukläyana informanapaq kaqta. Jukläyana informanqantsikqa, ¿yachatsikunantsik alläpa mana precisanqantaku rikätsikun? ¡Manam!

2. ¿Imanirtan kanan tiempuqa masraq yachatsikunantsik? (Marcus 13:10).

² Cada junaq pasaptinmi ushakëqa masna chäramun, tsëmi yachatsikunantsikqa alläpa urgenti. Pensarishun Marcus 13:10 (leyiri) textuchö kë ushanan tiempukunachö yachatsikunantsikpaq kaqta Jesus ninqanman. Marcuschö ninqannöllam, Mateuchöpis Jesus nirqan “ushakë” manaraq chämuptin entëru Patsachö yachatsikunantsikpaq kaqta (Mat. 24:14). Ushakë nirqa, Satanaspa makinchö këkaq nunakuna ushakäyänan tiempupaqmi nikarqan. Y Jehoväqa musyannam “imë junaq y imë höra” ushakätsinampaq kaqta (Mat. 24:36; 25:13; Hëch. 1:7). Y tsë junaqqa cada junaq pasaptinmi masna chäramun (Rom. 13:11). Peru ushakë manaraq chämunqanyaqqa, mana dejëpam yachatsikunantsik.

3. ¿Imanirtan Diosnintsikpita yachatsikuntsik?

³ ¿Imanirtan nunakunataqa Diospita yachatsintsik? Kuyarninmi. Yachatsikurninqa alli noticiakunata, nunakunata, Jehoväta y jutinta kuyanqantsiktam rikätsikuntsik. Tsëta yachakurishun.

ALLI NOTICIAKUNATA KUYARNINMI YACHATSIKUNTSIK

4. Juk alli noticiata wiyarirqa, ¿imatataq rurëta munantsik?

⁴ Këllaman pensarishun: ¿Imanötan sientikurqëki ashikanqëki trabäjuta tariskir o llulluyoq kanqanta juk familiëki willarishuptiki? Alläpa kushikurchi pïmëta willakurqëki. Tsënöllachi Diospa Gobiernumpita alli noticiakunata yachakurirpis, alläpa kushikurnin pïmëta willëta munarqëki.

5. Bibliapita yachakur qallarnin, ¿imanötan sientikurqëki? (Rikäri fötukunata).

⁵ Kananqa yarpäri Bibliapita yachakur qallar imanö sientikunqëkiman. ¿Manaku alläpa kushikurqëki Jehovä kuyashunqëkita, familianchö kanëkita munanqanta, imëka sufrimientukunata ushakätsinampaq kaqta y wanushqa familiëkikunata Shumaq Patsachö kawaritsimunampaq kaqta musyarir? (Mar. 10:29, 30; Juan 5:28, 29; Rom. 8:38, 39; Apo. 21:3, 4). Tsë yachakunqëkikunaqa shonquykiyaqchi chärirqan (Lüc. 24:32). Tsë yachakunqëkikunataqa alläpachi kuyarqëki y pïmëtachi willakuyta munarqëki (igualaratsi Jeremïas 20:9 textuwan).

6. ¿Imatataq yachakuntsik Ernest-tawan warmin Roseta pasanqampita?

⁶ Ernestb jutiyoq wawqintsikta pasanqanta parlarishun. Pëqa cuentakun 10 watayoq këkaptin papänin wanukunqantam. Kënömi nin: “Noqaqa kënömi pensaq kä: ‘¿Papänïqa ciëlutatsuraq ëwakushqa, o chipyëpatsuraq ushakashqa?’. Papäyoq wamrakunataqa alläpam chikipaq kä”. Ernestqa cada junaqmi pantiunta ëwarnin papänin pamparanqanman qonqurikuykur kënö mañakoq: “Teyta Dios, papänï mëchö këkanqanta willëkallämë”. Peru 27 watayoq këkaptinmi, Bibliapita yachatsir qallëkuyarqan. Y alläpam kushikurqan, wanushqakunaqa imëka punoq cuenta imatapis mana musyayanqanta y kawariyämunampaq kaqta musyarir (Ecl. 9:5, 10; Hëch. 24:15). ¡Alläpa yarpachakurnin tapukunqankunapa respuestankunatam musyarirqan! Bibliata estudiarnin imëkata yachakurninqa alläpam kushikurqan. Tsëmi warmin Rosepis pëwan juntu Bibliapita yachakur qallëkurqan. Y 1978 watachömi bautizakuyarqan. Y alläpa kushikurmi familiankunata, amïgunkunata y wakin nunakunatapis parlapäyarqan. Y 70 nunakunatam yanapayarqan Jehoväpita yachakuyänampaq y bautizakuyänampaq.

7. Yachakunqantsikkunata kuyarqa, ¿imataraq rurëta puëdishun? (Lücas 6:45).

⁷ Yachakunqantsikkunata kuyarninqa, pïmëtam fäcil-lla parlapëta puëdishun (leyi Lücas 6:45). Punta cristiänukunanömi sientikuntsik. Pëkunam kënö niyarqan: “Manam rikäyanqäpita ni wiyayanqäpita parlëta dejëta puëdiyätsu” (Hëch. 4:20). Rasumpa kaqta yachakunqantsikkunataqa alläpam kuyantsik y pïmëtam parlapëta munantsik.

NUNAKUNATA KUYARNINMI DIOSPITA YACHATSIKUNTSIK

8. ¿Imanirtan nunakunataqa alli noticiakunapita yachatsintsik? (Leyiri “Kuyakoq karmi nunakunata yachatsintsik” neq recuadruta; rikäri fötuta).

⁸ Jehovänö y Jesusnömi nunakunata kuyantsik (Prov. 8:31; Juan 3:16). Nunakuna Jehoväta mana reqiyaptin y änikunqankunata mana musyayaptinqa llakipantsikmi (Efes. 2:12). Pëkunaqa imëka problëmakunapa pasarnimpis, manam ima rurëta puëdiyantsu. Peru noqantsikmi Diosnintsikpa Gobiernumpita yachatsirnin yanapëta puëdintsik. Kuyakoq y ankupäkoq karninmi tukuynöpa kallpachakuntsik yachatsinantsikpaq. Yachatsinqantsikqa imëkapitapis masmi välin, tsëta yachakurmi nunakunaqa kushishqa këta puëdiyanqa y Shumaq Patsachöpis alli kawakuyta puëdiyanqa (1 Tim. 6:19).

9. ¿Imatataq nunakunata musyatsita munantsik, y imanirtan musyayänanta munantsik? (Ezequiel 33:7, 8).

⁹ Tsënöllam kuyakoq karnin mana alli nunakuna ushakäyänampaq kaqta nunakunata musyatsita munantsik (leyi Ezequiel 33:7, 8). Markantsikchö nunakuna y familiantsikkunaqa ushakë chämunampaq kaqta mana musyarmi tranquïlu kawakuyan, tsëta rikarqa alläpam llakikuntsik. Mateu 24:21 textuchömi kënö nin: “Tsë witsanqa alläpa sufrimientum kanqa. Tsënö sufrimientuqa manam nunakuna kawar qallanqampita kashqaraqtsu, y manam yapëqa kanqanatsu”. Tsë sufrimientu tiempuchö imakuna pasakunampaq kaqtam nunakunata musyatsita munantsik. Tsë tiempuchöqa, puntataqa mana alli religionkunam ushakäyanqa, y tsëpitanam Armagedonchö llapan mana alli nunakuna ushakäyanqa (Apoc. 16:14, 16; 17:16, 17; 19:11, 19, 20). Jehovätam rogakuntsik parlapanqantsik nunakunata yanapëkunampaq, tsënöpa wiyakuyänampaq y noqantsikwan juntu pëta sirwiyänampaq. Peru parlapëkashqapis mana wiyakoq nunakunata y familiantsikkunataqa, ¿imaraq pasanqa?

10. ¿Imanirtan kananqa imëpitapis mas yachatsikunantsik?

¹⁰ Pasaqchö yachakunqantsiknöpis, capazchi Alläpa Puëdeq Babiloniata ushakätsiyaqta rikarninraq cambiaq nunakunata Jehovä Diosqa salvanqa. Tsënö kanan kaptinqa, masmi kanan tiempu yachatsikunantsik. Këman pensarishun: capaz wakin nunakunaqa kanan tiempu parlapanqantsikkunata yarpäyanqa (igualaratsi Ezequiel 33:33 textuwan). Capazchi parlapanqantsikkunata yarparnin wakin nunakunaqa noqantsikwan juntu Jehoväta sirwiyänampaq noqantsikman juntakäyämunqa. Filïpuschö carcelta cuidaq nunaqa alläpa fuertipa patsa kuyuptinran Jehoväman creikurqan, capazchi alläpa sufrimientu witsanchöpis wakin nunakunaqa Alläpa Puëdeq Babiloniata ushakätsiyaqta rikarninraq Jehoväman creikuyanqa (Hëch. 16:25-34).

JEHOVÄTA Y JUTINTA KUYARNINMI YACHATSIKUNTSIK

11. ¿Imanötan rikätsikuntsik Jehoväta punta puntaman churanqantsikta y respetanqantsikta? (Apocalipsis 4:11; rikäri fötukunata).

¹¹ Masqa nunakunata yachatsintsik Jehoväta y jutinta kuyarninmi. Yachatsikurninqa Diosnintsiktam alabëkantsik. Jehovällam derëchuyoq punta puntaman churanapaq, respetanapaq y poderyoq kanampaq (leyi Apocalipsis 4:11). ¿Imanötan Diosnintsiktaqa punta puntaman churantsik y respetantsik? Imëkatapis kamanqanta y noqantsiktapis kamamanqantsikta llapan nunakunata willarninmi. Tsënöllam yachatsikunantsikpaq tiempuntsikta rakintsik, kallpantsikwan y imëkantsikwan puëdinqantsikmannö yanapakuntsik (Mat. 6:33; Lüc. 13:24; Col. 3:23). Diosnintsikpita yachatsikuyqa alläpam gustamantsik. Tsënöllam jutimpita y jutin ima ninan kanqantapis nunakunata yachatsita munantsik.

12. ¿Imakunatataq rurantsik Jehoväpa jutin respetashqa kanampaq?

¹² Jehoväta kuyarninmi jutin respetashqa kananta munantsik (Mat. 6:9). Satanasqa imëkatam Jehoväpaq ulikushqa o llullakushqa, tsëmi jutinta respetatsita munantsik (Gen. 3:1-5; Job 2:4; Juan 8:44). Tsëmi nunakunata rasumpa kaqta yachatsirninqa, Jehoväpa jutin respetashqa kanampaq yanapakuykantsik. Llapan nunakunatam musyatsita munantsik Jehovä Diosqa kuyakoq kanqanta, alli gobernanti kanqanta, ichikllachöna imëka sufrimientukunata ushakätsinampaq kaqta y llapan nunakuna yamë y kushishqa kawakuyänampaq kaqta (Sal. 37:10, 11, 29; 1 Juan 4:8). Tsëta rurarninmi, Jehovä Diosnintsikpa jutin respetashqa kanampaq yanapakuykantsik. Jina tsëta rurarninmi, Jehoväpa testïgun kanqantsikta alli cumplikantsik. ¿Imanirtan tsënö nintsik?

13. ¿Imanirtan Jehoväpa testïgun kanqantsikpitaqa alläpa kushikuntsik? (Isaïas 43:10-12).

¹³ Noqantsiktam Jehoväqa testïgun kanantsikpaq akramarquntsik (leyi Isaïas 43:10-12). Jehoväpa Testïgunkunata Pushaqkunam unëna cartakayämunqanchö kënö niyämurqan: “Jehoväpa testïgunnö reqishqa këqa, manam imawampis igualantsu”.c Tsëta entiendirinapaq këman pensarishun: juk nuna mana kaqpita acusamashqantsik kaptin juiciuchö këkashwan. ¿Imanö nunataraq akrashwan defendimänantsikpaq? Capazchi akrashwan reqinqantsik, confiakunqantsik y llapankunapis respetayanqan nunata, tsënöpam llapan ninqankunata creiyanqa. Tsënöllam Teytantsik Jehoväpis noqantsikta akramarquntsik Testïgun kanantsikpaq. Y ¿imanirtan akramarquntsik? Noqantsikman confiakurninmi. Tsëmi noqantsikpaqqa, Jehoväpa testïgun këqa alläpa shumaq. Y jutimpaq imëka mana allikunata parlayanqampitam rasumpa kaqta willakurnin defendita puëdintsik. Tsënömi Jehoväpa testïgun kanqantsiktaqa alli cumplikantsik (Sal. 83:18; Rom. 10:13-15).

USHAKË TIEMPUYAQ YACHATSIKURNIN SÏGUISHUN

14. ¿Imakuna pasakunan tiemputataq shuyarëkantsik?

¹⁴ ¡Imëka pasakunqankunata rikänantsik tiempuqa chäramunqanam! Alläpam shuyarëkantsik alläpa sufrimientu manaraq qallaptin rasumpa kaqta yachakurnin nunakuna Jehoväman creikuyänanta. Y alläpa sufrimientu witsanchöpis, capazchi wakin nunakunaqa Satanaspa mundunta dejarir Jehoväta alabar qallëkuyanqa. Tsëta rikëqa, ¡alläpa kushikuypaqmi kanqa! (Hëch. 13:48).

15, 16. ¿Imatataq rurar sïguinantsik, y imëyaqtan ruranantsik?

¹⁵ Peru tsë tiempu chämunqanyaqqa, Diospa Gobiernumpitam entëru Patsachö nunakunata yachatsirnin sïguinantsik. Kë trabäjutaqa manam yapëqa rurashunnatsu. Tsënöllam, kë mana alli mundu ushakänampaq kaqta nunakunata cläru entienditsinantsik. Nunakunata Jehovä juzganqan tiempuchöqa, nunakunaqa cuentatam qokuyanqa Jehovä mandamashqantsik kaptin yachatsikushqa kanqantsikta (Ezeq. 38:23).

¹⁶ Tsëqa, ¿imatataq rurar sïguinantsik? Alli noticiakunata, nunakunata, Jehoväta y jutinta kuyarninmi mana dejëpa kushishqa yachatsikurnin sïguinantsik. Tsëtaqa ruranantsik kikin Jehovä, “¡amana yachatsikuyënatsu!” nimanqantsikyaqmi.