“Teyta Diospa palabranta cäsukuyë”

1, 2. ¿Imanirtan Jehoväpa sirweqninkunaqa kushishqa kawakuntsik? (Santiägu 1:22-25).

JEHOVÄWAN kuyë Tsurin Jesusqa kushishqa kawakunatam munayan. Salmus 119:2 textuta qellqaq nunam kënö nirqan: “Teyta Dios consejaptin cäsukoqkuna y yachatsinanta llapan shonqunkunawan asheqkunaqa kushishqam kayan”. Y Jesuspis kënömi nirqan: “¡Diospa palabranta wiyaqkuna y cäsukoqkunam kushishqaqa kayan!” (Lüc. 11:28).

² Jehoväpa sirweqninkunaqa kushishqam kawakuntsik. Tsënö kawakunapaqqa imëkam yanapamantsik. Peru masqa yanapamantsik Diospa Palabranta cada junaq leyinqantsik y yachakunqantsiknö kawanapaq kallpachakunqantsikmi (leyi Santiägu 1:22-25).

3. ¿Imanötan yanapamantsik Diospa Palabranta cäsukunqantsik?

³ ¿Imanötan yanapamantsik Diospa Palabranta cäsukunqantsik? Juk, Diosnintsiktam kushitsintsik y kushishqa kanqanta musyarmi noqantsikpis kushikuntsik (Ecl. 12:13). Ishkë, Diospa Palabranta cäsukunqantsikmi yanapamantsik familiantsikwan alli kawakunapaq y wawqi panikunawan alli amïgu kanapaq. Tsënö kanqantaqa qampis cuentata qokurqunkinachi. Y kima, Diospa leyninta mana cäsukuyanqanrëkur wakinkuna pasayanqan problëmakunapaqa manam pasantsiktsu. Tsëmi gobernanti Davidpis juk cancionchö Diospa leynimpaq, mandakunqankunapaq y juzgarnin decidinqankunapaq parlarirnin kënö nirqan: “Cäsukoqkunaqa, mëtsika bendiciontam chaskiyan” (Sal. 19:7-11).

4. ¿Imanirtan Diospa Palabran ninqannö kawananqa fäciltsu?

⁴ Tsënö kaptimpis, Diospa Palabran ninqannö kawananqa manam fäciltsu. ¿Imanir? Tsënö kawanapaqqa Bibliatam leyinantsik y leyinqantsikman pensanantsik; tsëran yanapamäshun Jehovä mandakunqankunata entiendinapaq. Peru rasumpa kaqchöqa, Bibliata leyinapaq tiemputa rakinanqa manam fäciltsu. Tsëmi këchöqa yachakushun Bibliata cada junaq leyinantsikpaq, leyinqantsikman pensanantsikpaq y yachakunqantsiknö kawanantsikpaq imakuna yanapamänapaq kaqta.

DIOSPA PALABRANTA LEYINËKIPAQ TIEMPUYKITA RAKI

5. ¿Ima rurëkunachötan ocupädu kantsik?

⁵ Diospa sirweqninkunaqa cäsi llapantsikmi imëka rurëchö ocupädu kantsik. Y llapantsikmi Jehovä mandakunqanta cumplinapaq kallpachakuntsik. Këkunallaman pensarishun: cäsi llapantsikmi gastuntsikkunapaq y familiantsikkunata manteninapaq trabajantsik (1 Tim. 5:8). Llapantsikmi imallawampis qeshyantsik, tsëmi doctorkunaman ëwanapaq tiempuntsikta rakinantsik. Wakinkunanam qeshyëkaq o edäna familiankunata cuidayan. Congregacionchömi yanapakuntsik y Diosnintsikpitam yachatsikuntsik. Tsënö imëka rurëyoq ocupädu karqa, capazchi kënö pensashwan: “¿Imanötan tiemputa rakïman Bibliata leyinäpaq, leyinqäman pensanäpaq y yachakunqänö ruranäpaq?”.

6. ¿Imatataq rurashwan Bibliata cada junaq leyinapaq? (Rikäri fötuta).

⁶ Bibliata leyitaqa manam pöcu cäsupaqqa churanantsiktsu, tsëpa rantinqa cada junaq leyinapaqmi kallpachakunantsik (Filip. 1:10). Salmus libruchömi nin kushishqa nunaqa ‘Diospa leyninta’ cäsukunqanta, paqasta junaqta leyinqanta y leyinqanman pensanqanta (Sal. 1:1, 2). Tsëwanmi entienditsimantsik Diospa Palabranta leyinanqa alläpa precisanqanta. Y noqantsikpaqqa, ¿imë höratan mas alli kanman Bibliata leyinapaq? Tsëtaqa cada ünum rikänantsik. Peru cada junaq leyinantsikpaqmi tiempuntsikta alli patsätsinantsik. Victor jutiyoq wawqim kënö nin: “Noqataqa qoyakunapam o wärëkunapam Bibliata leyiqa gustaman. Tempränulla shärikuyqa manam fäciltsu, peru tsë hörakunaqa manam bülla kantsu y manam utishqatsu o pishipashqatsu këkä. Tsëmi Bibliata leyirqa, alli entiendita puëdï”. Rasun kaqllatam Victorqa nin. Tsëmi qampis kënö pensanëki: “Noqapaqqa, ¿imë höratan Bibliata leyi mas alli kanman?”.

LEYINQËKIMAN PENSË

7, 8. Bibliata leyirninqa, ¿imapitataq cuidakunantsik? Juk ejempluwan willakaramuy.

⁷ Peru Bibliata imë höra leyinantsikpaq tiempuntsikta patsäratsirqa, ¿imapitataq cuidakushwan? Janan jananlla leyipitam. Cada junaqmi imëkata leyintsik y höraqa alläpa atskata leyishqa karmi leyinqantsikkunata yarpantsiknatsu. Bibliata leyikashqa tsënö pasamashqaqa, manam allitsu kanman. Ëka capïtuluta cada junaq leyinantsikpaq pensanqantsik y cumplinapaq kallpachakunqantsikqa allim (1 Cor. 9:26). Peru yarpänantsikmi leyinqantsikllawanqa llapanta mana entiendinapaq kaqta. Tsëqa, ¿imatataq rurashwan alli entiendinapaq?

⁸ Këman pensarishun: tamyaqa alläpam yanapakun plantakuna winanampaq, wayunampaq y mana tsakinampaq. Peru juk rätulla alläpa tamyamunqanqa, ¿allitsuraq kanman? Manam. Jananllatam yaku ëwarinqa y manam plantakunataqa alliqa yanapanqatsu. Tsëqa, ¿imatan mas alli kanman? Pöcu pöculla y seguïdu tamyamunqanmi. Tsënöpam yakuqa patsa rurinman mas yëkunqa y plantakunatapis mas alli yanapanqa. Tsënöllam Bibliata leyinqantsikwampis pasakun. Alläpa atskata leyirqa manam entiendishuntsu, rasllam qonqarishun y manam Dios munanqannö kawanapaq yanapamäshuntsu (Sant. 1:24).

9. ¿Imatataq rurashwan Bibliata apurädu leyita yachakashqa karqa?

⁹ Kananqa këman pensarishun: Bibliata leyikarnin cuentata qokurinkiman alläpa ras o sas leyikanqëkita. ¿Imataraq rurankiman? Tsëqa, leyïkanqëkiman pensanëkipaqmi mas despaciulla leyinëki. Leyinqëkiman pensëta mana puëdirqa ama yarpachakuytsu, tsëpa rantinqa estudianëkipaq maslla tiempuykita raki y wallka versïculukunallata leyi. Tsëmi yanapashunki estudianqëkiman pensanëkipaq. Seis kaq pärrafuchö parlanqantsik Victormi kënö nin: “Wallka versïculukunallata o juk capïtulullata leyinäpaqmi kallpachakü. Y qoyalla o wärëlla leyishqa karmi leyinqäkunaman entëru junaq pensëta puëdï”. Mëtsikata leyinqantsikpitaqa mas alliqa kanqa pöcu pöculla leyinqantsik y imanö yanapamänapaq kaqman pensanqantsikmi (Sal. 119:97; leyiri “Leyinqëkiman pensanëkipaq tapukuykuna” neq recuadruta).

10. ¿Imatan yanapashunki Biblia ninqannö kawanëkipaq? Juk ejempluwan willakaramuy (1 Tesalonicensis 5:17, 18).

¹⁰ Imë höra o ëka tiempupa Bibliata leyirpis, yachakunqëkinö kawanëkipaqmi kallpachakunëki. Juk ishkë versïculukunata leyikarnin, kënö pensë: “¿Imanötan kanampis o shamoq tiempuchöpis këchö ninqanta cumplïman?”. Pensari 1 Tesalonicensis 5:17 y 18 (leyi) textuta leyïkanqëkiman. Tsë versïculukunata leyirir kënö pensë: “¿Imanötan Diosman mañakü? ¿Llapan shonqüwanku y seguïduku mañakü? ¿Imakunapaqtan agradecikü?”. Tsënö pensarir capazchi kima cösaskunapaq agradecikuyta munanki. Juk ishkë minütukunallapis tsë kimankunaman alli pensarninqa, yachakunqëkinö kawanëkipaqmi kallpachakuykanki. Y cada junaq Bibliata leyirnin tsëta rurarqa, tiempuwanqa Jehoväpa alli sirweqninmi tikranki. Peru imëkachöpis mas alliyänëki pishinqanta cuentata qokurqa, ¿imatataq rurankiman?

RURËTA PUËDINËKIPAQ KAQKUNALLAWANRAQ QALLË

11. ¿Imanirtan höraqa Bibliata leyita qelanäkurishwan? Juk ejempluwan willakaramuy.

¹¹ Imëkakunachö cambiukunata ruranëki pishinqanta cuentata qokurqa, capazchi Bibliata leyita qelanäkurinkiman. Këllaman pensari: juk junaq leyirinkiman wakin wakinllata allipa tratëqa mana alli kanqanta (Sant. 2:1-8). Y cambiuta ruranëkipaq decidinkiman. ¡Tsëqa alläpa allim! Waräninna leyirinkiman pipaqpis lluta parlëqa mana alli kanqanta (Sant. 3:1-12). Y cuentata qokurinkiman wakinkunapaq mana allita parlashqa kanqëkita y mana alli tratashqa kanqëkita. Tsëna decidirinkiman wakinkunapaq allillatana parlanëkipaq y pitapis kuyëpa parlapänëkipaq. Y kima kaq junaqchöna, leyirinkiman Diosta mana cäsukoq nunakunawan amïgu këqa mana alli kanqanta (Sant. 4:4-12). Y decidinkiman mana alli pelïculakunata y mana alli cancionkunata rikëpita y wiyëpita cuidakunëkipaq. Y chusku kaq junaqchöqa, imëkakunachö cambiukunata ruranëki pishinqanta musyarnin capaz Bibliata leyita munankinatsu.

12. Cambiukunata ruranëki faltanqanta cuentata qokurqa, ¿imanirtan qelanäkurinëkitsu? (Rikäri nötata).

¹² Cambiukunata ruranëki faltanqanta cuentata qokurqa, ama qelanäkuritsu. Cuentata qokunqëkiqa rikätsikun humildi kanqëkita, alli kaqta rurëta munanqëkita y Dios munanqannö kawakuyta munanqëkitam.a Y yarpänëkim, “jukläya nunana” kanëkipaqqa cada junaqmi kallpachakunëki (Col. 3:10). Peru ¿imaraq yanapashunki Diospa Palabran ninqannö kawakunëkipaq?

13. Diospa Palabran ninqannö kawanëkipaqqa, ¿imaraq yanapashunki? (Rikäri fötukunata).

¹³ Bibliata leyirnin llapan yachakunqëkita rurëta procuranëkipa rantin, rurëta puëdinëkipaq kaqkunallawanraq qallë (Prov. 11:2). Capaz këta ruranqëki yanapashunki: imakunachö mas alliyänëki pishinqankunata juk listaman churë y tsë listapitana jukta o ishkëta akrë puntata cumplinëkipaq, y wakintaqa tsëpitanam cumplinki. Peru ¿imanötan qallankiman?

14. ¿Imanötan cambiukunata rurëta qallankiman?

¹⁴ Puntataqa, fäcil-lla cumplita puëdinëkipaq kaqkunawan o imachöpis alliyëta mas wananqëki kaqkunawan qallë. Imakunachö alliyëta munanqëkita musyarninqa tsë asuntupaq parlaq publicacionkunata o Índice de las publicaciones Watch Tower o Jehoväpa testïgunkuna yachakur ashinapaq neq librukunachö ashi. Tsëpitana Jehovä Diosnintsikman mañakuy ruranëkipaq gänasniki kanampaq y ruranëkipaq kaqkunachö yanapashunëkipaq (Filip. 2:13). Tsëpitana yachakunqëkinö kawar qallë. Cambiukunata rurëta puëdinqëkita cuentata qokurqa, mas cambiukunatapis ruranëkipaqmi gänasniki kanqa. Y cambiukunata ruranqëkikunanam yanapashunki listachö këkaq wakin pishinqankunatapis ruranëkipaq.

DIOSPA PALABRAN YANAPASHUNËKITA PERMITI

15. Bibliata leyeq wakin nunakunapitaqa, ¿imachötan Diospa sirweqninkuna jukläya kantsik? (1 Tesalonicensis 2:13).

¹⁵ Wakin nunakunaqa niyan Bibliata mëtsika kuti leyishqa kayanqantam. Peru ¿Biblia ninqanmanqa creiyanku? ¿Biblia ninqannöku kawakuyan? Rasumpa kaqchöqa, cäsi llapan nunakunam Biblia ninqannötsu kawayan. Peru Jehoväpa sirweqninkunaqa, jukläyam kantsik. Punta cristiänukunapaqnöpis noqantsikpaqqa, Bibliaqa ‘Diospa Palabranmi’. Tsëmi Biblia ninqannö kawakunapaq kallpachakuntsik (leyi 1 Tesalonicensis 2:13).

16. ¿Imaraq yanapashunki Diospa Palabran ninqannö kawakunëkipaq?

¹⁶ Bibliata leyi y ninqannö kawëqa, höraqa manam fäciltsu. Capazchi tiemputa tarinkimantsu Bibliata leyinëkipaq o leyirpis alläpa ras o sas leyirnin entiendinkimantsu. O capaz atska cambiukunata ruranëki pishinqanta cuentata qokur qelanäkurinkiman. Imanö kaptimpis, Jehovä Diosnintsikmi yanapashunki. Tsëmi yanapashunëkita permitinëki, ama Bibliata leyirinqëkillawanqa conformakuytsu. Tsëpa rantinqa, yachakunqëkinö kawëta procurë. Yarpë, Bibliata cada junaq leyir y mandakunqannö kawarqa, kushishqam kawakunki (Sant. 1:25).