¿Imatataq rurashwan imapitapis mana següru karqa?

1, 2. (1) ¿Imakunapitaraq segürutsu kashwan? (2) ¿Imatataq këchö yachakushun?

LLAPANTSIKMI höraqa imapitapis segürutsu kantsik. Këllaman pensarishun: capaz juk jövin pensanman Jehovä mana kuyanqanta, y tsënö pensarnin bautizakuyta decidinmantsu. O capaz juk wawqi, jövin këninchö qellëta mas gananampaq trabajanampa rantin, Jehoväta sirwinampaq decidirqan. Peru kanan familiayoq karqa faltapakun, tsëqa capazchi kënö pensanman: “Jövin këkar decidinqäqa, ¿allitsuraq kashqa?”. O capaz juk mayorna pani puntatanöna Jehoväpaq rurëta mana puëdir pensanman, “¿Jehoväpaqqa sirwïraqtsuraq?” nirnin. Y qamqa, ¿imëllapis pensarqunkiku, “¿Noqataqa Jehovä kuyamantsuraq? ¿Jehoväta sirwinäpaq decidinqäkunaqa allitsuraq kashqa?” O “¿Jehoväta sirwinäpaq välïraqtsuraq?” nirnin?

² Tsënö pensarninqa, capazchi Jehoväman markäkushwannatsu o yärakushwannatsu y hasta Jehovä sirwitam dejarishwan. Tsëmi këchöqa yachakushun Jehovä kuyamanqantsikta, pëta sirwinantsikpaq decidinqantsikkuna alli kanqanta y Jehoväpaq alläpa välinqantsikta. Tsëta següru kanantsikpaqmi Bibliawan yachakurishun.

¿IMATATAQ RURASHWAN IMAPITAPIS MANA SEGÜRU KARQA?

3. ¿Imaraq yanapamäshun imapitapis mana següru kashqaqa?

³ Imapitapis mana següru kashqaqa, Diospa Palabranmi yanapamäshun següru kanantsikpaq. Tsënöpam Jehoväwan mas amïgu kashun y pëman maslla markäkushun o yärakushun (1 Cor. 16:13).

4. Imapitapis mana següru karqa, ¿imanötan 1 Tesalonicensis 5:21 ninqannö alli segurakushwan?

⁴ (Leyi 1 Tesalonicensis 5:21). Diospa Palabranmi “imëkapitapis alli segurakuyë” nir consejamantsik. Peru ¿imanötan segurakushwan? Imanö pensanqantsiktam, Biblia ninqanwan igualatsinantsik. Këllaman pensarishun: ¿imataraq juk jövin ruranman Jehovä kuyanqanta mana següru karqa? ¿Tsënöllatsuraq kakunman? Manam. Tsëpa rantinqa, Jehovä kuyanqanta entiendinampaqmi Bibliata leyinan.

5. ¿Imatataq ruranantsik Jehovä parlapämanqantsikta wiyanapaq?

⁵ ¿Imatataq rurashwan Jehovä parlapämanqantsikta wiyanapaq? Palabran Bibliatam leyinantsik. Peru nimanqantsikta wiyanapaqqa, manam leyinantsikllatsu. Tsëpa rantinqa, yarpachakunqantsik asuntupaqmi textukunata y publicacionkunachö consëjukunata ashinantsik (Prov. 2:3-6). Yachakunqantsik höram, yarpachakunqantsik asuntupa respuestanta tarinapaq Jehovä Diosnintsikman mañakunantsik. Pasëkanqantsik asuntupaq Bibliachö consëjukunata y publicacionkunachö consëjukunata ashishun. Y unë nunakuna pasayanqankunapaq Bibliachö yachakushun.

6. Ima asuntupaqpis yarpachakushqaqa, ¿imanötan reunionkuna yanapamantsik?

⁶ Reunionkunachöpis yarpachakunqantsik asuntupaqqa Jehovä parlapämanqantsiktam wiyantsik. Capazchi wanëkanqantsik asuntupaq juk discursuchö o wawqi panikuna parlakayämunqanchö wiyarishun (Prov. 27:17). Kananqa juk ishkëllata rikärishun imakunapaq yarpachakunqantsikta y respuestanta imanö tarinapaq kaqta.

“¿JEHOVÄQA KUYAMANTSURAQ?”

7. ¿Imataraq capaz pensarqunki?

⁷ ¿Imëllapis pensarqunkiku, “¿Noqataqa Jehovä yarpämantsuraq?” nirnin? Imapaqpis mana välinqëkita pensarqa, capazchi pensanki kë Patsachö y ciëluchö imëkata ruraq poderösu Diospa amïgun këtaqa mana puëdinëkipaq kaqta. Capazchi gobernanti Davidpis tsënö pensarqan. Peru alläpam espantakurqan mana kaqlla këkäyaptimpis nunakunata kuyanqanta musyar. Tsëmi kënö nirqan: “Teyta Jehovä, wanukoqlla nunakunaqa, ¿imanatan kayan pëkunapaq alläpa yarpachakunëkipaq? Nunapa tsurinkunaqa, ¿imanatan kayan pëkunata cuidanëkipaq?” (Sal. 144:3). Tsë tapukuykunapa respuestanta ashirishun.

8. 1 Samuel 16:6, 7 y 10 a 12 ninqannö, ¿imatataq Jehoväqa mas valoran?

⁸ Bibliata leyirninqa entiendintsik, mana kaqlla sientikuyaptimpis nunakunataqa Jehovä alläpa valoranqantam. Këllaman pensarishun: juk kutim willakoqnin Samuelta mandarqan Jesëpa wayinta ëwar juk wamranta Israelpa gobernantin kanampaq akranampaq. Peru Jesëqa mayor kaqkunallatam siëti wamrankunata Samuel kaqman pusharqan, y menor kaq wamran Davidtaqa manam.a Peru Jehoväqa Davidtam akrashqa karqan gobernanti kanampaq (leyi 1 Samuel 16:6, 7, 10-12). ¿Imanirtan Davidtaqa Jehovä akrarqan? Shonqunchö imanö kanqanta musyar y jövinlla karpis pëpa kaqta puntaman churaptinmi.

9. ¿Imanirtan següru kanëki qampaq Jehovä alläpa yarpachakunqanta? (Rikäri fötuta).

⁹ Kananqa pensarishun kuyashurniki Jehovä qampaq ruramunqankunaman. Pëqa kuyashurnikim mas wananqëki hörakunachö consejashunki (Sal. 32:8). Peru tsënö consejashunëkipaqqa, ¿manatsuraq alli reqishunki? Awmi (Sal. 139:1). Tsë consëjukunata cäsukurnin alli kawakurqa, mas segürum kanki Jehovä kuyashunqëkita (1 Crön. 28:9; Hëch. 17:26, 27). Jehoväqa pëpaq llapan ruranqëkikunatam rikëkan y imanö nuna kanqëkitam alläpa valoran (Jer. 17:10). Pëqa amïgun kanëkitam munan (1 Juan 4:19).

“¿ALLITATSURAQ DECIDIRQÄ?”

10. Unë decidinqëkikunaman yarparqa, ¿imakunamantan capaz pensarinkiman?

¹⁰ Decidinqëkipita atska wata pasariptinqa, capazchi kënö pensarqunki: “¿Tsë decidinqäqa allitsuraq kashqa?”. Capaz Jehoväta sirwita munar juk alli trabäjuman yëkurqëkitsu o juk alli negociuta churarqëkitsu. Peru kananqa capazchi winë mayikikunata rikanki atska qellëyoqta y alli kawakoqta. Tsëta rikarqa, capazchi kënö pensarinki: “¿Rasumpatsuraq alli kashqa Jehoväta sirwinärëkur imëkakunata dejanqä? ¿Manatsuraq mas alli kawaküman karqan alli trabäjuyoq o alli negociuyoq karnin?”.

11. ¿Imanirtan Salmus 73 libruta qellqaq nunaqa llakishqa sientikurqan?

¹¹ Imëllapis tsënö pensashqa karqa, Salmus librupa 73 capïtulunta qellqaq nuna imanö sientikunqanman pensë. Pëqa rikarqan Jehoväta mana sirweq nunakuna imëkayoq kayanqanta, alli saloryoqta y kushishqa kawakoqtanömi (Sal. 73:3-5, 12). Alli kawakoqtanö rikarmi Jehoväta sirwinqan imapaqpis mana välishqa kanqanta pensarqan. Tsëkunallaman alläpa pensarmi ‘cada junaq llakishqa kakurqan’ (Sal. 73:13, 14). Peru ¿imatan yanaparqan?

12. Salmus 73:16 a 18 ninqannö, ¿imatan Salmus qellqaq nunata yanaparqan mas alli pensanampaq?

¹² (Leyi Salmus 73:16-18). Kë Salmus qellqaq nunaqa Jehoväpa templunmanmi ëwarqan. Y tsëchömi mas tranquïlu sientikur alli pensëta puëdirqan. Y entiendirirqanmi mana alli kawakoq nunakunaqa Diosnintsik änikunqan bendicionkunata shamoq tiempuchö mana chaskiyänampaq kaqta. Y clärum entiendirqan Jehoväta sirwinampaq decidinqanqa alli kashqa kanqanta, tsënöpam yarpachakurqannatsu y Jehoväta sirwir sïguinampaqmi mas kallpayoq sientikurqan (Sal. 73:23-28).

13. ¿Imatataq rurashwan tranquïlu sientikunapaq? (Rikäri fötutawan dibüjuta).

¹³ ¿Imatataq qampis Salmus qellqaq nunanö rurankiman alli sientikunëkipaq? Tsëpaqqa, imëka allikuna kapushunqëkiman y Jehoväta sirwinqëkimanmi yarpänëki. Jehoväta mana sirweqkunaqa kë munduchö tariyanqan cösaskunallamanmi confiakuyan, peru shamoq tiempupaqqa manam ni imatapis rurayashqatsu. Peru noqantsiktaqa Jehovä änimantsik shamoq tiempuchö imëka bendicionkunata chaskinapaqmi (Sal. 145:16). Peru ¿imanöraq vïdëki kanman karqan Jehoväta sirwinëkipa rantin, jukkunata decidishqa kaptikiqa? Manam musyantsiktsu. Peru ¿imapitataq següru këkantsik? Jehoväta y nuna mayintsikta kuyarnin decidinqantsikpita, wananqantsikkuna mana faltanampaq kaqtam.

“¿NOQAQA JEHOVÄTA SIRWINÄPAQ VÄLÏRAQTSURAQ?”

14. ¿Imakunapa pasarnintan Jehoväpa wakin sirweqninkunaqa mana väleqnö sientikuyanman?

¹⁴ Wakin wawqi panikunaqa edäna karnin o qeshyapäkurninmi Jehoväpaq masta rurëta munarpis puëdiyannatsu. Tsënö karqa, capazchi mana väleqnö sientikurnin kënö pensayanman: “¿Noqaqa Jehoväta sirwinäpaq välïraqtsuraq?”.

15. ¿Imapitataq Salmus 71 qellqaq nuna següru këkarqan?

¹⁵ Salmus 71 cancionta qellqaq nunapis capazchi tsënö sientikurqan. Jehovätam kënö nirqan: “Kallpä ushakaptimpis ama dejëkamankitsu” (Sal. 71:9, 18). Tsënö pensarpis tsë nunaqa segürum këkarqan Jehoväta sirwir sïguiptinqa, cuidanampaq y yanapanampaq kaqta. Pëqa entiendirirqanmi ichikllatapis llapan puëdinqannö ruraptinqa, Jehovä kushikunampaq kaqta (Sal. 37:23-25).

16. ¿Imanirtan nintsik edäna wawqi panikunata Jehovä alläpa kuyanqanta? (Salmus 92:12-15).

¹⁶ Edäna karninqa, Jehovä kuyashunqëkita yarpë. Unënö rurëta mana puëdirpis, Jehoväta sirwinqëkichöqa imëkachömi yanapakuyta puëdinki (leyi Salmus 92:12-15). Rurëta mana puëdinëkipaq kaqkunaman pensarnin llakikunëkipa rantin, puëdinqëki kaqkunata rurë. ¿Imakunatataq rurankiman? Wawqi panikunatam Jehoväta sirwir sïguiyänampaq yanapankiman, wakinkuna qampita yachakuyänampaqmi Dios munanqannö kawakunkiman, Jehovä imanö yanapashunqëkita y änikunqankunata shuyarëkanqëkitam willankiman y wakinkunapaqmi Diosnintsikman mañakunkiman (1 Pëd. 3:12). Imëka mana allipa pasarpis, llapantsikmi Jehoväta sirwinapaq y wakinkunata yanapanapaq imëkata rurëta puëdintsik.

17. ¿Imanirtan wakinkuna rurayanqannö rurëta mana puëdirqa llakikunantsiktsu?

¹⁷ Tsëqa, ¿imapitataq següru kanëki? Puëdinqëkimannö ruranqëkita Jehovä alläpa valoranqantam. Tsëmi masllata rurëta mana puëdirqa llakikunëkitsu. Tsënöllam wakinkuna masta rurayanqanta rikarqa, pëkunanö rurëta procuranëkitsu. Jehoväqa manam wakinkunanö ruranëkita shuyarantsu (Gäl. 6:4). Këllaman pensarishun: Marïa jutiyoq warmim alläpa chaniyoq perfümita Jesuspa chakinman jicharqan (Juan 12:3-5). Y waktsalla viudaqa alläpa mana valoryoq ishkë ichisaq qellëtam cäjaman churarqan (Lüc. 21:1-4). Peru Jesusqa, Jehoväta kuyarnin rurëkäyanqanta musyarmi tsë ishkan warmikuna rurayanqanta alläpa valorarqan. Tsënöllam Jehoväqa ichikllata ruraptikipis, kuyarnin llapan ruranqëkikunata alläpa valoran.

18. ¿Imatataq rurankiman imapitapis mana següru karqa? (Leyiri “Diospa Palabranmi yanapashunki següru kanëkipaq” neq recuadruta).

¹⁸ Llapantsikmi höraqa imapitapis segürutsu kantsik. Peru Diospa Palabranmi yanapamantsik següru kanantsikpaq. Tsëmi imapitapis següru mana karqa, Diospa Palabranchö respuestata ashinantsik, tsënöpam yarpachakushunnatsu y mas següru sientikushun. Jehoväqa kuyashunkim y pëta sirwinëkirëkur imëkata ruranqëkikunataqa alläpam valoran y bendicishunkim. Ama qonqëtsu, ¡Jehoväqa llapan sirweqninkunatam kuyan y cuidan!