Guërra kaptinqa mëtsëchö nunakunam sufriyan
“Ishkë kaq Jatun Guërra kanqampitam, guërrakunaqa mëtsëchö masraq kan. Y guërrakuna kanqan nacionkunachöqa dos millonmi täräyan”.
Amina Mohammed, vicesecretaria general de las Naciones Unidas, 26 de enero de 2023.
Yamë y següru kawakuyanqan sitiukunachöpis guërraqa illaqpitam qallëkunman. Y guërra mana kanqan nacionkunachö nunakunapis guërra kaptinqa sufriyanmi. Tsënöllam guërra ushakäriptimpis nunakunaqa atska watakunaparaq sufriyan. Imanir sufriyanqanta rikärishun:
Mikuy mana kaptin. Programa Mundial de Alimentos niyanqampitam willakuyan, “guërrakuna kanqan sitiukunachö täraq nunakunaqa mikuy mana kaptin mas sufriyanqanta”.
Guërrakuna kaptinqa lisiädum quedayan y alläpa llakikurmi qeshyayan. Guërra kanampaq kaqta musyarirqa alläpa yarpachakurmi llakikur qeshyariyan. Guërra kanqan sitiuchö nunakunaqa, illapanakuyaptin y bombakunata pashtatsiyaptinmi mantsakäyan o hasta wakinqa herïdum quedayan. Peru manam tsëllatsu, alläpa yarpachakurpis imëka qeshyawanmi qeshyayan. Y guërrakuna kanqan nacionkunachöqa manam doctorkuna kayanllatsu.
Wayinkunatam dejarir ëwakuyan. Alto Comisionado de las Naciones Unidas para los Refugiados niyanqampitam willakuyan, 2023 wata setiembri killayaqqa 114 millonpitapis mas nunakuna guërrakuna kaptin mantsakarnin wayinkunata dejarir ëwakuyanqanta.
Qellëtam faltapakuyan. Guërrakuna kaptinqa imëkapis masmi cuestan. Gobiernukunaqa armakunata rantirmi mëtsika qellëta gastayan, tsëmi wamrakunata escuëlakunachö yanapayänampaq y hospitalkunachö yanapakuyänampaq qellë kannatsu. Tsënö kaptinmi nunakunaqa alläpa sufriyan. Y guërrachö imëkata ushakätsiyanqanta yapë altsayänampis manam fäciltsu.
Kë kawanqantsik munduchö imëkata malograr ushakätsiyan. Wakin nunakunaqa manam kë patsachö kaqkunata cuidëta yachayantsu, tsëmi llapan nunakuna sufriyan. Patsa, yaku y shütanqantsik vientu limpiu mana kaptinmi tiempuwanqa qeshyarishwan. Y guërra ushariptimpis pampayanqan bombakunaqa quedayanran y tsëkunaqa peligrösum kayan.
Guërrakunachöqa mëtsika qellëtam gastayan y imëkatam ushakätsiyan.