¿Imaraq yanapamäshun guërrakuna këkaptimpis yamë y tranquïlu kawakunapaq?
Garyqa soldädum karqan, y kënömi nin: “Bibliata manaraq estudiarqa manam entiendirqätsu imanir guërrakuna kanqanta, imanir problëmakuna kanqanta y imanir justicia mana kanqanta. Peru segürum këkä Jehoväqa imëka mana allikunata ushakätsimunampaq kaqta, y tsë änimanqantsiktaqa cumplimunqam. Tsëta musyarmi kananqa tranquïlu kawakü”.
Manam Garyllatsu kananqa yamë kawakun. Rikärishun Bibliachö ninqankuna jukkunatapis imanö yanapanqanta.
BIBLIACHÖ NINQAN: “Teytallä Jehovä, alli kaptiki y perdonakoq kaptikim mañakamü” (Salmus 86:5).
¿IMANÖTAN YANAPAMANTSIK? “Kë textum nin, Jehovä llakipäkoq y perdonakoq kanqanta, tsëmi guërrachö këkar mana alli ruranqäkunata perdonamashqana kanqanta musyar tranquïluna kawakü” (Wilmar, Colombia).
BIBLIACHÖ NINQAN: “Mushoq ciëlukunata y mushoq patsatam ruramushaq. Unë pasayanqëkitaqa manam yarpäyankinatsu, tsëkunaqa manam shonquykikunaman chämunqanatsu” (Isaïas 65:17).
¿IMANÖTAN YANAPAMANTSIK? “Ejercituchö këkarmi imëka mana allikunapa pasarqä, tsëmi estres y depresion qeshyawan sufrï. Peru Isaïas capïtulu sesenta y cincu y versïculu diecisiëtichö ninqannömi Jehoväqa ichikllachöna yanapamanqa mana allikunapa pasanqäta qonqanäpaq y mananam sufrishaqnatsu. ¡Tsëmi alläpa kushikü!” (Zafirah, Estädus Unïdus).
BIBLIACHÖ NINQAN: “Pë gobernaptinqa, alli nunakunaqa shumaq wëtëkaq plantanömi kayanqa, imanömi killa imëpis ushakantsu, tsënömi alli kawakuyanqanqa imëpis ushakanqatsu” (Salmus 72:7).
¿IMANÖTAN YANAPAMANTSIK? “Kë textuchö ninqanmanmi imëpis pensä. Ichikllachönam guërrakuna y imëka mana allikuna ushakanqa. Tsëmi familiantsikkunata mana allikuna pasanampaq kaqmanqa yarpachakushunnatsu” (Olexandra, Ucrania).
BIBLIACHÖ NINQAN: “Wanushqëkikunam yapë kawayanqa […]. ¡Sharkuyë y kushikur büllayë, allpa rurinchö këkaqkuna!” (Isaïas 26:19).
¿IMANÖTAN YANAPAMANTSIK? “Tutsi niyanqan grüpu nunakunata wanutsiyanqan witsanmi familiätapis cäsi llapanta wanutsiyarqan. Peru kë textu ninqannöpis Jehoväqa permitinqam familiäkunawan yapë tinkunäta, tsëmi kawariyämunampaq kaqta musyar kushishqa sientikü” (Marie, Ruanda).
BIBLIACHÖ NINQAN: “Ichikllanam faltan mana alli nunakuna ushakäyänampaq […]. Alli shonquyoq nunakunapaqmi kë patsa herenciankuna kanqa. Tsëchömi imëpis yamë y tranquïlu kawakuyanqa” (Salmus 37:10, 11).
¿IMANÖTAN YANAPAMANTSIK? “Kë täranqächö guërrakuna manana kaptimpis, justiciaqa manam kantsu y nunakunapis mana alli y chikikoqmi kayan. Peru kë textu ninqanqa alläpam yanapamashqa, kananqa musyämi Jehovä llapanta rikanqanta y imanö sientikunqäta entiendinqanta. Pëqa llapan sufritsimanqantsik kaqkunata ushakätsimunampaqmi änimantsik” (Daler, Tayikistan).
Jehovä imanö yanapanqanta këchö willakamoqkunaqa Jehoväpa testïgunkunam kayan, pëkunaqa Bibliapita yachakushqa karmi imëkapa pasashqa karpis tranquïlu kawakuyan. Capazchi unëqa chikinakuyaq costumbrinkunarëkur, nacionninkunarëkur y colorninkunarëkur, peru Bibliapita yachakurirqa yamënam kawakuyan (Efesius 4:31, 32). Jehoväpa testïgunkunaqa manam polïtica asuntuman, ni ima pelyakunamampis mëtikuyätsu (Juan 18:36).
Testïgukunaqa juk familianölla karmi yanapanakuyä (Juan 13:35). Olexandra jutiyoq panipis, guërra kaptinmi ñañanwan o nananwan juk nacionta ëwakurqan. Pëmi kënö nin: “Frontërata pasariyaptïllam tsë nacionpita Testïgukunaqa, listu këkäyänaq kushishqa chaskiyämänampaq. Pëkuna yanapayämaptinmi tsë nacionchöqa yachakäyarqä”.
Reunionnïkunaman shamunëkipaqmi invitariyaq, tsëchöqa yachakunki kanan tiempu imanö yamë kawakunëkipaq kaqta y shamoq tiempuchö kushishqa kawakunëkipaq kaqtam. Täranqëkipa mëninchö reunionnïkuna kanqanta musyanëkipaqqa jw.org päginaman yëkurir ashiri, y tsënölla rurë Bibliapita grätislla yachakunëkipaqpis. Y juk Testïgum, Kushishqa kawakushun neq libruwan yachatsishunki.