“Kanan akrakuyë pita sirwiyänëkipaq kaqta”

1. Rasumpa kushishqa kanapaqqa, ¿imatataq ruranantsik? (Isaïas 48:17, 18).

TEYTANTSIK Jehoväqa alläpam kuyamantsik, tsëmi kanan tiempuchöpis y shamoq tiempuchöpis kushishqa kawakunantsikta munan (Ecl. 3:12, 13). Pëqa imëkata rurëta yachaqtam kamamarquntsik. Tsënö karpis, manam gobernëta yachaqtaqa ni ima alli o ima mana alli kanqanta decidita yachaqtaqa kamamarquntsiktsu (Ecl. 8:9; Jer. 10:23). Pëqa allim musyan pëta cäsukurlla y pëta sirwirlla rasumpa kushishqa kanapaq kaqta (leyi Isaïas 48:17, 18).

2. ¿Imatataq Satanas creitsimënintsikta munan, y imatataq Jehovä rurashqa Satanas ninqan mana rasumpa kanqanta rikätsikunampaq?

² Satanasqa creitsimënintsikta munan Jehoväta mana sirwirpis kushishqa kawakuyta puëdinqantsikta y nunapura gobernanakurnin mas alli kawakunqantsiktam (Gen. 3:4, 5). Satanas tsënö ninqan mana rasumpa kanqanta rikätsikunampaqmi, Jehoväqa nunapura gobernanakuyänanta juk tiempupa permitishqa. Tsëmi cläru rikëkantsik alläpa mana alli kawakunqantsikta. Peru Jehoväta sirweqkunaqa, ¿imanötan kawakuyan? Bibliachömi willakun warmipis ollqupis kushishqa kawakuyanqanta, y Jesuspis Jehoväta sirwirmi kushishqa kawakurqan. Tsëmi këchöqa yachakushun Jehoväta sirwinampaq Jesus imanir decidishqa kanqanta, adoranantsikta Jehovä imanir merecinqanta y Jehoväta sirwinapaq imanir decidinqantsikta.

¿IMANIRTAN JESUSQA JEHOVÄTA SIRWINAMPAQ DECIDIRQAN?

3. ¿Satanasqa imanirqantan Jesusta, peru Jesusqa imatataq decidishqana karqan?

³ Kë Patsachö kanqan tiempuqa, Jesusqa Jehovällatana sirwinampaq decidishqa kanqantam rikätsikurqan. Jesus bautizakurinqampita ichik tiempullatam Satanasqa nirqan, juk kutillapis adorëkuptinqa kë munduchö gobiernukunata y riquëzakunata entreganampaq. Peru Jesusqa kënömi contestarqan: “¡Këpita yarquy Satanas! Qellqarëkanmi: ‘Teyta Jehovätam adoranëki, y pëllatam sirwinëki’” (Mat. 4:8-10). ¿Imanirtan Jesusqa Jehovällatana sirwinampaq decidishqa karqan? Yachakurishun.

4, 5. ¿Imanirtan Jesusqa Jehovällata sirwinampaq decidirqan?

⁴ ¿Imanirtan Jesusqa Teytan Jehoväta sirwinampaq decidirqan? Llapan shonqunwan kuyarmi (Juan 14:31). Pëqa allim musyarqan Jehoväta sirwiqa mas alli kanqanta (Juan 8:28, 29; Apo. 4:11). Musyarqanmi Jehovä alläpa alli kanqanta, confiakuypaq kanqanta, pëlla kawanampaq yanapanqanta (Sal. 33:4; 36:9; Sant. 1:17), imëpis rasumpa kaqllata parlapashqa kanqanta y ima wananqantapis mana faltatsinqanta (Juan 1:14). Tsënöllam musyarqan Satanas alläpa ulikoq kanqanta, chikikoq kanqanta, envidiösu kanqanta y nunakunata wanuyman churashqa kanqanta (Juan 8:44). Rikanqantsiknöpis Jesusqa allim musyan Jehovä imanö kanqanta y Satanas imanö kanqanta, y manam ichikllapis pensarqantsu Satanas ruranqannö Jehoväpa contran churakëtaqa (Filip. 2:5-8).

⁵ Tsënöllam Jesusqa musyarqan Jehoväta mana dejëpa sirwiptinqa, imëka allikuna pasakunampaq kaqta (Heb. 12:2). Musyarqanmi Jehoväpa jutin respetashqa kanampaq kaqta y Satanaspa culpanrëkur llapan sufrinqantsikkunata ushakätsinampaq kaqta.

¿IMANIRTAN JEHOVÄQA ADORANANTSIKTA MERECIN?

6, 7. ¿Imanirtan wakin nunakunaqa Jehoväta adorayantsu, y imanirtan Jehoväta adoranantsik?

⁶ Mëtsikaq nunakunam Jehoväta mana reqirnin sirwiyantsu. Manam musyayantsu imanö kanqanta, kuyakoq kanqanta y pëkunapaq imëkakunata ruranqanta. Tsëmi pasarqan Pablu yachatsinqan Atënas nunakunatapis (Hëch. 17:19, 20, 30, 34).

⁷ Tsë nunakunatam Pablu kënö entienditsirqan: “[Diosnintsikmi] nunakunata kawëkaqta katsin, shütayänanta permitin y imëkampis faltatsintsu. [...] Pë permitiptinmi kawëkantsik, kuyukuntsik y kë munduchö këkantsik”. Tsënöllam entienditsirqan entëru Patsachö kawayänampaq “juk nunallapita” llapan nunakunata kamashqa kanqanta. Rikanqantsiknömi, Diosnintsikqa Kamamaqnintsik, tsëmi adoranantsik (Hëch. 17:25, 26, 28).

8. ¿Imatataq Jehoväqa rurantsu?

⁸ Yachakunqantsiknömi, Jehoväqa imëkatapis kamashqa y pëllam ciëluchö y Patsachöpis poderösu Diosqa. Y munarninqa, sirwinantsikpaqmi obligamënintsikta puëdin. Peru tsëtaqa manam rurantsu. Tsëpa rantinqa, amïgun karnin kushishqa kawakunantsiktam munan (1 Tim. 2:3, 4). Tsëmi rasumpa kawanqanta y kuyamanqantsikta musyanapaq imëkakunata ruramushqa. Y yachatsimantsikmi, nunakuna kushishqa kawakuyänampaq imakunata ruramunampaq kaqta y imanö ruramunampaq kaqta willakunapaq (Mat. 10:11-13; 28:19, 20). Tsënöllam kushishqa kawakunata munarnin congregacionkunata patsätsimushqa y cuidamänantsikpaq anciänukunata churamushqa (Hëch. 20:28).

9. ¿Imanötan Jehoväqa kuyamanqantsikta rikätsimantsik?

⁹ Jehoväqa pëman mana creikoqkunatapis kuyëpam tratan. Mëtsika watakunapam nunakunaqa kikinkuna munayanqannö kawakuyänampaq decidiyashqa. Tsënö këkaptimpis Jehovä Diosnintsikqa alläpa alli karmi, kushishqa kawakuyänanta munar llapan wanayanqankunata tariyänampaq yanapan (Mat. 5:44, 45; Hëch. 14:16, 17). Tsëmi familiayoq këta, wamrayoq këta, amïgukunayoq këta y trabajayanqanwan tarirnin kushishqa këta puëdiyan (Sal. 127:3; Ecl. 2:24). Rikanqantsiknömi Jehovä Diosnintsikqa, llapan nunatapis alläpa kuyamantsik (Ex. 34:6). Kananqa yachakurishun Jehoväta sirwinapaq imanir decidinqantsikta y imanö bendicimanqantsikta.

¿IMANIRTAN JEHOVÄTA SIRWINAPAQ DECIDIRQANTSIK?

10. (1) ¿Imanirtan Jehoväta sirwintsik? (Mateu 22:37). (2) ¿Imanötan sientikunki Jehovä pacienciakoq y perdonakoq kanqanta musyar? (Salmus 103:13, 14).

¹⁰ Jesusnöpis, llapan shonquntsikwan kuyarmi Jehovätaqa sirwintsik (leyi Mateu 22:37). Jehovä imanö kanqanta maslla musyarqa, masmi kuyantsik. Këllaman pensarishun: Jehoväqa alläpa pacienciawanmi tratamantsik. Tsëmi israelïtakunatapis mana wiyakoq këkäyaptin, mana alli rurëkunata dejayänampaq rogarqan (Jer. 18:11). Jutsasapa karnin imëka mana allikunata rurashqapis, Jehovä Diosnintsikqa allpapita rurashqa kanqantsikta musyarmi perdonamantsik (leyi Salmus 103:13, 14). Jehovä pacienciakoq kanqanta y kuyakoq kanqanta musyarqa, ¿manaku imëyaqpis sirwita munantsik?

11. ¿Imanir mastan Jehoväta sirwinapaq decidirquntsik?

¹¹ Tsënöllam musyantsik, Jehoväta sirwiqa imapitapis mas alli kanqanta (Mat. 4:10). Jehoväta sirwirninqa jutin respetashqa kanampaq, kushishqa sientikunampaq y Satanas ulikoq o llullakoq kanqanta musyatsikunampaqmi yanapakuntsik. Jehoväta sirwinapaq kanan witsan decidirqa, imëyaqpis sirwitam puëdishun (Juan 17:3).

12, 13. ¿Imatataq yachakuntsik Janewan Pam rurayanqampita?

¹² Jehovätaqa wamra karpis llapan shonquntsikwanmi kuyëta puëdintsik. Rikärishun Janewan nanan o ñañan Pama rurayanqanta. Pëkunaqa 11 y 10 watayoq këkarmi Bibliapita yachakur qallëkuyarqan. Papäninkunaqa Bibliapita yachakuyta mana munarpis, wamrankunatam permitiyarqan Testïgukunawan yachakuyänampaq. Tsënö karpis, semäna ushëqa iglesiankunaman ëwayänantam munayarqan. Janem kënö nin: “Escuëlachö compañërükuna mana allikunata ruranäpaq, drögata shoqunäpaq o jukwan jukwan oqllanakunäpaq niyämaptimpis, Testïgukunawan Bibliapita yachakunqämi tsë rurëkunaman mana ishkinäpaq yanapamarqan”.

¹³ Janewan nanan Pamqa shipashyarkurmi Diosnintsikpita yachatsikur qallëkuyarqan. Y tiempuwannam precursöra kayarqan y edäyashqa papäninkunatapis cuidayarqan. Llapan pasanqankunata yarparmi Jane kënö nin: “Jehoväqa manam imëpis dejamarqantsu, tsëmi següru këkä amïgunkunataqa imëpis cuidanampaq kaqta. 2 Timoteu 2:19 ninqannömi ‘Jehoväqa musyan pikuna pëpa kayanqanta’”. Rikanqantsiknömi, Jehoväqa pëta sirwiyänampaq decideqkunata y pëta kuyaqkunataqa imëpis cuidan.

14. ¿Imanötan Diosnintsikpa jutinta respetatsishwan? (Fötukunata rikäri).

¹⁴ Noqantsikpis Diosnintsikpa jutin respetashqa kanampaqmi yanapakuyta munantsik. Këllaman pensarishun: kuyakoq, llakipäkoq y alli amïguykipaq nunakuna niyanman mana alli y ulikoq o llullakoq kanqanta. ¿Imataraq rurankiman? ¿Manatsuraq defendinkiman? Tsënöllam noqantsikpis Jehovä Diosnintsikpaq mana rasumpa kaqkunata parlayaptinqa, defendintsik y rasumpa kaqta llapan puëdinqantsikmannö nunakunata entienditsintsik (Sal. 34:1; Is. 43:10). Parlakunqantsikwan y ruranqantsikkunawanmi rikätsikuntsik llapan shonquntsikwan Jehoväta sirwinqantsikta.

15. ¿Ima bendicionkunatataq Pablu chaskirqan Jehoväta sirwinanrëkur imëkata dejanqampita? (Filipensis 3:7, 8).

¹⁵ Jehoväta sirwinantsikrëkurmi imata rurëta munanqantsikkunatapis dejarintsik. Apostol Pablupis tsëtam rurarqan. Pëqa markanchömi alläpa reqishqa y alläpa respetashqa tikrëkarqan, peru Cristupa qateqnin kananrëkur y Jehoväta sirwinanrëkurmi tsëkunata dejarirqan (Gäl. 1:14). Tsëta ruranqampitam kushishqa kawakurqan y Jesuswan ciëlupita gobernamunampaq premiuta chaskirqan. Pabluqa manam imëpis arrepentikurqantsu Jehoväta sirwinampaq decidinqampita, y noqantsikpis manam arrepentikushuntsu (leyi Filipensis 3:7, 8).

16. ¿Imatataq yachakuntsik Julia ruranqampita? (Fötukunata rikäri).

¹⁶ Jehoväta sirwirqa, kanan tiempuchö y shamoq tiempuchöpis atska bendicionkunatam chaskishun. Julia jutiyoq panintsikta pasanqanta rikärishun. Pëtaqa alli cantëta yachaptinmi iglesianchö cantatsiyaq. Tsëmi masta yachakunampaq, alli cantëta yachatsikuyanqan escuëlaman yëkurqan. Y ichik tiempu pasariptinmi, conciertukunachöna cantaq y alläpa reqishqam karqan. Peru cläsinchömi juk compañërun nirqan Diospa jutin Jehovä kanqanta. Tsëmi Juliaqa alläpa kushikurnin semänachö ishkë kuti Bibliata estudiar qallëkurqan. Y tiempuwanqa, Jehoväta sirwinanrëkurmi cantëta dejarirqan. Tsëta decidinanqa manam fäciltsu karqan. Juliam kënö nin: “Mëtsikaq nunakunam niyämaq cantëta yachëkarnin mana provechëkanqäta y tiempüta perdïkanqäta”. Peru tsëpita 30 wata pasariptinmi Juliaqa kënö nin: “Alläpa kushishqam sientikü, y llapan munanqäkunata shamoq tiempuchö Jehovä cumplimunampaq kaqtam següru këkä” (Sal. 145:16).

AMA JEHOVÄTA SIRWITA DEJASHUNTSU

17. ¿Imatataq cuentachö katsiyänan Jehoväta sirwiyänampaq manaraq decidishqa kaqkuna? ¿Y imatataq yarpänantsik Jehoväta sirwinapaq decidishqa kaqkunaqa?

¹⁷ Kë mana alli tiempuqa pasarinqanam. Tsëmi apostol Pabluqa kënö nirqan: “‘Ichikllanam pishin’ ‘shamoqpaq kaqqa chämunqam y tiempunchömi cumplikanqa’” (Heb. 10:37). Tsënö ninqanwanmi entiendintsik Jehoväta sirwiyänampaq manaraq decidishqa kaqkunapaq tiempu ushakëkanqantana (1 Cor. 7:29). Y Jehoväta sirwinapaq decidishqana karqa, ¿imatataq yarpänantsik? Imëka mana allikunapa pasanqantsikpis ichik tiempullachöna pasarinampaq kaqtam.

18. ¿Imata ruranatataq Jehoväwan Jesus munayan?

¹⁸ Jesusqa nunakunata animarqan imëpis qateqninkuna kayänampaqmi (Mat. 16:24). Tsëmi Jehoväta atska watapana sirwirpis, dejarinantsiktsu. Pëllata imëpis sirwinapaqqa kallpachakunantsikmi, y musyanqantsiknöpis tsëta rurëqa manam fäciltsu. Peru rasumpa kaqchöqa, ¿manaku Jehoväta sirwirnin kushishqa kawakuntsik y atska bendicionkunata chaskintsik? (Sal. 35:27).

19. ¿Imatataq yachakuntsik Jimi jutiyoq jövinta pasanqampita?

¹⁹ Wakinkunaqa pensayan Jehoväta sirwiqa alläpa sasa o aja kanqantam. Y qamqa jövin, ¿Jehoväta sirwirnin libri mana kanëkipaq kaqtaku pensanki? Jimi jutiyoq jövinmi kënö nin: “Noqaqa pensarqä libri kawakunata Testïgukuna mana dejakuyanqantam. Jövin mayïkunatam rikaq kä fiestakunaman ëwarnin, shipashkunawan kakurnin y mana alli videujuëgukunata pukllarnin kushishqa kayanqanta. Peru noqaqa reunionkunaman y yachatsikoq yarqurllam kakoq kä”. ¿Imamantan Jimi charqan tsënö pensarnin? Kikinmi kënö nin: “Pakëllapam tsë jövinkuna rurayanqanta rurar qallëkurqä, y juk tiempullaqa ruranqäkuna gustamarqanmi. Peru manam rasumpa kushishqaqa karqötsu. Tsëmi Bibliapita yachakunqäkunaman y imanö yanapamanqanman pensar qallëkurqä. Y llapan shonqüwan Jehoväta sirwinäpaqmi decidirqä. Tsëpita witsëpaqa llapan mañakunqätam Jehovä Diosnintsik contestamashqa”.

20. ¿Imata ruranapaqtan decidïdu këkantsik?

²⁰ Salmus qellqaqmi Jehoväpaq kënö nir cantarqan: “Patiuykichö kawanampaq akranqëki nunaqa, kushishqam kawakun” (Sal. 65:4). Tsëmi noqantsikpis Josuënö llapan shonquntsikwan kënö nita puëdintsik: “Noqawan familiäqa, Jehovä Diostam sirwiyäshaq” (Jos. 24:15).