Manam japallantsiktsu këkantsik

1, 2. (1) Problëmakunapa pasarqa, ¿imanirtan nishwan japallantsik mana këkanqantsikta? (2) ¿Imatataq këchö yachakushun?

ALLÄPA problëmakunapa pasarqa, mana reqinqantsik karu jirkachö oqrakashqanömi sientikushwan. Peru manam japallantsiktsu këkantsik. Teytantsik Jehoväqa allim musyan imanö sientikunqantsikta y imëpis läduntsikchö këkänampaqmi änimarquntsik. Jehoväqa kuyë sirweqninkunatam kënö nin: “Noqam yanapayashqëki” (Is. 41:10).

² Tsëmi këchöqa, Jehovä Diosnintsik imanö yanapamanqantsikta chuskullata yachakurishun: 1) imawan y pikunawan yanapamanqantsikta, 2) wananqantsikkunata mana faltätsimunqanta, 3) munanqannö adoranapaq yanapamanqantsikta y 4) consolamanqantsikta. Imëka mana allikunapa pasashqapis Jehoväqa manam dejamäshuntsu ni qonqëkamäshuntsu. ¡Manam japallantsiktsu këkantsik!

JEHOVÄMI YANAPAMANTSIK

3, 4. ¿Imawantan Jehovä yanapamantsik alli kawakunapaq? (Salmus 48:14).

³ (Leyi Salmus 48:14). Jehoväqa allim musyan kikintsikllapitaqa alli kawakuyta mana puëdinqantsikta, tsëmi Palabran Bibliawan yanapamantsik alli kawakunantsikpaq (Sal. 119:105). Palabran Bibliachömi alli consëjukunata tarintsik imatapis alli decidinapaq, pë munanqannö nuna tikranapaq y imëyaqpis kawakunapaq änimanqantsikta shuyaränapaq.a Këllaman pensarishun: Palabranwanmi yachatsimantsik perdonakoq kanantsikpaq, pipis ofendimashqa mana yarparäkunapaq, imëkachöpis honrädu kanapaq y juknintsik juknintsik llapan shonquntsikwan kuyanakunapaq (Sal. 37:8; Heb. 13:18; 1 Pëd. 1:22). Tsënö kanqantsikmi yanapamantsik alli papä, alli qowa o alli runa y alli amïgu kanapaq.

⁴ Tsënöllam Bibliachöqa willakun noqantsiknö imëka problëmakunapa pasashqa nunakunapaq y imanö sientikuyanqampaq (1 Cor. 10:13; Sant. 5:17). Tsëkunata leyinqantsikmi yanapamantsik, pasëkanqantsik problëmakunapa jukkunapis pasashqa kayanqanta y Jehovä yanapaptin aguantashqa kayanqanta musyanapaq (1 Pëd. 5:9). Tsënöllam yanapamantsik ima problëmakunapa pasarpis imakunata ruranantsikpaq kaqta musyanapaq (Rom. 15:4).

5. ¿Pikunawantan Jehovä yanapamantsik?

⁵ Juknöpaqa Jehovä yanapamantsik wawqi panikunawanmi.b Congregacionta watukaqkunam seguïdu watukamantsik y Diosnintsikman maslla confiakunapaq y wawqi panikunawan juknölla kawakunapaqmi discursukunata rurar shumaq yanapamantsik (Hëch. 15:40–16:5). Anciänukunapis alläpam wawqi panikunata kuyayan, tsëmi cada ünuta seguïdu yanapayan (1 Pëd. 5:2, 3). Papäkunapis wamrankunatam yachatsiyan Jehoväta kuyayänampaq, imatapis alli decidiyänampaq y Jehoväpita kikinkunalla mas yachakuyänampaq (Prov. 22:6). Y Diospa kaqchö poqushqa panikunapis, shipash panikunapaqmi alli ejemplu kayan y shumaq consejarmi yanapayan (Tïtu 2:3-5).

6. ¿Imatataq rurashwan Jehovä yanapamanqantsikta alli provechanapaq?

⁶ Jehoväqa yanapamänantsikpaq änimanqantsiktam cumplikan. Peru ¿imanötan tsënö yanapamanqantsikta alli provechashwan y agradecikoq kanqantsikta rikätsikushwan? Proverbius 3:5 y 6 textuchömi kënö nin: “Ama kikiki yachanqëkillamanqa confiakuytsu, sinöqa, Teyta Jehoväman llapan shonquykiwan confiakuy”. ¿Y imanötan Jehoväman confiakunqantsikqa yanapamantsik? Alli kawakunapaqmi. Juk parlakuychöqa, imëka problëmakunapitam librakuntsik y kushishqam kawakuntsik. ¡Alläpam agradecikuntsik Jehovä alläpa kuyamanqantsikpita y shumaq consejamanqantsikpita! (Sal. 32:8).

MANAM WANANQANTSIKKUNATA FALTATSIMUNTSU

7. Filipensis 4:19 ninqannö, ¿imanötan Jehovä yanapamantsik?

⁷ (Leyi Filipensis 4:19). Jehoväqa manam consëjunkunallawantsu yanapamantsik, sinöqa wananqantsikkunata tarinapaqpis yanapamantsikmi. Tsëmi mikuyta, röpata y täkunapaq wayita faltatsimuntsu (Mat. 6:33; 2 Tes. 3:12). Wananqantsikkunata faltapakur yarpachakushqapis, Jehovä Diosnintsikqa nimantsik tsë cösaskunapaq alläpa mana yarpachakunapaqmi (Mat. 6:25). Pëqa sirweqninkunata änishqa imëpis mana dejanampaqmi (Mat. 6:8; Heb. 13:5). Tsëmi llapan shonquntsikwan confiakunantsik änikunqankunata cumplimunampaq kaqta y wananqantsikkunata mana faltatsimunampaq kaqta.

8. ¿Imanötan Jehoväqa Davidta yanaparqan?

⁸ Pensarishun Davidta Jehovä imanö cuidanqanman. Davidtaqa gobernanti Saulmi wanutsinampaq ashirqan, tsëmi pëqa qeshpir ëwakurqan. Y tsë tiempuchöqa manam Diosnintsikqa Davidpaq ni yanapaqnin nunakunapaq wanayanqankunata faltatsirqantsu. Tsë watakunata yarparchi Davidqa kënö nirqan: “Jövin kanqäpita awkinyanqäyaqpis manam rikarqötsu alli nunata Teyta Dios dejarinqanta, ni manam tsurinkunatapis mikuyta mañakur purikäyaqta rikarqötsu” (Sal. 37:25). Qampis mëtsika kutiraq rikarqunki wananqëki hörakuna Jehovä imanö yanapashunqëkita y wawqi panikunatapis imanö yanapanqanta.

9. ¿Imanötan Jehovä Diosnintsikqa desgraciapa pasëkaqkunata kanan witsan yanapan? (Fötuta rikäri).

⁹ Jehovä Diosnintsikqa desgraciapa pasëkaq sirweqninkunatapis yanapanmi. Këllaman pensarishun: punta cristiänukuna kawayanqan tiempuchömi, Jerusalenchö wawqi panikunaqa mikuy mana kaptin mallaqäyarqan. Tsëmi mëtsë markakunapita cristiänu mayinkuna mikuyta apatsiyarqan (Hëch. 11:27-30; Rom. 15:25, 26). Tsënöllam kanan witsampis, desgraciapa pasëkaq wawqi panikunata yanapantsik. Jehovämi kuyakoq karnin yanapamantsik desgraciapa pasëkaqkunapaq mikuyta, yakuta, röpata y jampikunata apatsinapaq. Y wakin wawqi panikunanam desgraciapa pasashqa wawqi panikunapa wayinkunata y Diosta adoranantsik wayikunata altsëchö yanapakuyan. Mëchöpis desgraciapa pasayaptinqa, wawqi panikunaqa jinan höram alistapakuyan desgraciapa pasashqakunata consolayänampaq y Diosnintsikpa Palabranwan yanapayänampaq.c

10, 11. ¿Imatataq yachakuntsik Borista pasanqampita?

¹⁰ Jehovä Diosnintsikqa alläpa allim, tsëmi mana sirweqnin nunakunatapis yanapan. Y noqantsikpis Jehovänö alli këta munarmi mana Testïgu kaqkunatapis yanapantsik (Gäl. 6:10). Tsënöpam wakin nunakunaqa Jehoväpita masllata musyariyan. Pensarishun Boris jutiyoq profesorman. Pëqa Ucrania nacionchömi juk escuëlachö director karqan. Y mana Testïgu karpis, Testïgukunapa wamrankunataqa respëtuwanmi trataq. Peru nacionninchö guërra qallëkuptinqa juk naciontam ëwakurqan. Tsëmi wawqi panikuna yanapayarqan. Y tiempu pasariptinnam, Jesus wanunqanta yarpäna reunionman ëwarqan. Testïgukuna llapan yanapayanqankunata yarparmi Boris kënö nin: “Testïgukunaqa yanapayämänampaqmi alkäbu këkäyarqan. Y alläpam agradecikü yanapayämanqampita”.

¹¹ Llapantsikmi Jehovä Diosnintsiknö alli këta munantsik, tsëmi mana Testïgu kaqkunatapis yanapantsik (Lüc. 6:31, 36). Llapan shonquntsikwanmi confiakuntsik yanapanqantsikta rikarnin Jehoväpita yachakur qallayänampaq kaqta y wakinkunaqa sirweqnin tikrayänampaq kaqta (1 Pëd. 2:12). Peru Jehoväta mana sirwiyaptimpis, yanapanqantsikpitam alläpa kushikuntsik (Hëch. 20:35).

MUNANQANNÖ ADORANAPAQMI YANAPAMANTSIK

12. ¿Imatataq Jehoväqa llapan sirweqninkunata änishqa? (Salmus 91:1, 2, 14).

¹² (Leyi Salmus 91:1, 2, 14). Jehovä Diosnintsikqa änimarquntsik rasumpa kaqta yachakunantsikta imapis mana michämänapaq kaqtam. Y manam permitinqatsu pëta munanqannö adoranantsikta Satanas michäkunanta (Juan 17:15). Y ‘alläpa sufrimientu’ qallëkunqan tiempuqa, llapan sirweqninkunatam Jehoväqa pëta mana dejayänampaq yanapanqa y mana allikuna mana pasamänapaqmi cuidamäshun (Apo. 7:9, 14).

13. ¿Imanötan Jehoväqa cada ünuta cuidamantsik?

¹³ Peru ¿imanötan Jehoväqa cada ünuta cuidamantsik? Juknöpaqa, ima alli y ima mana alli kanqanta musyanapaqmi Palabranwan yanapamantsik (Heb. 5:14). Consëjunkunata cäsukunqantsikmi, tsapämaqnintsik escüdu cuenta yanapamantsik Diosnintsikta mana dejarinapaq (Sal. 91:4). Tsënöllam Jehoväqa congregacionninwampis yanapamantsik pëta sirwirnin sïguinapaq (Is. 32:1, 2). Pëta kuyaq y cäsukoq wawqi panikunawan juntu karmi, kushishqa sirwita puëdintsik y mana allikunata rurëpitam cuidakuntsik (Prov. 13:20).

14. (1) ¿Imanirtan höraqa problëmantsikkunata Jehovä ushakäratsintsu? (2) ¿Imapita següru kanapaqtan Salmus 9:10 ninqan yanapamantsik? (Nötata leyi).

¹⁴ Unë witsanqa, wakin sirweqninkunataqa imëka peligrukunapitam Jehovä tsaparqan; peru wakintaqa manam. Tsëmi Bibliachöqa nin, ‘mana pensanqantsik höra imëka mana allikunapa pasanapaq’ kaqta (Ecl. 9:11). Tsënöllam unë tiempuchö y kanan tiempuchöpis höraqa Jehovä permitin wakin sirweqninkuna imëka mana allikunapa pasayänanta y hasta wanuyänanta. Tsëtaqa permitin Satanas ulikoq o llullakoq kanqanta rikätsikunampaqmi (Job 2:4-6; Mat. 23:34). Höraqa manam pasëkanqantsik problëmakunata Jehovä ushakäratsinqatsu, tsënö karpis mana allikunapa pasanqantsik hörakunaqa manam dejamäshuntsu (Sal. 9:10).d

JEHOVÄMI CONSOLAMANTSIK

15. ¿Imanötan Jehoväqa consolamantsik mañakunqantsikwan, Palabran Bibliawan y wawqi panikunawan? (2 Corintius 1:3, 4).

¹⁵ (Leyi 2 Corintius 1:3, 4). Llapantsikmi höraqa imëka mana allikunapa pasantsik y llakishqa sientikuntsik. Capazchi kanan hörapis llakishqa këkantsik y japallantsik këkanqantsikta pensantsik. Imanö sientikunqantsikta jukkuna mana musyayaptimpis, Jehovä Diosnintsikqa musyëkanmi. Y manam musyanllatsu; pëqa kallpayoq kanapaqmi consolamantsik. Peru ¿imanötan consolamantsik? Palabran Bibliawan, wawqi panikunawan y mañakunantsikta permitimarnintsikmi. Mañakushqaqa, ‘nunakuna mana entiendita puëdiyanqan, Teyta Diospita chaskinqantsik yamë këmi shonquntsikta y pensënintsikta Cristurëkur cuidan’ (Filip. 4:6, 7). Bibliata leyirmi tarintsik shumaq consëjukunata. Y cuentatam qokuntsik Diosnintsik alläpa kuyamanqantsikta, tsëmi änimanqantsikkunata mas gänaswan shuyarantsik. Y reunionkunaman ëwashqanam, wawqi panikuna kushishqa chaskimantsik y Biblia ninqankunapita shumaq parlapäramantsik.

16. ¿Imatataq yachakuntsik Nathanwan Priscilla pasayanqampita?

¹⁶ Palabran Bibliawan Jehovä imanö consolamanqantsikta y animamanqantsikta musyarinapaq Estädus Unïduschö täkoq Nathantawan Priscillata pasanqanta rikärishun. Pëkunaqa Diosnintsikpita yachatsikur yanapakuyänampaqmi juk markata ëwakuyarqan. Nathanmi kënö nin: “Jehovä Diosnintsik bendiciyämänampaq kaqmanmi confiakuyarqä”. Peru pëkunaqa yanapakuyänampaq kaq congregacionman chärirllam qeshyariyarqan y faltapakur qallëkuyarqan. Y imanö këtapis mana puëdirmi markankunata kutikuyarqan, peru tsëchöpis faltapakuyarqanllam. Nathanmi kënö nin: “‘¿Imanir-raq Jehoväqa pensayanqänö bendiciyämashqatsu? O ¿jutsatatsuraq rurarqö?’ nirmi yarpachakurqä”. Peru tiempuwanmi cuentata qokuyarqan Diosnintsik mana dejashqa kanqanta. Nathanmi kënö nin: “Mana allikunapa pasayanqä hörakuna Bibliata leyirmi cuentata qokuyarqä Diosnintsikqa shumaq consejëkäyämanqanta y animëkäyämanqanta. Pasëkäyanqä problëmallaman yarparäyänäpa rantinmi, aguantayänäpaq Jehovä imanö yanapëkäyämanqanman mas pensëta yachakuyarqä. Y tsëmi yanapayämashqa mas problëmakunapa pasarpis alli tsarakuyänäpaq”.

17. ¿Imanötan panintsik Helga consuëluta chaskirqan? (Fötukunata rikäri).

¹⁷ Yachakunqantsiknömi, Jehovä Diosnintsikqa wawqi panikunawampis consolamantsik. Parlarishun Hungrïa nacionpita Helga jutiyoq panintsikta pasanqanta. Pëqa mëtsika watakunapam alläpa qeshyarnin llakishqa kakurqan y imapaqpis mana väleqnö sientikurqan. Peru tsë watakunaman yarparqa, wawqi panikunawan Jehovä yanapashqa kanqantam cuentata qokurqan. Kënömi nin: “Alläpa trabäjuyoq kar, qeshyëkaq wamräta cuidar y mas problëmakunapa pasarmi kallpannaq sientikurqä y tsë hörakunam Jehovä yanapamarqan. 30 watakunapam Jehoväqa consolamänampaq änikunqanta cumplishqa y manam imëpis japalläqa karqötsu. Mëtsika kutim turi nanakunaqa shumaq parlapäyämashqa y kuyayämanqanta niyämashqa. ¡Mas wananqä hörakunam mensäjikunata y tarjëtakunata chaskirqä!”.

18. ¿Imanötan wakinkunata consolashwan?

¹⁸ Noqantsikpis Jehovä Diosnintsiknömi wakinkunata consolëta puëdintsik. ¿Imanötan rurashwan? Imanö sientikuyanqanta willamashqam pacienciawan wiyashwan, shumaq parlaparmi animarishwan y wanayanqankunachömi yanaparishwan (Prov. 3:27). Y mana Testïgu kayaptimpis, llapan sufrikaqkunatam consolarita puëdintsik. Capazchi wakinkunaqa qeshyarnin, familiankuna qeshyayaptin o wanukushqa kayaptin llakishqa këkäyan. Pëkunatam visitarishwan, imanö sientikuyanqanta willamashqa shumaq wiyarishwan y Bibliawan animarishwan. Tukuynöpa shoqakoq Diosnintsik ruranqannö rurarqa, manam cristiänu mayintsikkunallatatsu alli tsarakuyänampaq yanapashun, sinöqa mana Testïgu kaqkunatapis Jehoväta reqiyänampaqmi yanaparishun (Mat. 5:16).

JEHOVÄQA IMËPIS LÄDUNTSIKCHÖMI KËKANQA

19. ¿Imatataq Jehoväqa kuyamarnintsik ruramun, y imanötan noqantsikpis Jehovänö kuyakoq kashwan?

¹⁹ Jehoväqa llapan sirweqninkunapaqmi alläpa yarpachakun y mana allikunapa pasanqantsik hörakunapis manam dejamantsiktsu. Alläpam kuyamantsik y juk papä wamranta cuidaqnömi cuidamantsik. Tsëmi alli kawakunapaq consejamantsik, wananqantsikkunata faltatsimuntsu, pëta adorarnin sïguinapaq yanapamantsik y consolamantsik. Y noqantsikpis pënö këtam munantsik, tsëmi mana allikunapa pasëkaqkunata animantsik y yanapantsik. Imëkapa pasarpis, Jehovä Diosnintsik imëpis mana dejamänapaq kaqmanmi confiakuntsik. Kikinmi kënö änimarquntsik: “Ama mantsakäyëtsu, noqam qamkunawan këkä” (Is. 41:10). ¿Manaku alläpa kushikuntsik noqantsikwan Jehovä imëpis këkanqanta musyar?