JÖVINKUNA MUSYËTA MUNAYANQAN
¿Imanirtan Teyta Diosman mañakunantsik?
Teyta Diosman mañakuyanqanta o mana mañakuyanqanta musyëta munarmi, Estädus Unïduschö jövinkunata tapuyarqan. Y cäsi llapanmi mañakuyanqanta niyarqan. Tsënö kaptimpis, pullan kaqllam cada junaq Diosman mañakuyanqantaqa niyarqan. Tsëmi wakinkunaqa: “¿Mana allikunapa pasarllaku mañakü?” nir tapukuyan.
¿Imatan mañakuyqa?
Mañakurqa, Kamakoq Teyta Diosnintsiktam imëkatapis willapärintsik. Këllaman yarpäri, Teyta Jehoväqa noqantsikwan mana igual karpis, “manam noqantsikpita alläpa karuchötsu këkan” (Hëchus 17:27). Tsëmi Palabran Bibliachöqa, “Diosman witiyë, y pëqa qamkunamanmi witimunqa” nimantsik (Santiägu 4:8).
Jövin, ¿imatatan rurankiman Teyta Diosman witinëkipaq?
Diosmanmi mañakunëki. Mañakurqa, Teyta Diostam parlapantsik.
Bibliapitam yachakunëki. Tsëta rurarmi Teyta Dios ima nishunqëkita wiyanki.
Mañakunqëki y Bibliapita yachakunqëkiqa, Teyta Diosta mas kuyanëkipaqmi yanapashunki.
Jeremim nin: “Mañakurnin Teyta Dioswan parlakurinqantsikqa, ¡manam ni imawampis igualantsu!”.
Mirandam nin: “Kushikunqäta y llakikunqäta Teyta Diosta willarqä, läduchö këkaqtanömi rikä”.
¿Teyta Diosqa mañakunqantsikta wiyantsuraq?
Teyta Diosman creir o pëman mañakurpis, höraqa “¿wiyamantsuraq o manatsuraq?” nintsikmi. Tsënö kaptimpis, Bibliachöqa nin “pipis mañakushuptiki qam wiyankim” (Salmus 65:2, Teyta Diospa Willakïnin [TDW]). Teyta Diosqa kuyashunkim, tsëmi llapan yarpachakuynikita willanëkita munan (1 Pëdru 5:7).
Këman yarpë: ¿Amïguïkikunawan parlë gustashunkiku? Awmi ¿aw? Tsënöllam Teyta Dioswampis jutimpa imëpis parlakunëki, y jutinqa Jehovämi (Salmus 86:5-7; 88:9). Bibliachöqa nimantsik imëpis mañakunapaqmi (1 Tesalonicensis 5:17).
Moisesmi nin: “Mañakurqa Teyta Jehoväwanmi parlakü, y pëtaqa imëkatam willëta puëdï”.
Kärenmi nin: “Imanömi mamänïwan y amïgükunawan imëkapita parlä, tsënöllam Jehovä Diostapis imëkata willä”.
¿Imakunapaqtan mañakushwan?
Bibliachömi kënö nimantsik: “Imëkachöpis mañakurnin y rogakurnin y jina agradecikurnin, yarpachakïnikikunata Diosta musyatsiyë” (Filipensis 4:6).
Teyta Diostaqa imëka yarpachakunqantsiktapis willëta puëdintsikmi. Tsëta ruranapaqmi Palabran Bibliachö nimantsik: “Ima llakikïnikikunatapis TEYTA DIOSPA makinchö jaqiriyë” (Salmus 55:22, TDW).
Tsënö kaptimpis, manam mana allikunapa pasarllatsu Teyta Diosmanqa mañakunantsik. Chantelle jutiyoq shipashmi nin: “Teyta Jehoväman mañakurqa manam yanapamänanllapaqtsu mañaküman, sinöqa agradecikunäpaqmi. Teyta Jehoväqa, imëkatam noqantsikrëkur ruramushqa”.
Këman yarpë: ¿Imapitatan kanan junaq Jehovä Diosta agradecikunkiman?
Anïtam nin: “Juk shumaq wëtata rikarqa, tsë wëtata kamanqampitam Jehoväta mañakur agradecikunantsik”.
Brianmi nin: “Gustashunqëki willakuyta Bibliachö leyir o Jehovä Dios kamanqampita imallapis gustashuptikiqa, tsëkunapita agradecikur mañakuri”.