¿Santukunaman mañakushwantsuraq?

Bibliachö yachakunqantsik

Bibliaqa manam santukunaman mañakunapaq yachatsikuntsu, sinöqa Jesuspa jutinchö Teyta Jehovällata mañakunapaqmi yachatsimantsik. Jesusqa yachatsimarqantsik: “Qamkunaqa Teyta Diosta kënö mañakuyanki, ‘Ciëluchö këkaq Teytallä, shutillëki respetashqa këkullätsun’” (Mateu 6:9, Teyta Diospa Willakïnin [TDW]). Jehovällaman mañakunapaqmi Jesusqa yachatsimarquntsik, y manam mañakunantsiktsu santukunaman, angelkunaman ni pimampis.

Jesusmi nirqan: “Noqam näniqa kä, rasun kaqmi kä y wiñë kawëpis kä. Noqata mana chaskimarqa Teytä kaqman manam pipis chanqatsu” (Juan 14:6, TDW). Teyta Jehovä mañakuynintsikta wiyanampaqqa, Jesuspa jutinllachömi mañakunantsik (Hebrëus 7:25).

Teyta Jehoväman mañakuykarqa, ¿santukunamampis mañakushwanku?

Jehovä Diosmi chunka mandamientukunachö kënö nirqan: “Noqallam [puëdiq] TEYTA DIOSNIKI kä. Noqallata adoramänëkitam munä” (Exodu 20:5, TDW). Awmi, Teytantsik Jehovällatam adoranantsik manam santukunataqa. Tsëmi pëllaman mañakunantsik (Isaïas 48:11).

Pï nunapis Diosman mañakunampa rantin angelman o juk santuman mañakuptinqa, Teyta Diosqa piñakunmi. Apostol Juan juk angelpa puntanman qonqurikuyta munaptinmi, angelqa sinchipa kënö nirqan: “¡Ama noqata adoramëtsu! ¡Teyta Diosllata adorëqa! Noqapis qamnöllam y markäkuq mayikikunanöllam Teyta Diospa sirwiqnin këkä” (Apocalipsis 19:10, TDW).