“Teyta Diosllam mana allitaqa ushakätsimunqa”

IMANÖ KANQÄ:

Jyväskaylä markächöqa, atska jirkakuna y qochakunam kan, y tsëkuna rikapakoq ëwëqa wamra kanqäpitam gustamashqa. Y animalkunatapis kuyämi. Wamra karqa, llapan chushchu y mishi rikanqätam mellqakurkuyta munaq kä. Peru winarirqa, tsë animalkunata sufritsiyanqanta rikarmi, tsë nunakunapa contran churakarqä. Y noqanö yarpaq nunakunawanmi juntakarqä.

Animalkunapa qaratsankunawan o qarankunawan röpata rurayanqan wayikunamanmi, tsëta mana rurayänampaq michäkoq ëwayarqä. Y mana allikunata rurëkäyanqanta nirmi, willakuykunata jipiyarqä. Tsëta rurayanqäpitam, animalkunapa qaratsankunawan o qarankunawan röpakunata ruraqkunaqa, prësu apayämänampaq denunciayämarqan y atska kutim juiciuchö karqä.

Waktsakunata mana cäsuyanqanta rikar y mana alli tratayanqanta rikarmi, pëkunapa derëchunkunata defendeq grüpukunaman yëkurqä. Tsëchöqa llapan puëdinqämannömi yanapakurqä. Tsëpitanam waktsakunata y imankunapis mana kapoqkunata yanapanäpaq kallpachakurqä.

Tsënö kaptimpis, mana alli rurëkunataqa mana ushakätsita puëdinäpaq kaqtam musyarirqä. Wakin juiciukunachö ganarpis masqa perdiyaqmi kayä. Më tsëchömi mana alli ruraqkunallata y pimampis mana yarpachakoqkunata rikaq kä. Y manam imatapis rurëta puëdirqätsu.

BIBLIACHÖ YACHAKUNQÄMI YANAPAMARQAN:

Mana imatapis rurëta puëdirmi Teyta Diosman y Palabranman yarpar qallëkurqä. Unëqa Jehoväpa testïgunkunawan estudiashqam karqä y gustamarqanmi yachakunqä. Tsënö kaptimpis, manam Bibliachö yachakunqänö kawëta munarqäraqtsu. Peru tsëpitaqa munarqänam.

Bibliäta yapë leyinqämi mana llakikunäpaq yanapamarqan. Tsëchöqa nunakuna animalninkunata cuidayänampaqmi parlan. Jukqa karqan, Proverbius 12:10-mi, kënömi nin: “Alli nunaqa wätantapis ankupanmi [o llakipanmi]” (Teyta Diospa Willakïnin). Y musyarirqämi, tsë mana alli rurëkunaqa Teyta Diospa culpan mana kanqanta. Tsëpa rantinqa, nunakuna mana wiyakoq kayanqampitam. Teyta Jehovä kuyakoq y alli Dios kanqanta musyanqämi yanapamarqan (Salmus 103:8-14).

Bibliapita yapë yachakuyta munarmi, ¿Imakunatataq Biblia yachatsimantsik? libruwan yachatsiyämänampaq mañakurqä. Tsëllachömi juk wawqiwan warmin Bibliapita yachatsiyämänampaq wayïman chäyämurqan. Y tsëpitaqa reunionninkunamampis ëwar qallëkurqämi. Ichikllapa ichikllapam yachakunqäkuna shonqüman chärirqan.

Bibliachö yachakunqämi yanapamarqan cigärru fumëta y borrächu këta dejanäpaq. Mas allim parlakoq kä y mas allinam rikakoq kä, y autoridäkunatapis respetarqänam (Romänus 13:1). Y mananam juk warmiwan juk warmiwan purikoqnatsu kä.

Nunakunaqa mana alli rurëkunata mana ushakätsita puëdiyänampaq kaqta musyarir, këkanqä grüpukunata dejanäqa manam fäciltsu karqan. Tsënö kaptimpis, Diospa Gobiernunlla mana alli rurëkunata ushakätsinampaq kaqta musyarirqa, imëkata rurarmi llapan puëdinqämannö tsë Gobiernupita yachatsikurqä (Mateu 6:33).

¿IMACHÖTAN YANAPAMASHQA?

Unëqa, wakin nunakuna allita rurayanqanta y wakin nunakuna mana allita rurayanqantam yarpaq kä. Y mana allita ruraq nunakunataqa chikipaqmi kä. Bibliapita yachakunqäqa mana chiki kanäpaq y llapan nunakunata kuyanäpaqmi yanapamashqa (Mateu 5:44). Kuyakoq kanqätaqa tukuynöpam rikätsikuyta puëdï. Juknöpaqa Diospita wakin nunakunata yachatsirmi. Diospita yachatsikunqäqa kanan y shamoq tiempupis yamë y kushishqa kawakuyänampaqmi nunakunata yanapan.

Kamakoq Yayantsik Jehoväqa, manam dejanqatsu animalkunata y waktsa nunakunata mana allita rurayänanta. Y kë shumaq Patsantsikta ushakätsiyänantapis. Gobiernunwanmi, Jehoväqa imëka mana allikunata altsamunqa (Isaïas 11:1-9). Llapampis altsakänampaq kaqta musyar y wakin nunakunata tsëpita yachatsirmi, kananqa kushishqa këkä. Teyta Jehovälla llapanta altsamunampaq kaqtaqa allim musyä.