¿Imanirtaq awkinyantsik y wanuntsik?
DIOSQA manam munarqantsu nunakuna wanuyänanta, tsëmi punta teytantsikkunata jutsannaq kayänampaq kamarqan. Adanwan Ëvaqa, kanan witsanyaqmi kawëkäyanman karqan. Tsënö kanampaq kaqtaqa musyantsik, Eden huertachö juk montipaq Jehovä Diosnintsik Adanta ninqanchömi.
Kënömi nirqan: “Tsëta mikurqa, mikunqëki junaqmi wanunki” (Genesis 2:17). Awkinyänan y wanunan këkaptinqa, manachi Jehovä Diosqa Adanta tsënö ninmantsu karqan. Adanqa musyarqanmi tsë montipa frütanta mana mikurqa, mana wanunampaq kaqta.
DIOSNINTSIKQA MANAM MUNARQANTSU NUNAKUNA WANUYÄNANTA
Tsë montipa frütanta mana mikurninqa, Kamakoqninta cäsukïkäyanqanta y pëlla mandakunampaq derëchuyoq kanqantam rikätsikuyanman karqan. Mëtsika frütakunam tsë huertachöqa karqan, tsëmi Adanwan Ëvaqa Dios michäkunqan frütataraqtsu mikuyänan karqan (Genesis 2:9).
¿IMANIRTAQ ADANWAN ËVAQA WANUYARQAN?
Adanwan Ëva imanir wanuyanqanta musyanapaqqa, pëkunawan juk mana alli angel imapita parlayanqantam alli musyanantsik. Tsë angelqa Satanasmi karqan, pëqa Diospa contranmi juk culebrawan ulikurqan o llullakurqan, y tsëta ruranqanqa kanan kamayaqmi sufritsimantsik. Bibliachömi kënö nimantsik: “Jehovä Diosqa imëka rikoq chukaru animalkunatam kamashqa karqan, peru culebraqa llapampitapis mas vïvun kaqmi karqan. Y warmitam kënö tapurirqan: ‘¿Rasumpaku Diosqa niyäshurqunki ni mëqan plantapa frütantapis mana mikuyänëkipaq?’” (Genesis 3:1).
Ëvanam kënö nirqan: “Huertachö këkaq llapan plantakunapa frütantam mikïta puëdiyä. Peru huerta chowpinchö këkaq plantapa frütampaqqa, Diosqa kënömi nishqa: ‘Ama mikuyankitsu ni yatayankitsu, tsëta rurarqa, wanuyankim’”. Tsënam Satanasqa kënö nirqan: “Manam wanuyankitsu. Antis tsë plantapa frütanta mikurirqa, imëkatam musyariyanki, y Diosnömi kayanki: ima alli kanqanta y ima mana alli kanqantam musyariyanki”. Tsënö nirninqa, Jehovä mana alli Dios kanqanta y ulikoq kanqantam Satanasqa nikarqan (Genesis 3:2-5).
Ëvaqa tsënö ninqanta creirqanmi. Tsëmi tsë früta alläpa munapëpaq kanqanta rikarnin mikurirqan. Tsëpita ima pasanqantam Bibliaqa kënö nimantsik: “Nunanwan juntu këkarnin, pëtapis tsë frütata qararirqan, y pëpis mikurirqanmi” (Genesis 3:6).
Adantam Dios kënö nirqan: “Tsëta mikurqa, mikunqëki junaqmi wanunki” (GENESIS 2:17).
Kuyashqa wamrankuna mana cäsukoq kayanqanta rikarqa, ¡Diosnintsik Jehoväqa alläpachi llakikurqan! ¿Imatataq rurarqan? Adantam kënö nirqan: “Sudanqëkiyaq alli trabajar-ran pachata tarinki, y tsënömi kawanki hasta allpaman kutinqëki junaqyaq, tsëpita rurashqam kanki. Allpapitam kanki, y allpamanmi tikranki” (Genesis 3:17-19). Adanqa, isqun pachak kima chunka watayoq këkarmi wanurqan (Genesis 5:5). Y wanurirqa, manam ciëlutatsu nï juk sitiutatsu ewkurqan. Jehovä Dios allpapita manaraq ruraptinqa Adanqa manam kawarqanraqtsu, tsëmi wanurpis chipyëpa ushakärirqan.
¿IMANIRTAQ JUTSANNAQ NUNATSU KANTSIK?
Diosta mana cäsukuyanqanrëkurmi, Adanwan Ëvaqa jutsannaq y mana wanushpa kawëta oqrayarqan. Tsëpita patsëqa, qeshyapäkoq y jutsata ruraq nunanam tikrariyarqan. Peru mana cäsukoq kayanqanqa, manam pëkunallatatsu mana alliman chätsirqan, sinöqa llapan wamrankunata o mirëninkunatam. Tsëmi Romänus 5:12 textuqa kënö nin: “Juk nunarëkurllam llapan nunakunaman jutsa yëkurqan, y jutsarëkurnam pëkunaman wanï charqan, y tsënömi wanïqa llapan nunakunaman chärirqan, llapankuna jutsata rurayashqa kayaptin”.
Diospa Palabranqa nimantsik, juk jatun mantädanö wanïqa llapan nacion nunakunata wankïkanqantam (Isaïas 25:7). Tsë mantädaqa, juk wanutsikoq pukutënömi llapan nunakunaman chëkan, y manam pillapis salvakïta puëdintsu. Awmi, Adan ruranqanrëkurmi llapan nunakuna wanïkäyan (1 Corintius 15:22). Tsëmi apostol Pablunöpis llapantsik kënö tapukuntsik: “¿Piraq libramanqa tsënö wanïman apëkämaq cuerpupita?”. ¿Pillapis yanapamënintsikta puëdintsuraq? (Romänus 7:24).