Bibliachö ninqannömi nunakunaqa ‘imëka problëmakunapa pasantsik y wallka tiempulla kawantsik’ (Job 14:1). ¿Tsënö kawanapaqtsuraq Diosnintsik kamamarquntsik, o kushishqa kawanapaqtsuraq? Kushishqa kawanapaq kamamashqantsik kaptinqa, ¿imëllaqa tsënö kawashuntsuraq? Këchömi yachakunki imanö kawanata Diosnintsik munanqanta.

1 KAQ: ¿Imanö kawakunatataq Diosnintsik munan?

Teyta Jehoväqa kushishqa kawakunatam munan. Tsëmi Adantawan Ëvata juk shumaq huertachö kawayänampaq kamarqan: Eden huertachö. Y kënö nirmi bendicirqan: “Mëtsika tikrayänëkipaq y patsachö junta kayänëkipaq wamrëkikuna atska katsun. Qamkunapa makikikunachömi kanqa [...], patsachö llapan kawaq animalkuna, y entëru patsapis” (Genesis 1:28). Jehoväqa munarqan wamrayoq kayänanta, entëru Patsata shumaqta tikratsiyänanta, animalkunata cuidayänanta y mana qeshyar imëyaqpis kawakuyänantam.

Kanan tiempuqa manam qallananchö Jehovä munanqannötsu kawëkantsik,a peru Jehoväqa manam nunakunapaq munanqanta qonqashqatsu (Isaïas 46:10, 11). Jehoväqa munan llapan cäsukoq nunakuna kushishqa y imëyaqpis yamë kawakuyänantam, y tsëtam ruramunqa (leyi Apocalipsis 21:3, 4).

2 KAQ: ¿Imatataq ruranantsik kushishqa kawanapaq?

Jehoväqa pë yanapamänata necesitaqtam kamamarquntsik, tsëmi pëta reqita y adorëta munantsik (leyi Mateu 5:3-6). Jehoväqa munan pëwan amïgu kanantsikta, pë ‘munanqannö kawanantsikta’, pëta kuyanantsikta y llapan shonquntsikwan sirwinantsiktam (Deuteronomiu 10:12; Salmus 25:14). Jehoväwan amïgu kar y pëta sirwirqa imëka problëmakuna kaptimpis manam alläpa llakikushuntsu, y kushishqam kawakushun.

3 KAQ: Jehoväqa nunakuna kushishqa kawayänantam munan

VIDEUTA rikäyë y këpaq parlayë:

VIDEU: ¿Imapaqtaq Patsata Dios kamarqan? (wakin kaqlla) (1:41)

• ¿Imanirtan Diosnintsikqa Patsata shumaqta kamarqan?

Leyiyë Eclesiastes 3:11 ima ninqanta y këpaq parlayë:

• ¿Imapaqtan Jehoväqa kamamarquntsik?

4 KAQ: Jehoväqa llapan ninqantam cumplinqa

Leyiyë Salmus 37:11, 29 y Isaïas 55:11 ima ninqanta y këpaq parlayë:

• ¿Imanirtan nintsik Jehoväqa llapan ninqanta cumplimunampaq kaqta?

5 KAQ: Jehoväta sirwirllam kushishqaqa kantsik

VIDEU: Kananqa musyänam imapaq kawanqäta (5:03)

• ¿Imatan Olgata yanaparqan kushishqa kawakunampaq?

Leyiyë Eclesiastes 12:13 ima ninqanta y këpaq parlayë:

• Noqantsikpaq Jehovä ruranqankunapitaqa, ¿imanötan agradecikunqantsikta rikätsikushwan?

KËTAM YACHAKURQUNKI

Jehoväqa munan Patsachö kushishqa, yamë y mana wanur kawakunatam. Kanan tiempupis Jehoväta sirwirqa kushishqam kawakuntsik.

¿Yarpankiku?

• ¿Imanö kawayänampaqtan Adantawan Ëvata Jehovä kamarqan?

• ¿Imanirtan nintsik noqantsikpaq Jehovä munanqan cumplikänampaq kaqta?

• ¿Imataraq rurankiman kushishqa kawakunëkipaq?

MASTA YACHAKUY

Eden huerta rasumpa kashqa kanqanta yachakuy.

“¿Rasumpatsuraq Eden huertachö punta teytantsikkuna yachayarqan?” (Täpakoq, 1 de enëru 2011)

Patsa mana ushakänampaq kaqta imanir creiyanqanta yachakuy.

“¿Patsaqa imëllapis ushakanqatsuraq?” (jw.org päginachö yarqamoq)

Imata rurar kushishqa kanëkipaq kaqta yachakuy.

“¿Imapaqtan kawantsik?” (jw.org päginachö yarqamoq)

Juk nuna imëkayoq karpis mana kushishqa kanqanta rikë.

Kananqa kushishqam kawakü (3:55)

2 KAQ: ¿Pikunawantaq Jesusqa gobernanqa?

Pikunawan Jesus gobernayänampaq kaqta willakurmi Bibliachö kënö nin: ‘Llapan kastapita, idiömapita, markapita y nacionkunapitam gobernayanqa’ (Apocalipsis 5:9, 10). Patsachö Jesus kanqan tiempupitaqa mëtsika millon nunakunam pëpa qateqnin tikrayashqa. Tsënö kaptimpis, 144 mil nunakunallam Jesuswan ciëlupita gobernayämunqa (leyi Apocalipsis 14:1-4). Wakin kaqkunaqa Jesucristu Patsata gobernamuptinmi mana wanurna kawakuyanqa (Salmus 37:29).

Jesusqa ciëluchö gobernëkannam, y ichikllachönam Patsatapis gobernamunqa. Këchömi yachakunki tsë Gobiernu imakunata ruramunampaq kaqta y imanir tsëkuna kushikuypaq kanqanta.

1 KAQ: ¿Imatataq Diospa Gobiernun ruramunqa yamë y alli kawakunapaq?

Armagedon guërrachömi mana alli nunakunata y gobiernukunata Jesus ushakätsinqa (Apocalipsis 16:14, 16). Tsënömi cumplikanqa Diosnintsik Bibliachö kënö änikunqan: “Ichikllanam faltan mana alli nunakuna ushakäyänampaq” (Salmus 37:10). Jesus gobernaptinqa entëru Patsachö nunakunam yamë y alli kawakuyanqa (leyi Isaïas 11:4).

2 KAQ: ¿Imanöraq kanqa Diospa voluntänin Patsachö cumplikäriptin?

Diospa Gobiernunchöqa “Allita ruraq nunakunapaqqa kë patsam herenciankuna kanqa, y tsëchömi imëyaqpis alli kawakuyanqa” (Salmus 37:29). ¡Ima shumaqraq kanqa mana alli nunakuna manana kayaptin, llapan nunakuna kuyanakuyaptin, mana qeshyayaptin y Jehovällata imëyaqpis sirwir kawakuyaptin!

3 KAQ: Mana alli ruraqkunata ushakäratsirqa, ¿imatataq Diospa Gobiernun ruranqa?

Llapan mana alli ruraqkunata ushakäratsirqa waranqa watapam Jesus gobernanqa. Jesusmi 144 mil ciëlupita gobernamoqpaq kaqkunawan llapan nunakunata jutsannaq këman chäyänampaq yanapayanqa. Waranqa wata Jesus gobernar ushariptinmi entëru Patsa juk shumaq huertaman tikranqa. Tsëchömi Jehoväta cäsukoq nunakunaqa kushishqa imëyaqpis kawakuyanqa. Y Jehovällanam llapampa gobernaqnin kanqa, tsënömi Diospa jutinta llapankuna respetayanqa (Mateu 6:9, 10). Llapankunam rikäyanqa Jehovälla alli gobernaq kanqanta. Tsëpitanam Satanasta, demoniukunata y gobiernumpa contran churakaqkunata Jehovä ushakäratsinqa (Apocalipsis 20:7-10). Diosnintsikpa gobiernunchöqa yamë y kushishqam imëyaqpis kawakushun.

MASLLA YACHAKUSHUN

4 KAQ: Diospa Gobiernunqa llapan gobiernukunatam ushakätsinqa

“Nunaqa, nuna mayinta dominarpis kikinllam mana allichö ushan” (Eclesiastes 8:9). Llapan gobiernukuna mana allita rurayanqantam Jehoväpa Gobiernunqa altsamunqa.

Leyiyë Daniel 2:44 y 2 Tesalonicensis 1:6-8 y ima ninqanta y këkunapaq parlayë:

• Jehoväwan Jesusqa, ¿imatataq gobiernukunata y yanapaqninkunata rurayanqa?

• ¿Imanirtan ninkiman Jehoväwan Jesus gobernamurqa llapantapis allillata rurayänampaq kaqta?

5 KAQ: Jesusllam alli gobernaqqa

Jesus gobernarqa imëkatam ruramunqa llapan nunakuna kushishqa kayänampaq. VIDEUCHÖ rikäyë nunakunata yanapanampaq Diospa poderninwan Jesus imëkakunata ruranqanta.

VIDEU: Jesus gobernar imakunata ruramunampaq kaq (1:13)

Jesusqa Patsachö këkar nunakunata yanapanqannöllam gobernarpis ruramunqa. Qateqnin recuadruchömi Jehovä ruramunampaq kaqkunata willakun. Tsëchö änikuykunapitaqa, ¿mëqantan mas gustashunki? Llapan textukunata leyiyë.

6 KAQ: Diospa Gobiernunchöqa kushishqam kawakushun

VIDEU: Ichikllachönam shumaq Patsachö kawakushun (4:38)

Leyiyë Salmus 145:16 ima ninqanta y këpaq parlayë:

• ¿Ima ninkitan llapankunata Jehovä bendicinampaq kaqta musyarnin?

KËTAM YACHAKURQUNKI

Diospa Gobiernunqa Patsatam juk shumaq huertaman tikratsinqa. Tsëchöqa cäsukoq nunakunallam kawayanqa, y Jehovällatanam imëyaqpis sirwiyanqa.

¿Yarpankiku?

• ¿Imatataq Diospa Gobiernunqa ruranqa Jehoväpa jutin respetashqa kanampaq?

• ¿Imanötan musyantsik Diospa Gobiernun Jehovä änikunqankunata cumplimunampaq kaqta?

• Jehovä llapan änikunqampitaqa, ¿mëqan cumplikänantataq mas munanki?

MASTA YACHAKUY

Armagedon guërrapaq Bibliachö ima ninqanta yachakuy.

“¿Imatan Armagedon guërraqa?” (jw.org päginachö yarqamoq)

‘Alläpa sufrimientu’ kanqan witsan imakuna pasanampaq kaqta yachakuy (Mateu 24:21).

Bibliachö alläpa sufrimientu tiempupaq parlarqa, ¿imapaqtan parlëkan? (jw.org päginachö yarqamoq)

Diospa Gobiernunchö kawar imata rurayänampaq kaqman juk familia pensëkanqanta rikë

Shumaq Patsachöna këkanqëkiman pensë (1:50)

Juk nunata Diospita yachakunqan imanö yanapanqanta musyanëkipaq “Imëkata musyëta munarmi yarpachakurqä” neqta leyi.

“Bibliam yanapashqa jukläyana kawakuyänampaq” (Täpakoq, 1 de enëru 2012)