Wawqikunawan y panikunawan juk kastanölla kawakuy

Wawqikunawan y panikunawan juntu karqa gobernaq Davidnömi sientikuntsik. Pëmi kënö nirqan: “¡Rikäyë! Imanö shumaqmi wawqikuna y panikunaqa, ¡juk kastanölla kushishqa kawakuyan!” (Salmus 133:1). Tsëmi wawqikunawan y panikunawan juk kastanölla kawakunapaqqa llapantsik kallpachakunantsik.

1 KAQ: ¿Jehoväpa sirweqninkuna imanö kayanqantan mas gustashunki?

Juk nacionchö mëqan congregacionmampis ëwarqa capaz parlakuyanqan idiömata entiendinkitsu, peru familiëkiwan këkaqnömi sientikunki. Më congregacionchöpis y ima idiömachöpis Testïgukuna Bibliapita yachakur leyiyänäpaq, rikäyänäpaq y wiyayänäpaq kaqkunaqa igual-llam. Y mëchö karpis, juknïkuna juknïkunam kuyanakuyä y llapäkunam ‘Jehoväpa jutinta alabayä’ y ‘juntu adorayä’ (Sofonïas 3:9).

2 KAQ: ¿Imatataq rurankiman wawqi panikunawan juk kastanölla kawakunëkipaq?

“Jukniki juknikikuna llapan shonquykikunawan alläpa kuyanakuyë” (1 Pëdru 1:22). Këchö ninqanta cäsukunapaqqa, manam yarparäkunantsiktsu wawqikuna o panikuna imanö kayanqan mana gustamanqantsikta, sinöqa allikunata rurayanqantam imëpis cuentachö katsinantsik. Y manam amïguntsik kaqkunallawantsu juntakunantsik, sinöqa llapankunata reqinapaq y alli tratanapaqmi kallpachakunantsik (leyi 1 Pëdru 2:17).a

3 KAQ: ¿Imataraq rurankiman juk wawqiwan o paniwan ofendinakurqa?

Kuyanakurpis, jutsa ruraq karmi höraqa ofendinakuntsik y llakitsinakuntsik. Tsëmi Diosnintsikpa Palabranchö kënö nimantsik: “Aguantanakur sïguiyë” y “Teyta Jehovä qamkunata perdonayäshunqëkinölla, qamkunapis shonqupita perdonanakuyë” (leyi Colosensis 3:13). Jehovätaqa mëtsika kutiraq ofendintsik, peru pëqa perdonamantsikmi. Tsëmi munan wawqintsikkunata y panintsikkunata perdonanantsikta. Piwampis llakitsinakurqa amishtanëkipaqmi kallpachakunëki (leyi Mateu 5:23, 24).b

MASLLA YACHAKUSHUN

4 KAQ: Llapankunata igualpa tratë

Llapan wawqi panintsikkunatam kuyantsik. Peru capazchi fäciltsu kanqa llapankunawan amïgu këqa. ¿Imaraq yanapamäshun llapankunawan juk familianölla kawakunapaq? Leyiyë Hëchus 10:34, 35 ima ninqanta y këkunapaq parlayë:

• Këchö ninqannöpis, Jehoväqa permitin mëtsë nacionkunapita nunakuna sirwiyänantam. Tsëqa, ¿imanöraq tratankiman juk nacionpita kaqkunata?

• ¿Pikunatataq markëkichöqa mana alli tratayan? ¿Imanirtan pitapis mana alli tratanëkitsu?

Leyiyë 2 Corintius 6:11-13 ima ninqanta y këpaq parlayë:

• ¿Imatan yanapashunkiman wawqi panikunata mas kuyanëkipaq?

5 KAQ: Pipis ofendishuptiki perdonë y amishtë

Jehoväqa manam pitapis ofendintsu, peru noqantsikqa cada junaqmi pëta ofendintsik, tsënö kaptimpis pëqa perdonamantsikmi. Leyiyë Salmus 86:5 ima ninqanta y këkunapaq parlayë:

• ¿Jehovä imanö kanqantataq kë versïculu yachatsimantsik?

• ¿Imanirtan agradecikunkiman Jehovä perdonakoq kanqanta?

• ¿Ima cäsukunachötan wakinkunawan juk familianö kawakuyqa fäciltsu kanman?

¿Imatataq ruranantsik Jehovänö perdonakoq kanapaq y wawqi panikunawan juk familianölla kawakunapaq? Leyiyë Proverbius 19:11 ima ninqanta y këpaq parlayë:

• ¿Imataraq rurankiman pipis mana alli tratashuptiki o ofendishuptiki?

Hörataqa noqantsikmi jukkunata ofendintsik. Tsëqa, ¿imataraq rurashwan? VIDEUTA rikäyë y këpaq parlayë:

VIDEU: Llapankunawan yamë kanqantsikrëkur bendicionkuna (6:01)

• Videuchö rikanqantsik paniqa, ¿imatataq rurarqan ofendinakuyanqan paniwan amishtayänampaq?

6 KAQ: Wawqi panikuna alli rurayanqankunata imëpis yarpäshun

Wawqikuna y panikunaqa imëkatam rurayan Jehoväta sirwiyänampaq, peru höraqa imallachöpis pantariyanmi. ¿Imatataq ruranantsik allikunata rurayanqanta cuentata qokunapaq? VIDEUTA rikäyë y këpaq parlayë:

VIDEU: ¡Mas yachanëpaq këta procurë! (5:11)

• ¿Imatan yanapashunkiman wawqikuna y panikuna allikunata rurëta procurayanqanta rikänëkipaq?

Jehoväqa allikunata ruranqantsiktam cuentachö katsin. Leyiyë 2 Crönicas 16:9a ima ninqanta y këpaq parlayë:

• ¿Imanötan sientikunki allita ruranëkipaq kallpachakunqëkita Jehovä cuentachö katsinqanta musyar?

KËTAM YACHAKURQUNKI

Kuyakoq y perdonakoq kanqantsikqa wawqi panikunawan juk familianölla kawakunapaqmi yanapamäshun.

¿Yarpankiku?

• ¿Imataraq rurankiman llapankunata igualpa tratanëkipaq?

• ¿Imataraq rurankiman juk wawqiwan o paniwan ofendinakurqa?

• ¿Jehovänö perdonakoq këta munankiku? ¿Imanir?

MASTA YACHAKUY

Jukkunata mana juzganapaq Jesus yachatsikunqanta rikë.

¡Nawikichö këkaq terräduta jorqë! (7:01)

Mana ofendishqa këkarqa, ¿perdonta mañämanku?

“Perdonta mañakunqantsikqa juk familianölla kawakunapaqmi yanapamantsik” (Täpakoq, 1 de noviembri 2002)

Llapantapis igualpa tratayänampaq wakin nunakunata ima yanapashqa kanqanta rikë.

Ama rikanqantsikllapitaqa pitapis juzgashuntsu (5:06)

Wawqi panikunawan ofendinakurpis juk familianölla kawakunëkipaq imata ruranëkipaq kaqta yachakuy.

“Problëmakunata kuyakïwan altsashun” (Täpakoq, mäyu 2016)