¿Atska jutiyoqku Diosqa?

Bibliachö yachakunqantsik

Teyta Diospa jutinqa jukllëllam. Hebreu idiömachöqa kënömi qellqayarqan יהוה y castellänuchöqa “Jehovämi”.a Sirweqnin Isaïastawanmi Teyta Dios jutinta kënö qellqatsirqan: “Jehovämi kä. Tsëmi jutï” (Isaïas 42:8). Juk jutikunapita y tukuynöpa Diosta reqiyaptin o qayayaptimpis, punta qellqayanqanchöqa Teyta Diospa jutinqa 7.000 kutipitapis masmi yurin.b

¿Jehovätaqa juk jutikunawampis reqiyanku?

Bibliachöqa Teyta Diospa jutin jukllëlla kanqantam nin. Tsënö kaptimpis, imanö kanqampitam juknöpapis reqiyan. Wakin nunakuna imanö reqiyanqampita yachakurishun.

Imanö kanqampita reqiyanqan	Bibliachö qellqayanqan	¿Ima ninantan?
Alä	(Bibliachö kantsu)	Ärabe nunakunaqa Alä nirmi Diosta reqiyan. Tsënöqa niyan, katsiyanqan Bibliachö Dios nir churayänampa rantin Alä nir churayashqa kayaptinmi. Tsënö kaptimpis manam Diospa jutintsu.
Alfa y Omëga	Revelacion [Apocalipsis] 1:8; 21:6; 22:13	Jehovä Diostaqa Alfa y Omëga nirpis reqiyanmi. Tsë ninanqa, Jehovälla “punta kaq y ushanan kaq” o “qallanan kaq y ushanan kaq” kanqanmi. Y kikinmi kënö nin: “Noqapa puntätaqa manam ni ima Dios kashqatsu, y qepämampis manam juk kashqatsu” (Isaïas 43:10).
Mituwan Trabajaq	Isaïas 64:8	Imanömi mitu taqllaqqa mituta makinchö katsin, tsënöllam Jehoväpis nunakunawan y gobiernukunawan imëkata rurëta puëdin (Romänus 9:20, 21).
Llapampa Janampa Këkaq	Salmus 47:2	Teyta Jehoväwanqa manam ni pï ni imapis igualantsu.
Imëpis Kawaq Awkin	Daniel 7:9, 13, 22	Teyta Diosqa manaraq ni pï ni ima kaptinmi karqanna. Pëllam unëpita y imëyaqpis Diosqa (Salmus 90:2).
Pëllata Adorayänanta Munaq	Exodu 34:14	Teyta Diosqa manam santukunata adoranata munantsu, tsëmi kënö nimantsik: “Noqallam TEYTA DIOSNIKI kä. Juk dioskunata adorayaptikiqa alläpam piñakü” (Teyta Diospa Willakïnin [TDW]).
Kamakoq	Isaïas 40:28	Teyta Diosllam llapanta kamaq.
Dios	Genesis 1:1	Nunakunaqa Dios niyan, pitapis o imatapis adorayanqantam. Jehovä Diostaqa respëtuwan rikashqa y imëkatapis allita ruraq kanqampitam ʼElohím nirpis reqiyan.
Yachanëpaq Dios	1 Timoteu 1:11	Teyta Diostaqa reqiyan kushishqa kanqampitam (Salmus 104:31). Tsëmi Bibliachöqa, “kushishqa Dios” kanqanta nin.
Dioskunapa Diosnin	Deuteronomiu 10:17	Teyta Dioswanqa manam ni ichikllapis, “mana väleq santukunaqa” igualayantsu (Isaïas 2:8).
Yachatsikoq	Isaïas 30:20, 21)	Kikintsikpa biennintsikpaq yachatsimaqnintsik, y alli nänipa ëwanapaq pushamaqnintsikmi (Isaïas 48:17, 18). Bibliachöqa kënöpis ninmi: “Alli Yachatsishoqniki”.
Imëkata Kamaq	Salmus 149:2	Teyta Diosqa llapan imëkakunata kamaqmi (Revelacion [Apocalipsis] 4:11 ).
Mañakunqantsikta Wiyaq Dios	Salmus 65:2	Diosman markäkur o yärakur mañakushqaqa wiyamäshunmi.
Teyta	Mateu 6:9	Teyta Dios munaptinmi kawëkantsik.
Mitsikoq	Salmus 23:1	Teyta Diosqa sirweqninkunata yanapëkanmi.
Yanapakoq Dios	Isaïas 41:14, (TDW)	Teyta Diosqa, tsurin Jesuspa wanuyninwanmi jutsapita y wanuypita llapan nunakunata salvamarquntsik (Juan 3:16).
Imëpita imëyaqpis Rey	Revelacion [Apocalipsis] 15:3	Teyta Diosllam imëpita imëyaqpis mandakoq kanqa.
Qaqa	Salmus 18:2, 46	Teyta Diosqa imëkapita tsapämaqnintsik y salvamaqnintsikmi.
Salvakoq	Isaïas 45:21	Teyta Diosqa wanuypita, ushakëpita y mana allikunapitam salvamäshun.
Allillata Ruraq	Proverbius 9:10	Teyta Diosllam imëpis allillata ruraqqa.
Señor	Salmus 135:5	Teyta Diospam llapampis; hebreuchöqa ʼAdhóhn y ʼAdhoním ninmi.
Ciëluchö y Patsachö Autoridäyoq	Genesis 15:2	Hebreuchöqa ’Adhonái ninmi.
Llapampitapis mas Puëdeq	Daniel 7:18, 27	Teyta Diosnöqa manam ni pï kantsu.
Llapampaq Poderyoq	Genesis 17:1	Teyta Diosllam imëkapaq poderyoqqa. Hebreuchö ’El Schaddái ninanqa, Dioslla “Llapampaq Poderyoq” kanqantam rikätsikun. Bibliachöqa, qanchis kutin tsë palabra yurin.
Angelkunata Mandaq	Isaïas 1:9, Romänus 9:29	Teyta Diosqa mëtsika angelkunapa mandaqninmi. Wakin Bibliachöqa kënömi niyan: “Tröpakunata mandaq Jehovä” o “angelkunata mandaq TEYTA DIOS” (Romänus 9:29, Nueva Traducción Viviente).
Noqaqa: “NOQAM KÄ”	Exodu 3:14, Teyta Diospa Willakïnin	“Noqam kä” nirqa, Teyta Diosqa llapan munanqanta ruranampaq kaqtam rikätsikun. Tsëmi pëqa kënö nin: “Noqaqa Rikätsikushaq Munanqäta Logrëta Puëdeq Kanqätam” o “Noqaqa munanqa Këmanmi Chäshaq” (Traducción del Nuevo Mundo [con referencias]; nota). Kë ninqankunaqa, Exodu 3:15-chö Diospa jutin Jehovä ima ninan kanqantam rikätsimantsik.

Hebreu Idiömachö Diospa Palabran willakunqan sitiukuna

Wakin sitiukunapa jutinkunataqa Diospa jutintawanmi churayashqa, tsëtam Bibliachö willakun. Peru tsëkunaqa, manam Diosta juknöpa qayayanqantatsu rikätsikun.

Sitiu	Bibliachöqa, ¿mëchötan yurin?	¿Ima ninantan?
Jehovä-Nisï	Exodu 17:15	“TEYTA DIOSMI Bandërä” (Teyta Diospa Willakïnin). Tsëqa rikätsikun, sirweqninkuna juntakäyanqanchö yanapakoq Dios, Jehovä kanqantam (Exodu 17:13-16).
Jehovä-Salum	Juëces 6:23, 24, Teyta Diospa Willakïnin	Teyta Diosmi alli kawëta qaran.
Jehovä-Sama	Ezequiel 48:35, Teyta Diospa Willakïnin	“TEYTA DIOS Täkunan”.
Jehovä-Yirë	Genesis 22:13, 14, Teyta Diospa Willakïnin	“TEYTA DIOSMI yuritsimunqa”.

Teyta Diospa jutinta reqishun y mëchö këkarpis parlashun

¿Imanirtan Jehovä Diosqa mëtsika kuti Palabranman jutinta qellqatsimushqa? (Malaquïas 1:11).
Señornintsik Jesucristuqa, Teytampa jutinta mëtsika kutim parlarqan y alläpam respetarqan. Tsëmi Teytan Jehoväman mañakur kënö nirqan: “Jutiki alläpa respëtuwan rikashqa katsun” (Mateu 6:9; Juan 17:6).
Teyta Diosta reqinapaqqa, puntataqa jutintaran reqinantsik. Pëta mas reqishqaqa masmi kuyamäshun y noqantsikpis masmi kuyashun (Salmus 9:10; Malaquïas 3:16). Tsënö kuyanakushqaqa, Teyta Jehovä änikunqanta cumplimuptin kushishqam kawakushun. Bibliachömi nimantsik: “Kuyamaqkunataqa noqam salvashaq. Shutïta sumätsiqkunataqa imëpis cuidashaqmi” (Salmus 91:14).
Diospa Palabranmi nin: “Dioskuna nir reqishqa kaqkuna ciëluchö o patsachö kaptimpis, imanöllam mëtsikaq ‘dioskuna’ y mëtsikaq ‘señorkuna’ kan” (1 Corintius 8:5, 6). Peru Bibliachö Diospa jutin yurinqanqa rikätsimantsik, Jehovälla rasumpa Dios kanqantam (Salmus 83:18).

a Wakin Bibliakunamanqa “Yahweh” o “Yahvë” nirmi, yachaq nunakuna qellqayashqa.

b Jäh nir Teyta Diospa jutinta qellqayanqanqa, 50 kutinömi Bibliachö yurin. Y Alelüya palabraqa, “Jähta alabayë” ninanmi (Revelacion [Apocalipsis] 19:1; TNM).