¿Alli nuna karllaku kushishqa y alli kawakunki?

Unë witsampitanam nunakunaqa pensayan alli nuna karqa warë warätin alli kawakuyänampaq kaqta. 551 y 479 watakunachö kawashqa Confucio jutiyoq nunam kënö nirqan: “Mana alli tratayäshunëkita mana munanqëkinölla pitapis mana alli tratëtsu”.a Asia nacionkunachö nunakunaqa tsë nuna ninqantam yarpäyan.

MËTSIKAQMI ALLI NUNA KAYÄNAMPAQ KALLPACHAKUYAN

Mëtsikaqmi creiyan alli portakurqa warë warätin alli kawakuyänampaq kaqta. Tsëmi kallpachakuyan respetakoq, alli tratakoq y markankunachö alli portakoq kayänampaq. Vietnam nacionpita Linh jutiyoq warmim kënö nin: “Imëpis alli portakur y pitapis mana engañarqa alli kawakunäpaq kaqtam pensaq kä”.

Tsë warmillam waktsa y wayinnaq nunakunata mikuynin qarëkan.

Religionninkunachö niyaptinllam wakin nunakunaqa jukkunata yanapayan. Taiwan nacionpita Hsu-Yun jutiyoq nunam kënö willakun: “Noqataqa yachatsiyämarqan pipis wanuptinqa, allita rurashqa karqa wak vïdachö kushiqa kawakunqanta y mana allita rurashqa karqa sufrinqantam”.

¿ALLI NUNA KAYANQANQA YANAPAKUSHQAKU?

Tsë warmillam tardina llakishqa y utishqa wamran mellqakushqa këkan.

Jukkunata yanapanqantsikqa alli kawakunapaq yanapakunmi. Peru wakinkunaqa cuentatam qokuyashqa, alli karnimpis alli kawakuyta mana puëdiyanqanta. Hong Kong markapita Shiu Ping jutiyoq warmin kënö willakun: “Cuentatam qokurqö wakinkunapaq allita ruranqantsikpis alli kawakunapaq mana yanapakunqanta. Noqaqa alli portakunäpaq y familiäta alli cuidanäpaqmi kallpachakoq kä, peru tsënö kallpachakuykaptïpis nunäqa noqata y wamrätam dejarayämarqan”.

Pï mëmi niyan ima religionchö kanqantsikqa alli nuna kanapaq mana yanapakunqanta. Japon nacionpita Etsuko jutiyoq warmim kënö willakun: “Juk religionmanmi ëwaq kä y jövinkunata yanapanäpaqmi churayämarqan. Peru tsëchöqa jukwan jukwan kakuyanqanta, mandakoq këta munar chikinakuyanqanta y nunakuna churayanqan qellëtapis lluta utilizäyanqanta rikarmi religionmanqa confiakurqänatsu”.

“Noqaqa alli portakunäpaq y familiäta alli cuidanäpaqmi kallpachakoq kä, peru tsënö kallpachakuykaptïpis qowäqa noqata y wamrätam dejarayämarqan” (SHIU PING, HONG KONG MARKAPITA)

Wakinkunata yanapayänampaq y alli nuna kayänampaq kallpachakuyanqampis, mana imapaq sirwinqantam religiösu nunakunapis cuentata qokuyashqa. Vietnam nacionpita Van jutiyoq warmitam tsënö pasarqan. Pëmi kënö willakun: “Yanapayämänampaq kaqta pensarmi wanushqa familiäkunapaq cada junaq frütankuna, wëtankuna y mikuyninkuna churaq kä. Mëtsika watakunapam allikunata y religionnïpa costumbrinkunata rurarqä, peru tsëkunata rurëkaptïpis nunäqa alläpam qeshyakurkurqan y juk nacionchö estudiëkaq 20 watayoqlla wamrämi wanukuykurqan”.

¿IMANIRTAN ALLI NUNALLATSU KANANTSIK?

Wakinkunata yanapëqa allim, peru warë warätin alli kawakunapaqqa manam tsëllatatsu ruranantsik. Tsëpaq Diospa Palabran Bibliachö ima ninqanta rikärishun.

MANAM LLAPANKUNATSU ALLI KAQTA RURËTA MUNAYAN

“Imallatapis pantëkushqaqa llapanmi mana alli tikrarin” (ECLESIASTES 9:18).

Juk nuna alli kawakuyta munar allita ruranampaq kallpachakuptimpis, jukkuna kikinkunallaman yarpar mana allita rurayaptinmi sufriyan. Këllaman pensarishun, muyakoq qeshya kaptin autoridäkuna nimashwan wakinkunawan mana juntakunapaq. Peru tsënö kaptimpis jukkuna mana cäsukuyaptinqa, salornintsikmi peligruchö kanman.

MËTSIKAQMI IMA ALLI Y IMA MANA ALLI KANQANTA MUSYAYANTSU

“Wakin nunakunaqa mana allita rurarpis allita rurëkäyashqantam yarpäyan. Tsënö yarpar kawakurpis wanïmanmi ëwëkan” (PROVERBIUS 14:12).

Mëtsikaq nunakunam pensayashqa allita rurëkäyanqanta. Peru cuentatam qokuyashqa tsënö mana kanqanta. Allita rurëta munarpis mana allikunata decidirninqa mana allichömi ushashun.

ILLAQPITAM IMAPIS PASAKUN

“Manam musyayankitsu kawënikikuna warë imanö kanampaq kaqta” (SANTIÄGU 4:14).

Imëka allita ruraq nunapis illaqpita imapis pasaptinmi wanun. Mëtsikaqmi COVID-19 muyakoq qeshya witsan wakinkunata yanapëkar wanuyashqa. China nacionpita Liting jutiyoq warmipa papäninmi juk accidentichö wanurqan. Pëmi kënö willakun: “Manam creirqätsu imanir juk alli nuna wanunqanta. Papänïqa alli nuna, alli trabajaq y humildim karqan, peru pëllam tsë accidentichöqa wanurqan”.

Alli nuna kanqantsik warë warätin alli kawakunapaq mana yanapakuptinqa, ¿imatan yanapamäshun? Tsëpaqqa confiakuypaq y alli consëjukunatam necesitantsik. ¿Tsëtaqa mëchötan tarishwan?

a Confucio nuna imata yachatsikunqanta masllata musyëta munarqa El hombre en busca de Dios neq librupa 7 kaq capïtulumpa 31 a 35 kaq pärrafunkunata leyiri, tsë librutaqa rurayämushqa Jehoväpa testïgunkunam y www.jw.org Internet päginachömi tarinki.