¿Musyarqëkiku?

¿Imanirtan Bibliamanqa wakin palabrakunata kutin kutin churayashqa?

BIBLIATA qellqaqkunaqa, höraqa wakin palabrakunataqa kutin kutinmi churayashqa. ¿Imanirtan tsënö churayashqa? Capazchi kë kimanta cuentachö katsir tsënö churayarqan:

Imë qellqayanqan. Unë Israel nacionchöqa, cäsi llapan israelïtakunanam leypa copiantaqa katsiyaqtsu. Leyta leyiyanqanta wiyayänampaqqa, Diospa carpa wayinchö o templuchöraqmi juntakäyaq (Deut. 31:10-12). Mëtsika nunakunawan juntu y atska hörakunapa shëkarlla wiyakuyänanqa mananachi fäciltsu karqan (Neh. 8:2, 3, 7). Tsë hörakunachö juk asuntullapaq yachatsikoqkuna kutin kutin parlayanqanchi wiyaqkunata yanapaq mana qonqayänampaq y wiyayanqannö rurayänampaq. Dios mandakunqankunata y leyninkunatam masqa kutin kutin yachatsikuyaq wiyaqkuna mana qonqayänampaq (Lev. 18:4-22; Deut. 5:1).

Imanö qellqayanqan. Salmus, Cantar de los Cantäres y Lamentaciönes librukunaqa cancionkunam kayan y Bibliapa wakin librunkunachöpis cancionkunataqa tarintsikmi. Wakin cancionkunaqa cörruyoqmi kayan. Tsënöqa kaq imapaq cantëkäyanqanta mana qonqayänampaq y palabrakunata fäcil-lla yachakuyänampaqmi. Imanö kanqanta entiendinapaq Salmus 115:9-11 ninqanta leyirishun: “Teyta Jehoväman confiakuy Israel. Pëmi yanapashunki y escüdu cuenta tsapäshunki. Aaronpa kastankuna, Teyta Jehoväman confiakuyë. Pëmi yanapayäshunki y escüdu cuenta tsapäyäshunki. Teyta Jehoväta respetaqkuna, Jehoväman confiakuyë. Pëmi yanapashunki y escüdunömi tsapäshunki”. Tsë shumaq cancionta cantarqa fäcil-llachi yachakuriyaq y yarpäyaqpis.

Imanir qellqayanqan. Bibliata wakin qellqaqkunaqa tsë palabrakunallata kutin kutin qellqayaq parlëkäyanqan alläpa precisaptin y alli entiendiyänanta munarmi. Këllaman pensarishun: yawarta mana mikuyänampaq israelïtakunata mandarmi, Jehoväqa Moisesta nirqan imanir mana mikuyänampaq kaqta kima kutipa ninampaq. Diosqa munarqan, vïdaqa yawarchö këkanqanta alli entiendiyänantam (Lev. 17:11, 14). Tiempuwannam, Jerusalenchö apostolkuna y anciänukuna Diospa rikëninchö alli këta munarqa imakunata mana rurayänampaq kaqta parlayarqan, y tsë kutipis yapëmi parlayarqan yawarpita cuidakuyänampaq (Hëch. 15:20, 29).

Bibliachö tsë palabrakunallata kutin kutin churashqa kayaptimpis, manam dememoria yachakuykur tsëllata kutin kutin parlanapaqtsu nikämantsik. Jesusmi kënö nirqan: “Teyta Diosman mañakurqa [...] ama kutin kutin tsëllata ninkitsu” (Mat. 6:7). Y nirqanmi tsë asuntullapaq mañakurpis, Diospa voluntänimpaqnö kaptinqa, juknöpapis mañakunapaq kaqta (Mat. 6:9-13). Jehoväman mañakunqantsik höra tsë palabrallata kutin kutin mana nirpis, mañakuykanqantsik asuntupaqqa juknöpa juknöpam mëtsika kuti mañakuyta puëdintsik (Mat. 7:7-11).

¡Palabran Bibliaman tsë palabrakunallata kutin kutin qellqatsinqanqa kushikuypaqmi! Tsënömi Alläpa Alli Yachatsikoq Teytantsik Jehoväqa biennintsikpaq yachatsimantsik (Is. 48:17, 18).