Jehoväpa testïgonwan parlëkan ¿Jesusqa Diosku?

JEHOVÄPA TESTÏGONKUNATAQA vecïnonkunawan parlëqa alläpam gustayan. ¿Ima tapukïpa respuestanllatapis Bibliawan musyëta munankiku? ¿Testïgokuna rurayanqampita o creiyanqampita imallatapis musyëta munankiku? Tsënö kaptinqa, imëllapis pëkunawan parlarqa musyëta munanqëkikunapita tapuri, kushishqam willariyäshunki.

Qateqninchömi rikärishun imëpis parlayanqannö juk Testigo juk warmita parlapëkaqta. Testigo kaqpa Carmen jutin katsun y wayiyoq kaqpana Susana katsun.

¿Rasunku Testïgokunaqa Jesusman creiyankitsu?

Susana: Testïgokuna Jesusman mana creiyanqantam pastornïqa nin, ¿rasumpaku?

Carmen: Manam. Jesusmanqa creiyämi. Y pëman markäkï o yärakuyga alläpam precisan salvakunapaq.

Susana: Noqapis tsënöllam nï.

Carmen: Tsëpinqa ishkantsikpis igual-llam pensantsik. Noqapa jutïqa Carmenmi, y ¿qampaqa?

Susana: Susanam.

Carmen: Noqapis kushikömi Susana. Itsa tapukunki Jesusman creikäyaptïpis, nunakuna “manam creiyantsu” niyanqanta.

Susana: Awmi, musyëta munämi.

Carmen: Susana, Jesusmanqa alläpam markäkuyä, pero nunakuna Jesuspita tukïta niyanqanmanqa manam creiyätsu.

Susana: Imanötaq tsëqa, ¿willaramankimanku?

Carmen: Awmi, wakinkunaqa Jesus juk alli nunalla kanqantam niyan, pero noqakunaqa manam tsënötsu creiyä.

Susana: Noqapis manam.

Carmen: Jina igual-llam pensantsik. Jehoväpa testïgonkunaqa manam creiyätsu Jesus yachatsikunqampa contran yachatsikïkunataqa.

Susana: ¿Tsëwanqa ima nïtataq munanki?

Carmen: Atskaq religionkunachömi Jesus Dios kanqanta yachatsikuyan. Itsachi qamtapis tsënö yachatsiyäshurqunki.

Susana: Awmi, Dioswan Jesus jukllëlla kayanqantam pastornïpis nin.

Carmen: ¿Manatsuraq más alli kanman kikin Jesus ninqanta yachakurnin rasun kaqta musyanantsik?

Susana: Awmi, tsënöchi alli kanman.

¿Imatataq yachatsikurqan Jesus?

Carmen: Këpita parlaq juk versïculota rikärishun. Leirishun Juan 6:38 textota, Jesusmi nirqan: “Noqaqa que patsaman shamushqa cä manam quiquï munashqäcunata ruranäpaqtsu, sinoqa cachamaq Papänïpa muneninta ruranäpaqmi”. Si Jesus Dios këkaptinqa manachi rasun kaqtatsu kë texto nikanman.

Susana: ¿Tsëwanqa ima nïtataq munëkanki?

Carmen: Cuentata qokushqaqa kikimpa munëninta mana ruranampaq kë Patsaman shamunqantam nirqan Jesusqa.

Susana: Rasuntam ninki, kachamoqnimpa munëninta ruranampaq shamunqantam nirqan.

Carmen: Pero Jesus Dios këkaptinqa, ¿pitaq kachamurqan ciëlopita? ¿Imanirtaq Jesusqa Kachamoqnimpa voluntadninta ruranan karqan?

Susana: Tentearïnam ima nïta munanqëkita. ¿Pero manam segürotsu kä kë versïculoqa Jesus mana Dios kanqanta rikätsikunqanta?

Carmen: Juk kutichö Jesus ninqanta rikärishun. Juan 7:16 texto ninqanta, ¿leiramunkimantsuraq?

Susana: Allim kanqa. “Tsenam Jesus nerqan: Manam quiquï munanqäcunatatsu yachatsicü, sinoqa cachamaqnï parlashqancunatam.”

Carmen: Gracias. Kë versículo ninqannö, ¿kikimpa pensënintaku Jesus yachatsikurqan?

Susana: Manam. Kachamoqnin mandanqannölla yachatsikunqantam nirqan.

Carmen: Rasuntam ninki. Y tsëqa, ¿pitaq Jesusta kachamurqan? ¿Pitaq tsënö yachatsikunampaq nirqan? ¿Manatsuraq Jesuspita más precisaq kaq? Imanö kaptimpis kachaq kaqmi más precisaqqa ëwaq kaqpita.

Susana: ¡Shumaqtaq tsëqa! Kë textotaqa manam imëpis leishqatsu kä.

Carmen: Jina pensari Juan 14:28 textochö Jesus ninqanman: “‘Eucushaqnam y qamcunamanmi cutimushaq’ nishqäta wiyayarqonquim. Noqata cuyamarnïqa Dios Yayaman cuticunäta musyarninmi cushicuyanquiman, porqui noqa puedeq canqäpitaqa pemi [“Teytämi”, NM] mas puedeq”. Kë versículo ninqannö, ¿Papäninwan igual kayanqantaku Jesus nikarqan?

Susana: Manam, Papänin más puëdeq kanqantam nirqan. Tsënö karqa pëpitapis más precisaq Dios kanqantam pensä.

Carmen: Awmi, tsënömi. Y leirishun Mateo 28:18 texto ninqanta. Kë versïculochömi qateqninkunata Jesus kënö nirqan: “Diosmi churamashqa, sieluchopis y que patsachopis mandacunäpaq”. ¿Imëpis mandakoq kanqantaku Jesus nikarqan?

Susana: Manam. Antis chaskinqantam nirqan.

Carmen: Pero kikin Jesus Dios karqa, ¿imanöraq mandakoq këta chaskinman karqan? ¿Y piraq qonman karqan?

Susana: Tsëtaqa alleqran pensashaq.

¿Pimantaq mañakïkarqan?

Carmen: Jesus Dios mana kanqanta más musyanapaqqa, juk yachatsikï masmi kan.

Susana: ¿Mëqan yachatsikïtaq tsëqa?

Carmen: Jesus bautizakunqanmi. Rikärishun Lucas 3:21, 22 textokuna ninqanta. ¿Leiramunkimantsuraq?

Susana: “Llapan nunacuna bautisacuyanqancho[mi] Jesuspis bautisacorqan. Tsechonam Diosman Jesus mañacuptin, sielupita imeca palumano Santu Espiritu urämur, Jesusman chämorqan. Sielupeqnam Dios queno nimorqan: Qammi cuyë tsurï: canqui. Qamrecurmi allapa cushicü.”

Carmen: ¿Cuentata qokunkiku bautizakunqan höra Jesus imata rurëkanqanta?

Susana: Teytanmanmi mañakïkarqan.

Carmen: Awmi. Tsëqa, “si Jesus Dios karqa, ¿pimantaq mañakïkarqan?”.

Susana: Tsë tapukïqa allim. Pastornïtam tsëta tapushaq.

Carmen: Jina Jesus yakupita yarqaramuptin ciëlopita pï parlapämunqanta musyëpis precisanmi. ¿Ima nimunqantapis cuentata qokurqunkiku?

Susana: Jesus kuyë Tsurin kanqanta y pëwan alläpa kushikunqantam nimurqan.

Carmen: Rasunmi. Pero sï Jesus Dios kaptinqa, ¿pitaq ciëlopita tsënö nikämurqan?

Susana: Tsëmampaqa manam imëpis pensarqötsu.

¿Ima nirta ‘Teyta’ y ‘Tsuri’ kayan?

Carmen: Masran kan. Jesusqa Teytampaqnö Diospaq parlanqantam leirirquntsik. Y Jesus bautizakuriptinnam Tsurintanö ciëlopita parlapämurqan. Awmi, kikin Jesuspis Diospa Tsurin kanqantam nirqan. Pero ishkampis igual-lla kayanqanta pensarqa, ¿ima igualatsikïwantaq entienderatsimankiman?

Susana: Ishkaq wawqikunawan.

Carmen: Itsa tsë niraqlla gemëlokuna kayanman. Pero Jesusqa Diosta Teyta nirqanmi y kikimpaqnam Tsuri kanqanta nirqan. Tsëpinqa, ¿imatataq Jesus yachatsikïta munëkarqan?

Susana: Tantiarïnam. Jesusqa parlëkarqan pëpita mayor y más puëdeq kaqpaqmi.

Carmen: Awmi, tsëpaqmi. Këman pensari: ishkantsikpis pensantsik igual-lla gemëlokunamanmi. Jesus Dios karqa, ¿manatsuraq alli yachatsikoq këninchö tsë igualatsikïwan o juk más clärowampis yachatsikunman karqan imanö kanqanta musyayänampaq?

Susana: Ruranmanchi karqan.

Carmen: Tsëpa rantinqa ‘Teyta’ y ‘Tsuri’ nishpam parlarqan Teytanwan imanö kayanqantapis rikätsikunampaq.

Susana: Tsënöpa entiendiqa shumaqmi.

¿Imatataq yachatsikuyarqan Jesuspa punta qateqninkuna?

Carmen: Manaraq ëwakuptï, ¿tiempïki kaptinqa juk más yachatsikïta rikärishwantsuraq?

Susana: Allim kanqa, mä raslla rikärishun.

Carmen: Jesus Dios kaptinqa, qateqninkunapis pëpita clärochi willakuyanman karqan.

Susana: Tsëqa allinömi.

Carmen: Y manam Bibliachö tarintsiktsu qateqninkuna tsënö yachatsikuyanqanta. Rikärishun Jesuspa punta qateqnin apóstol Pablu ninqanta. Filipenses 2:9 textom claro rikätsikun Jesus wanuriptin y kawariramuptin Dios imata ruranqanta, leirishun: “Dios[mi] sieluchopis y que patsachopis llapanpa mas presisaq mandacoqnin cananpaq churarerqan”. Kë versículo ninqannö, ¿imatataq Dios rurarqan Jesuswan?

Susana: Mandakoq kanampaq churanqantam nin.

Carmen: Awmi. Pero manaraq wanurnin Dioswan igual këkaptinqa y tsëpita mandakoq kanampaq churariptinqa, ¿manatsuraq Diospita más puëdeq kanampaq churëkanman karqan? ¿Imanöraq Diospita más puëdeqqa pipis kanman?

Susana: Manam pipis puëdentsu.

Carmen: Noqapis qamnöllam pensä. Llapan yachakurinqantsikkunaman yarpashqaqa, ¿Jesus Dios kanqantam Biblia yachatsikun ninkimantsuraq?

Susana: Manachi. Tsëpa rantinqa Diospa Tsurin kanqantam nin.

Carmen: Pero Jehoväpa testïgonkunaqa alläpam respetayä Jesusta. Dios awnikunqan Mesias kar llapan nunakunata salvanampaq wanunqanmanmi creiyä.

Susana: Noqapis tsënömi creï.

Carmen: Tsëpinqa, ¿noqantsikrëkur Jesus wanunqanta agradecikunqantsikta imanöraq rikätsiköman?, nir itsa tapukunki.a

Susana: Höra höraqa tapukurqömi.

Carmen: Itsa juk junaq kutiramüman tsë tapukïpita Biblia ima ninqanta yachakurinapaq. ¿Shamoq semana kë höranö wayichötsuraq kanki?

Susana: Awmi, këchömi kashaq.

Carmen: ¡Tsëqa allim kanqa! Shamoq semänanam tinkurishun.

[Päginapa ura kuchunchö willakï]