‘Ëwayë qatimaqnïkuna tikrayänampaq yachatsiyë’

1, 2. (1) Mateu 28:18-20 textu ninqannö, ¿imatataq Jesusqa llapantsikta mandamarquntsik? (2) ¿Ima tapukïkunapitataq kë yachatsikïchö yachakushun?

JESUSQA kawariramurninmi discïpulunkunata nishqa karqan, juk jirkachö ëllukäyänampaq kaqta. Pëkunaqa alläpa kushishqachi këkäyarqan Jesuswan tsëchö karnin (Mat. 28:16). Y tsë kutichöqa itsa ‘pitsqa pachak wawqikunapita y panikunapitapis masta yuripurqan’ (1 Cor. 15:6). ¿Imanirtaq Jesusqa tsë jirkaman qayatsirqan? Kë precisaq carguta qonampaqmi: “Ëwayë y qatimaqnïkuna tikrayänampaq llapan nacionkunapita nunakunata yachatsiyë” (leyi Mateu 28:18-20).

² Jesus ninqankunata cäsukoq kaqkunaqa, apostolkuna kawayanqan tiempuchö punta congregacionmi kayarqan. Y pëkunapa precisaq rurëninkunaqa karqan, Jesuspa qateqninb kayänampaq nunakunata yanapëmi. Kananqa entëru Patsachömi mëtsika congregacionkuna kan, y punta cristiänukunanöllam Jesus mandakunqanta rurëkäyan. Kë yachatsikïchömi kë chusku tapukïkunata contestashun: ¿Imanirtaq alläpa precisan Jesuspa qateqnin kayänampaq nunakunata yachatsinantsik? Jesus mandakunqanta cumplinapaqqa, ¿imakunatataq ruranantsik? Diospita yachakïta munaqkunata tarinapaqqa, ¿llapantsikku yanapakïta puëdintsik? Jesuspa discïpulunkuna kayänampaq nunakunata yachatsirninqa, ¿imanirtaq pacienciakoq kanantsik?

¿IMANIRTAQ ALLÄPA PRECISAN JESUSPA QATEQNIN KAYÄNAMPAQ NUNAKUNATA YACHATSINANTSIK?

3. Juan 14:6 y 17:3 textu ninqannö, ¿imanirtaq alläpa precisan Jesuspa qateqnin tikrayänampaq nunakunata yachatsinantsik?

³ Jesuspa qateqnin tikrayänampaq nunakunata yachatsinantsikqa alläpam precisan. Porqui tsënöllam Diospa amïgun këta puëdiyanqa. Jinamampis, kanan tiempu alli kawakuyänampaq y shamoq tiempuchö mana wanushpa kawakuyänampaqmi yanapanqa (leyi Juan 14:6; 17:3). Jesusqa alläpa precisaq cargutam qomashqantsik, peru tsë rurëchöqa manam noqantsikllatsu këkantsik. Apostol Pablum nirqan wakin cristiänukunapis ‘Diospa minkankuna’ kayanqanta (1 Cor. 3:9). Jutsasapa këkashqapis Jehoväwan Jesusqa alläpa precisaq cargutam qomashqantsik.

4. ¿Imatataq yachakuntsik Ivanpita y Matildipita?

⁴ Diospita nunakunata yachatsiqa alläpam kushitsimantsik. Rikärishun Colombia nacionchö Ivanwan warmin Matildi Diospita yachatsikur imanö sientikuyanqanta. Pëkunaqa Davier jutiyoq jövintam Diospita parlapäyarqan. Tsë jövinqa kënömi nirqan: “Vïdächö cambiukunata rurëtam munä, peru manam puëditsu”. Pëqa qellëpaq pelyaq nunam karqan, drögata shoqoq y alläpam upyaq. Jinamampis, Ërika jutiyoq shipashwanmi mana casakushpa wätanakuyaq. Wawqi Ivanmi kënö willakun: “Bibliapita yachatsiyänäpaqmi biciclëtawan wayinta ëwayaq kayä. Wayinqa alläpa karuchömi karqan y nänipis leqitam karqan. Portakïninchö Davier cambiukunata ruranqanta rikarmi, parëjan Ërikapis Bibliata estudiar qallëkurqan”. Tiempuwanmi Davierqa drögakunata, washku upyëta y qellëpaq pelyëta dejarirqan y wätanakuyanqan warmiwampis casakurirqanmi. Panintsik Matildinam kënö willakun: “Davierwan Ërikaqa 2016 watachömi bautizakuriyarqan, y tsë junaqmi kënö ninqanta yarpäriyarqä: ‘Vïdächö cambiukunata rurëtam munä, peru manam puëditsu’. Bautizakunqanta rikarmi alläpa kushikur waqariyarqä”. Rikanqantsiknöpis, Diosta sirwiyänampaq wakinkunata yanapëqa alläpam kushitsimantsik.

JESUS MANDAKUNQANTA CUMPLINAPAQQA, ¿IMAKUNATATAQ RURANANTSIK?

5. Nunakuna Diospa sirweqnin tikrayänampaqqa, ¿imatataq ruranantsik?

⁵ Puntataqa Jehoväpita yachakïta munaqkunatam ashinantsik (Mat. 10:11). Jehoväpa sirweqninkuna rasumpa kanqantsiktaqa rikätsikuntsik, llapan nunakunata parlaparninmi. Y Jesuspa rasumpa qateqninkuna kanqantsiktaqa rikätsikuntsik, mandamanqantsikta cäsukurninmi.

6. Diospita yachatsikunqantsikta chaskikuyänampaqqa, ¿imatataq ruranantsik?

⁶ Wakin nunakunaqa Diospita yachatsinantsiktam shuyarëkäyan, peru wakinqa yachakïta mana munaqnö kayanqantam rikätsikuyan. Tsëmi yachakïta munayänampaqnölla yachatsinantsik. Yachatsikunqantsikta nunakuna chaskikuyänampaqqa, imapita parlapänapaq kaqtam alleq musyanantsik. Tsëpaqqa alleqmi akranantsik nunakuna imapita yachakïta munayanqanta y tsëpitanam imanö parlapar qallanapaq kaqta alistakunantsik.

7. (1) ¿Imanötaq Diospita yachatsikur qallashwan? (2) ¿Imanirtaq nunakunata alleq wiyanantsik y creiyanqanta respetanantsik?

⁷ Itsa kënö yachatsikur qallashwan: “Kanan witsanqa imëka mana allikunapam pasantsik. Tsë altsakänampaqqa, ¿entëru patsachö juk gobiernullataku wanantsik? ¿Imatataq qamqa tsëpita ninki?”. Itsa tsëpitana Daniel 2:44 textuta leyipurir entiendiratsishwan. O itsa kënöpis parlapar qallashwan: “Juktam tapurïnikita munä. ¿Wamrantsikkunata alli wätanapaqqa imataraq ruranantsik?”. Tsënö tapurirnam, Deuteronomiu 6:6, 7 textupita parlapärishwan. Nunakunata imapita parlapänapaq kaqta manaraq akrarmi, alleqraq pensanantsik Bibliapita yachakuyanqan imanö yanapanampaq kaqman. Y nunakunawan parlarninqa, nimanqantsikkunatam alleq wiyanantsik y creiyanqantam respetanantsik. Tsënö rurarqa, masmi entiendishun y pëkunapis masmi wiyakïta munayanqa.

8. ¿Imanirtaq nunakunata kutin kutin watukaq kutinantsik?

⁸ Bibliapita pitapis yachatsir manaraq qallarninqa, itsa wayinman seguïdu kutinantsikpaq tiempuntsikta patsätsinantsik. Porqui watukar qallarninqa manam wayinkunachö tarintsiktsu o ocupädu këkäyanqantam tarintsik. Jinamampis, noqantsikman mas confiakuyänampaq y Bibliapita yachakïta munayänampaqqa itsa kutin kutinraq watukaq ëwanantsik. Imanömi juk planta winanampaqqa yakun seguïdu jichanantsikta wanan. Tsënöllam pipis Jehoväta y Jesusta kuyanampaqqa Bibliapita seguïdu parlapänantsik.

DIOSPITA YACHAKÏTA MUNAQKUNATA TARINAPAQQA, ¿LLAPANTSIKKU YANAPAKÏTA PUËDINTSIK?

9, 10. ¿Imanirtaq nintsik Diospita yachakïta munaqkunata tarinapaqqa llapantsik yanapanakunqantsikta?

⁹ Jehoväpa sirweqninkunaqa llapantsikmi Diospita yachakïta munaqkunata tarinapaq yanapanakuntsik. Kë rurënintsikqa juk oqrakashqa wamrata ashinömi. Tsëta maslla entiendinapaq rikärishun juk pasakunqanta. Kima watayoq oqrakashqa wamrata ashiyänampaqmi, 500 nunakuna yanapakuyarqan. Cäsi 20 höranöna ashikarmi jara chakrachö këkaqta juk nuna tarirqan. Peru pë tarishqa karnimpis manam nunakuna alabayänanta munarqantsu. Kënömi nirqan: “Llapantsikmi yanapanakur ashinqantsikpita tarirquntsik”.

¹⁰ Mëtsikaq nunakunam tsë oqrakashqa wamranö sientikuyan. Mana allikuna ushakänanta mana shuyararpis, yanapayänantam wanayan (Efes. 2:12). Öchu millonpitapis masmi, Jehoväpa testïgunkunaqa tsënö nunakunata ashikantsik. Itsa noqantsikqa Bibliapita yachakïta munaqkunata tarintsiktsu, peru wakin cristiänu mayintsikkunaqa tariyanmi. Tsënö kaptimpis alläpam kushikuntsik cristiänu mayintsikkuna Diosta sirwiyänampaq pitapis yanapayaptin.

11. Pitapis Bibliapita yachatsita mana puëdirnimpis, ¿imanötaq yanapakïta puëdintsik?

¹¹ Itsa kanan höra pitapis Bibliapita yachëkätsintsiktsu, peru juknöpapis yanapakïta puëdintsikmi. Tsëllaraq reunionkunaman shamoqkunatam yanapëta puëdintsik. ¿Imanö? Shumaq saludarnin y alli sientikuyänampaq parlaparninmi. Tsënö kuyakoq kanqantsikta rikarmi kikinkuna cuenta qokuyanqa Jesuspa qateqninkuna rasumpa kanqantsikta (Juan 13:34, 35). Jina reunionkunachö parlakunqantsikmi pëkunata yanapanqa yachakïkäyanqampita parlakuyänampaq. Y mushoq publicadorkunawan yachatsikoq yarqïtapis procuranantsikmi, tsënöpam pëkunatapis yanapashun yachatsikurnin Bibliata alli utilizäyänampaq. Tsëkunata rurarqa, Jesus ruranqannölla rurayänampaqmi yanapashun (Lüc. 10:25-28).

12. Diospita nunakunata yachatsinapaqqa, ¿yachaqraqku kanantsik? Willakaramï.

¹² Diosta sirwiyänampaq nunakunata yanapanapaqqa manam yachaqraqtsu kanantsik. Tsëtam rikätsikun Boliviapita panintsik Faustïna. Testïgukunawan Bibliapita yachakur qallarninqa manam leyïta yacharqantsu, peru kananqa ichikllapis leyita puëdinnam. Kë panintsiktaqa alläpam gustan nunakunata Diospita yachatsï. Y cada semänam pitsqaqta Bibliapita yachatsin. Yachatsinqan nunakunanö leyita mana yacharpis, panintsik Faustïnaqa joqta nunakunatam bautizakuyänampaq yanapashqa (Lüc. 10:21).

13. Alläpa ocupädu këkarnimpis Diosta sirwiyänampaq nunakunata yanaparninqa, ¿imanötaq sientikushun?

¹³ Jehoväpa mëtsikaq sirweqninkunaqa imëka rurëyoqmi kayan. Tsënö kaptimpis, tiempunkunatam rakiyan estudiu Biblicuta dirigiyänampaq, y tsëta rurarmi alläpa kushishqa sientikuyan. Melanie panipa ejemplunta rikärishun. Pëqa japallanllam 8 watayoq warmi wamranta wätarqan. Cada semänam pitsqa junaq trabajaq y cancer qeshyawan qeshyëkaq papänintam cuidaq. Täranqan Alaskachö këkaq markanchöqa pëllam Jehoväpa testïgun karqan. Y alläpa alalaptimpis Jehoväta mañakïkurmi yachatsikoq yarqoq. Tsënöqa ruraq, Bibliapita yachakïta pillatapis tarita munarmi. Y tarirqanmi, Sära jutiyoq warmitam Diospa jutimpita yachatsirqan y alläpam kë warmiqa kushikurqan tsëta musyarir. Y tiempuwanqa Bibliapita yachakurmi qallëkurqan. Panintsik Melaniem kënö willakun: “Viernis tardikunapaqa alläpa utishqam sientikoq kä. Tsënö kaptimpis wamräwanmi estudiuta dirigeq ëwayaq kayä. Y Sära tapuyämanqankunata contestayänäpaq publicacionkunachö respuestakunata ashïmi alläpa gustayämaq. Jina Jehoväta mas kuyanqanta rikarpis alläpam kushikuyarqä”. Särataqa ëwanqan iglesiachö amïgunkuna y familiakunam mana allipa tratar qallëkuyarqan. Peru pëqa Jehoväta sirwinampaqmi bautizakurirqan.

JESUSPA DISCÏPULUNKUNA KAYÄNAMPAQ NUNAKUNATA YACHATSIRNINQA, ¿IMANIRTAQ PACIENCIAKOQ KANANTSIK?

14. (1) ¿Imawantaq Jesusqa igualatsirqan Diospita yachatsikunqantsikta? (2) ¿Imata ruranapaqtaq 2 Timoteu 4:1, 2 textuqa yanapamantsik?

¹⁴ Diospita yachakïta munaqkunata mana tarirnimpis, ama pensashuntsu pitapis bautizakunampaq yanapëta manana puëdinqantsikta. Yarpäshun, Jesusqa yachatsikunqantsiktaqa igualatsirqan pescäduta tsarï trabäjuwanmi. Pescadorkunaqa paqaskunapa o qoyakunapam pescayan y höraqa karutaran barcuwan ëwayan. Tsënö kaptimpis höraqa manam ni juk pescädullatapis tsariyantsu (Lüc. 5:5). Tsënöllam wakin testïgukunapis pacienciawan më tsëchö y imë höra karpis Diospita yachatsiyänampaq nunakunata ashiyan. Tsënö yachatsikuyanqampitam wakinqa tariyashqa Bibliapita yachakïta munaqkunata. ¿Manatsuraq noqantsikpis nunakunata mas tarinqantsik hörakunachö yachatsikushwan? (Leyi 2 Timoteu 4:1, 2).

15. Nunakunata Bibliapita yachatsinapaqqa, ¿imanirtaq pacienciakoq kanantsik?

¹⁵ ¿Imanirtaq pacienciakoq kanantsik nunakunata Bibliapita yachatsinapaq? Porqui manam Biblia imata yachatsikunqanllatatsu yachatsita munantsik, sinöqa Jehoväta reqiyänanta y kuyayänantam munantsik. Y manam qateqninkunata imata rurayänampaq Jesus mandakunqanllatatsu yachatsinantsik, sinöqa mandakunqanta imanö cäsukuyänampaqmi yanapanantsik. Y pacienciawanmi yanapanantsik Bibliapa consëjunkuna ninqannö cambiukunata rurayänampaq. Porqui wakinqa mas tiemputaran wanayan cambiayänampaq, peru wakinqa rasllam cambiariyan.

16. Y Raulpitaqa, ¿imatataq yachakuntsik?

¹⁶ Perü nacionchö juk misionëruta pasanqanmi rikätsimantsik pacienciakoq kanantsik alläpa precisanqanta. Pëmi kënö willakurqan: “Bibliapita yachatsinqä Raul jutiyoq nunaqa ishkë librutanam estudiashqa karqan. Tsënö kaptimpis, manam cambiukunata rurashqatsu karqan. Casädu vïdanchömi alläpa mana alli kawakoq, y lluta parlakoqmi karqan, tsëmi wamrankunapis respetayaqtsu. Peru reunionkunaman seguïdu shamuptinmi, pëta y familianta yachatsirnin y yanaparnin sïguirqä. Reqinqäpita kima wata pasarinqanchömi cambiukunata rurarqan y bautizakurirqan”.

17. ¿Imatataq qateqnin kaq yachatsikïchö yachakushun?

¹⁷ Jesusmi kënö nishpa mandakurqan: “Ëwayë y qatimaqnïkuna tikrayänampaq llapan nacionkunapita nunakunata yachatsiyë”. Tsëta cäsukunapaqqa, noqantsiknö mana pensaq nunakunawan y Diosman mana creeq nunakunawanmi parlanantsik. Qateqnin kaq yachatsikïchömi yachakushun, tsë nunakunata Diospa Gobiernumpita imanö yachatsinapaq kaqta.