¿Kanan tiempu nunakuna imanö kayänampaq kaqta Bibliachö willakurqanku?

Bibliachö ima ninqan

Awmi. Bibliachöqa willakurqannam, tiempu pasanqanmannö nunakuna mas mana allikunata rurayänampaq kaqta. Y ¡tsëtam rikantsik! Kanan tiempu nunakunaqa manam respetanakuyannatsu, imëka mana allikunatam rurayan y munayanqannömi kawakuyan (2 Timoteu 3:1-5).a Peru Bibliachöqa willakurqanmi wakin nunakunaqa jukläya kayänampaq kaqta. Tsë nunakunaqa Teyta Dios yanapaptinmi alli portakuyan (Isaïas 2:2, 3).

Këkunatam yachakushun:

¿Kanan tiempu nunakuna imanö kayänampaq kaqtataq Bibliachö willakurqan?

Bibliachöqa willakushqanam karqan kanan tiempu nunakunaqa kikinkunallaman pensar imëka mana allikunata rurayänampaq kaqta. Nunakunaqa peqankunata o umankunata tsarëta mana yachaq, kikinkunallata kuyakoq y Diosta cäsukuyänampa rantin munayanqanta rurakoqmi kayänan karqan (2 Timoteu 3:2-4).

Bibliachö ninqanqa llapanmi cumplikëkan. Kanan tiempu nunakunaqa kikinkunallamanmi pensayan; kikinkunalla kushishqa këta, imëkayoq këta y imëkata logrëtam munayan. Tsëmi wakinkunaqa niyan, kanan tiempu nunakunaqa imëpitapis mas kikinkunallaman pensayanqanta. Tsënö nunakunaqa kikinkunallaman pensarmi allikunata rurëtaqa munayantsu, y allita ruraqkunatapis manam valurayantsu. Manam imëkayoq kayanqampita ni pëkunapaq imatapis rurayanqampita agradecikuyta yachayantsu (2 Timoteu 3:2, 3).

Bibliachöqa willakushqanam karqan nunakunaqa kikinkunallam pensar kënö kayänampaq kaqta:

Ambiciösu. Mëtsikaq nunakunam qellëta alläpa kuyayan. Pëkunaqa pensayan mëtsika qellëyoq y imëkayoq kar-raq pipis väleq kanqantam (2 Timoteu 3:2).
Orgullösu. Pïmë nunakunam “alabakoq, allish tukoq” y “alläpa orgullösu” kayan (2 Timoteu 3:2, 4). Imatapis rurëta yachayanqampita, profesionyoq kayanqampita y qellëyoq kayanqampitam alläpa alabakuyan.
Calumniakoq. Mëtsëchömi nunakunaqa calumniakoq kayan, y Teyta Diostapis ofendiyanmi (2 Timoteu 3:2, 3). Awmi, tsënö nunakunaqa nuna mayinkunata o Diosta ofendirmi imatapis lluta parlayan, y mana penqakushpam ulikuyan o llullakuyan.
Munanqanta rurakoq. Mëtsikaqmi familianta o reqishqankunata “dejaq”, ‘acuerduman chëta mana munaq’, ‘traicionakoq’, y ‘ima niyanqantapis mana cäsukoq’ kayan (2 Timoteu 3:2-4). Tsënö nunakunaqa, imapis kikinkuna munayanqannölla rurakänantam munayan, ima pasaptimpis manam arregluman chëta munayantsu y manam parlayanqanta cumpliyantsu.
Alläpa lïsu. Pïmëmi alläpa lïsu kayan, y imatapis rasllam o sasllam cölerakuyan. Tsënö nunakunaqa pitapis maqarllanam puriyan, y hasta nuna mayinta wanutsimampis chäyanmi (2 Timoteu 3:3).
Mana allikunata ruraq. Señor Jesucristuqa willakushqanam karqan “imëpitapis mas mana alli rurëkuna kanampaq” kaqta. Mana allikunata ruraq nunakunaqa manam leykunatapis cäsukuyantsu (Mateu 24:12). Y Jesusqa willakurqanmi ‘nunakuna juntakëkur imëka mana allikunata rurayänampaq’ kaqtapis (Lücas 21:9).
Familiankunata mana kuyaq. Kanan tiempuqa familiakunachöpis “papäninkunata mana cäsukoq” y “mana kuyakoqmi” kayan, tsëmi wakinqa alläpa llakipëpaq kawakuyan, y hasta sufritsishqa y mana alli tratashqam kayan (2 Timoteu 3:2, 3).
Teyta Diosta adoraq tukoq. Mëtsikaq nunakunam “Diosta sirweq” tukuyan (2 Timoteu 3:5). Peru pëkunaqa manam Diosnintsik mandakunqankunata cäsukuyantsu. Tsëpa rantinqa, religionkunachö dirigeqkuna niyanqanllatam cäsukuyan, peru tsëtaqa rurayan wiyëta munayanqanllata yachatsikuyaptinmi (2 Timoteu 4:3, 4).

¿Nunakuna kikinkunallaman pensayanqanqa imanirtan alläpa mana alli?

Mëtsikaq nunakunam kikinkunallaman pensar jukkunata alläpa sufritsiyan, tsëmi wakinqa alläpa sufrir hasta llakikuypita qeshyayan (Eclesiastes 7:7). Këllaman pensarishun: wakinkunaqa qellëta alläpa kuyarmi nuna mayinkunata engañayan o pëkunapita provechakuyan. Wakinkunanam mana kuyakoq karnin familiankunatapis mana alli tratayan o abusayan, tsëmi familiankunaqa alläpa llakikuyan y wakinqa hasta wanutsikuytapis yarpäyanmi. Wakinnam mana confiakuypaq y traicionakoq kayan, tsëmi familiankunata y reqishqankunata alläpa sufritsiyan.

¿Imanirtan nunakunaqa mas mana alli tikrëkäyan?

Bibliachömi cläru willakun imanir tsënö pasëkanqanta.

Nunakunaqa mananam Diosta ni nuna mayinkunata kuyayannatsu, masqa kikinkunallamanmi pensayan (Mateu 24:12).
Satanastam ciëlupita Patsaman Señor Jesucristu qarpamushqa (Apocalipsis 12:9, 12). Tsëmi Satanasqa imëkata rurëkan nunakuna kikinkunallaman pensar imëka mana allikunata rurayänampaq (1 Juan 5:19).

Markantsikchö nunakuna mas mana alli tikrayaptinqa, ¿imatataq rurashwan?

Diospa Palabran Bibliachömi nin ‘pëkunapita witikunapaq’ (2 Timoteu 3:5). Tsënö nirqa, manam nunakunapita qeshpir ëwakunapaqtsu nikan, sinöqa kikinkunallaman pensaqkunawan y Diosta cäsukuyta mana munaqkunawan mana amïgu kanapaqmi (Santiägu 4:4).

¿Llapan nunakunatsuraq pasëpa mana alli tikrayanqa?

Manam. Bibliachöqa willakurqanmi wakinkunaqa ‘imëka mana allikunata rurayanqanta rikarnin waqar y llakikur’ kayänampaq kaqta (Ezequiel 9:4). Pëkunaqa manam kikinkunallamantsu pensayan, pëkunaqa Diosnintsik mandakunqankunatam cäsukuyan, tsëqa imanö parlayanqanchö y imanö portakuyanqanchömi cläru rikakun (Malaquïas 3:16, 18). Llapankunawan yamë kawakuyänampaqmi kallpachakuyan, y manam guërrakunaman ni mana allita rurayanqankunaman mëtikuyantsu (Miquëas 4:3).

Mana alli nunakunaqa, ¿imëpis këkäyanqallatsuraq?

Manam. Diosnintsikqa ichikllachönam llapan mana alli ruraqkunata ushakätsinqa (Salmus 37:38). Tsëpitaqa ‘juk mushoq patsachönam’ kawashun. Tsë mushoq patsachöqa alli ruraq nunakunallanam kawayanqa. Pëkunaqa mana wanurnam yamë y kushishqa kawakuyanqa (2 Pëdru 3:13; Salmus 37:11, 29). ¿Imanötan musyantsik alli nunakunallana patsachö kawayänampaq kaqta? Tsëtaqa musyantsik, kanan tiempupis mëtsika nunakuna Bibliachö ninqanta cäsukur vïdankunata cambiayanqanta rikarmi (Efesius 4:23, 24).

a Bibliachö willakunqankunata leyir y kanan witsan pasëkanqankunata rikarmi cuentata qokuntsik ‘ushanan tiempuchöna’ këkanqantsikta. Awmi, Bibliachö ninqannömi “alläpa mana alli y mana aguantëpaqnö” tiempukunachö këkantsik (2 Timoteu 3:1). Maslla musyëta munarqa, “¿Cuál es la señal de ‘los últimos días’ o de ‘los tiempos finales’?” neqta leyi.