Dios qomanqantsik qarë. ¿Imanirtaq alläpa valoryoq?

¿PITAQ QARAMARQUNTSIK?

Juk precisaq carguyoq o alläpa respetanqantsik nunapita juk qarëta chaskinqantsikqa, alläpa precisaqmi kanman. Itsa mana chaniyoq këkaptimpis, wakin qarëkunataqa alläpa kuyar katsikuntsik familiantsik o amïguntsik qaramashqantsik kaptin. Tsënöllam punta yachatsikïchö rikanqantsik Jordan wamrapis, Russell qaranqanta alläpa valorarqan. ¿Imanirtaq Jesus wanunqan qarëpis alläpa precisan?

Puntataqa, Bibliaman kënö nin: “Japallanlla Tsurinta nunakunaman Dios kachamushqa kanqanchö, tsënöpa përëkur noqantsik imëyaqpis kawëta tarinapaq” (1 Juan 4:9). Kë qarëqa alläpa valoryoqmi, porqui Ciëluchö y Patsachö Autoridäyoq Diosnintsikmi qaramarquntsik. Salmus libruta qellqaqmi kënö nirqan: “Qampa jutikiqa Jehovämi, entëru patsa janampaqa qamllam këkanki” (Salmus 83:18). Awmi, Jehovä qomanqantsik qarëtanöqa manam nï pï nunapis qaramënintsikta puëdinmantsu.

Jinamampis, Diosnintsikqa ‘Teytantsikmi’ (Isaïas 63:16). ¿Imanirtaq tsëta nintsik? Porqui pëmi kawënintsik qomarquntsik. Imanömi juk alli teyta wamrankunapaq yarpachakun y cuidan, tsënöllam Diosnintsikpis noqantsikpaq yarpachakun y cuidamantsik. Unë witsan Efrain kasta nunakunapaq parlarninmi, Diosnintsikqa kë tapukïta rurarqan: “¿Manaku Efrainqa noqapaq alläpa shumaq wamra o kuyapanqä wamra? [...] Pëtaqa imëpis llakipäshaqmi” (Jeremïas 31:20). Kanan witsampis, Diosqa yarpachakunmi sirweqninkunapaq. Manam llapanta puëdeq Kamamaqnintsikllatsu, sinöqa alläpa kuyakoq Teytantsik y amïguntsikmi. Tsëmi Pëpa qarëninkunaqa alläpa valoryoq.

¿IMARËKURTAQ QARAMARQUNTSIK?

Kuyëwan qaramashqantsik kaptinmi, wakin qarëkunaqa alläpa valoryoq kayan. Y shonqupita patsë qarakoq nunaqa, manam qarakunqampita kutitsiyänantaraqtsu shuyaran.

Kuyamarnintsikmi Diosnintsikqa kuyë Tsurin wanunanta jaqirqan. Tsëmi Bibliaqa kënö nin: “Këchömi noqantsikpaqqa Diospa kuyakïnin rikakashqa karqan, japallanlla Tsurinta nunakunaman Dios kachamushqa kanqanchö, tsënöpa përëkur noqantsik imëyaqpis kawëta tarinapaq” (1 Juan 4:9). ‘Jutsapita libramänapaq Jesus chaninta pagakunqanmi’, Diosnintsikpa ‘alläpa alli këninta’ rikätsikun. Porqui Diosqa manam tsë ruranampaq obligädutsu karqan (Romänus 3:24).

¿Imanirtaq Diosnintsik qaramanqantsikqa ‘alläpa alli këninta’ rikätsikun? Bibliam kënö willakun: “Diosqa kikimpa kuyakïnintam rikätsimantsik, y tsëtaqa rikätsimantsik jutsasapallaraq këkashqa noqantsikrëkur Cristu wanunanta jaqinqanwanmi” (Romänus 5:8). Diosnintsikqa alläpa kuyakoq kanqanrëkurmi kallpannaq, yanapaqninnaq y jutsasapa këkashqa tsëta rurarqan. Tsëtaqa rurarqan mana merecikashqa y imanöpapis pagakïta mana puëdikashqam. Awmi, Jehovä alläpa kuyamanqantsiktam tsë qarëqa rikätsikun.

¿IMAKUNATA RURANANRAQ PRECISARQAN?

Wakin qarëkunaqa alläpa valoryoqmi, porqui qaramanqantsik nunaqa imëkata rurarmi tsë qarëta qomarquntsik. Alläpa kuyanqan kaqta y imakunata ruranqanta musyarninmi, tsë qarëtaqa alläpa valorantsik.

Diosmi “japallan Tsurinta pëkunarëkur qorqan” (Juan 3:16). Pëqa mas kuyanqan kaqtam noqantsikrëkur qorqan. Millonyëpayan watakuna Diosnintsik llapanta kamanqanchömi, Jesusqa yanapar këkarqan y Diosqa pëwan juntu karmi “kushishqa karqan” (Proverbius 8:30). Jesusqa Diospa kuyë tsurinmi y “mana rikakoq Dios niraqmi” (Colosensis 1:13-15). Pëkunanöqa manam pipis alläpa kuyanakuyashqatsu.

Tsënö kaptimpis, Jehoväqa listum këkarqan Tsurinta noqantsikrëkur qonampaq (Romänus 8:32). Awmi, mas kuyanqan kaqtam qaramarqantsik. Manam mëqan qarënimpis tsënö alläpa valoryoqqa kantsu.

¿RASUMPA WANANQANTSIK QARËKU KARQAN?

Wakin qarëkunaqa alläpa valoryoqmi kayan, porqui mas wananqantsik hörachömi yanaparamashwan. Këman pensari, itsachi kawënikita salvanëkipaq juk doctorman jampikoq ëwëta wanëkanki, peru qellëniki kantsu. Tsë höra pillapis pagakunampaq änirishuptikiqa shonqupita patsëchi agradecïdu këkankiman ¿aw?

“Imanömi Adanchö llapankuna wanïkäyan, jina tsënöllam Cristuchöpis llapankuna kawëta chaskiyanqa” (1 Corintius 15:22). Adanpa mirëninkunaqa llapantsikmi ‘wanïkantsik’, porqui qeshyapita y wanïpitam librakïta puëdintsiktsu. Jinamampis, Diosnintsikwan amishtëta y rikëninchö alli këtaqa manam puëdintsiktsu. Jutsasapa nuna karninmi, pitapis “kawëta” qoyta puëdintsiktsu. Bibliam kënö willakun: “Manam pillapis imanöpa wawqinta salvëta puëdintsu, y manam përëkur juk salvakoqta Diosta qoyta puëdintsu” (Salmus 49:7, 8). Tsëmi alläpa precisëkun pillapis yanapamänantsik, porqui kikintsikllapitaqa manam pagakïta puëdintsiktsu.

Alläpa kuyakoq kanqanrëkurmi, Jehoväqa kawënintsikpa chaninta Jesuspa kawëninwan kushishqa pagakurqan. ¿Imatataq tsëwanqa chaskintsik? “Tsurin Jesuspa yawarninmi llapan jutsapita limpiamantsik”. Tsë ninanqa, Jesus noqantsikrëkur wanunqanman markäkunqantsikmi yanapamantsik jutsantsikpita perdonashqa kanapaq y imëyaqpis kawakïta chaskinapaq (1 Juan 1:7; 5:13). Jesus wanunqampa valorninqa wanushqa familiantsikkunatapis yanapanmi, Bibliam kënö willakun: “Juk nunarëkurlla wanï shamushqa kaptinmi, wanushqakuna kawariyämunampaq kaqpis juk nunallapita [Jesusllapita] shamun” (1 Corintius 15:21).a

Jesus wanunqan qarëqa alläpa valoryoqmi, porqui Ciëluchö y Patsachö Autoridäyoq Diosnintsikmi alläpa kuyamarnintsik qaramarquntsik. Jehovä ruranqantanöqa manam pipis rurëta puëdinmantsu. Jutsapita y wanïpita libramaqnintsik qarënöqa manam imapis kantsu. Awmi, Diosnintsik qomanqantsik qarëqa manam ni imawampis igualantsu.