46 KAQ YACHAKUNËKIPAQ
¿Imanirtan Jehoväta sirwinëkipaq äninëki y bautizakunëki?
Pipis bautizakuyta munarqa manaraq bautizakurmi Jehoväman mañakunan y tsëchömi ninan pëllatana adoranampaq y sirwinampaq (Salmus 40:8). Bautizakunqanmi rikätsikunqa Jehovällatana adoranqanta y pëllapaqna kawanqanta. Bautizakunapaq decidinqantsikqa imëkapitapis mas allim kanqa. Peru ¿imanirtan decidinkiman bautizakunëkipaq?
1 KAQ: ¿Imanirtan Jehovällatana sirwinëkipaq äninëki?
Jehoväta kuyarmi pëllatana sirwinëkipaq y pëllapaqna kawanëkipaq mañakur äninëki (1 Juan 4:10, 19). Bibliachömi kënö nin: “Jehovä Diostam llapan shonquykikunawan, llapan kawënikikunawan, llapan pensënikikunawan y llapan kallpëkikunawan kuyayänëki” (Marcus 12:30). Jehoväta kuyanqantsiktaqa rikätsikuntsik parlanqantsikwan y ruranqantsikwanmi. Imanömi juk ollquwan warmi kuyanakur casakuyan, tsënöllam noqantsikpis Jehoväta kuyar pëllatana sirwinapaq y pëllapaqna kawanapaq änikuntsik y bautizakuntsik.
2 KAQ: ¿Ima bendicionkunatataq bautizakoqkuna chaskiyan?
Bautizakurirqa Teyta Jehoväpa familianmi tikranki, y kushishqam kanki. Masmi cuentata qokunki Jehovä kuyashunqëkita, y pëwanmi mas amïgu tikranki (leyi Malaquïas 3:16-18). Jehovämi Teytëki kanqa y pëta entëru Patsachö kuyaqkunawanmi juk familianölla kanki (leyi Marcus 10:29, 30). Peru bautizakunëkipaqqa Jehoväpitam mas yachakunëki, kuyanëki y Jesusmanmi markäkunëki o yärakunëki. Tsëpitanam Jehovällatana sirwinëkipaq y pëllapaqna kawanëkipaq mañakur Jehoväta äninëki. Bautizakunëkipaq tsë llapanta rurarqa mana wanushpam kawakunki. Diosnintsikpa Palabran Bibliachömi nin: “Tsënöllam bautizakuyanqëkipis [...] qamkunata salvëkäyäshunki” (1 Pëdru 3:21).
MASLLA YACHAKUSHUN
Jehovällatana sirwinëkipaq imanir äninëkipaq y bautizakunëkipaq kaqtam yachakushun.
3 KAQ: Llapantsikmi decidinantsik pita adoranapaq kaqta
Diospa willakoqnin Elïas kawanqan witsan israelïtakunaqa, Jehoväta y Baal santuta adorë alli kanqantam pensayarqan. Tsënö pensayanqanqa manam allitsu karqan. Tsëmi Elïasta Jehovä mandarqan pëkunata yanapanampaq. Leyiyë 1 Rëyes 18:21 ima ninqanta y këpaq parlayë:
¿Imata rurayänampaqtan israelïtakunaqa decidiyänan karqan?
Noqantsikpis israelïtakunanömi decidinantsik pita adoranapaq kaqta. Leyiyë Lücas 16:13 ima ninqanta y këkunapaq parlayë:
¿Imanirtan allitsu kanman Jehoväta adorëkar juk cösaskunata adorë?
¿Imanötan rikätsikuntsik Jehovällatana adoranapaq decidinqantsikta?
4 KAQ: Jehovä alläpa kuyashunqëkiman pensë
Jehoväqa noqantsikpaq imëkatam ruramushqa. Y noqantsikqa, ¿imatataq pëpaq rurashwan? VIDEUTA rikäyë.
¿Imakunachötan rikarqunki Jehovä kuyashunqëkita? Leyiyë Salmus 104:14, 15 y 1 Juan 4:9, 10 ima ninqanta y këkunapaq parlayë:
Jehovä noqantsikpaq ruramunqankunapitaqa, ¿imatan mas gustashunki?
Llapan ruramunqankunaman pensar, ¿masku Jehoväta kuyanki?
Pipis imallatapis qaramashqaqa alläpam kushikuntsik, y agradecikuntsikmi. Leyiyë Deuteronomiu 16:17 ima ninqanta y këpaq parlayë:
Qampaq Jehovä ruramunqankunaman pensar, ¿imataraq pëpaq rurankiman o qarankiman?
5 KAQ: Bautizakurqa imëka bendicionkunatam chaskinki
Mëtsikaqmi pensayan reqishqa kar, profesionyoq kar o qellëyoq kar kushishqa kayänampaq kaqta. Peru ¿tsëqa rasuntsuraq? VIDEUTA rikäyë y këkunapaq parlayë:
Videuchö rikanqantsik nunaqa, ¿imanirtan pelöta pukllë gustaptimpis tsë profesionninta dejarqan?
Tsë nunaqa Jehoväta sirwinampaqmi decidirqan, ¿tsëta ruranqanqa allipaqku karqan? ¿Imanir?
Apostol Pabluqa alli estudiashqa nunam karqan, pëtaqa judïukunapa leyninkunata alläpa musyaq nunam yachatsishqa karqan. Tsënö kaptimpis, Jehoväta sirwinampaqmi llapanta dejarqan. ¿Tsëta ruranqampita arrepentikurqanku? Leyiyë Filipensis 3:8 ima ninqanta y këkunapaq parlayë:
¿Imanirtan apostol Pabluqa nirqan Jehoväta sirwinampaq dejanqankunaqa basüra cuenta kanqanta?
Jehoväta sirwinampaq decidinqampita, ¿ima bendicionkunatataq Pablu chaskishqa?
¿Jehoväta sirwinëkipaq decidinqëkiqa allipaqtsuraq kanman? ¿Imanir?
Apostol Pabluqa imëka bendicionkunatam chaskirqan Jehoväta sirwinampaq decidinqampita.
WAKIN IMA NIYANQAN: “Diosllatana imëpis sirwinapaq änikuyqa manam allinötsu”.
Jehoväta sirwinëkipaq änikunqëki y bautizakunqëkiqa, ¿allipaqtsuraq kanman? ¿Imanirtan tsënö ninki?
KËTAM YACHAKURQUNKI
Jehoväta kuyarmi sirwinapaq y pëllapaqna kawanapaq änikuntsik y bautizakuntsik
¿Yarpankiku?
¿Imanirtan Jehovätaqa llapan shonquntsikwan kuyanantsik y adoranantsik?
Jehoväpa testïgun kayänampaq bautizakoqkunaqa, ¿ima bendicionkunatataq chaskiyan?
¿Munankiku Jehovällatana sirwinëkipaq y pëllapaqna kawanëkipaq änikuyta?
MASTA YACHAKUY
Cantanti warmi y fütbol amëricänuta pukllaq nuna, Jehoväta sirwiyänampaq decidiyanqanta rikë.
Jövinkuna tapukuyanqan...—¿Imataraq kawënïwan rurashaq?—Imanö kawayanqäta yarparnin (6:52)
Bautizakur Jehovällata sirwinëkipaq kaqta yachakuy.
“¿Imanirtaq Jehoväta kawënintsikta qoykushwan?” (Täpakoq, 1 de enëru 2010)
Jehoväta sirwiyänampaq bautizakoqkuna kushishqa kayanqanta videuyoq müsicachö rikë.
Jehoväta sirwinampaq juk warmi imata ruranqanta yachakunëkipaq, “Mëtsika watapam ‘¿imapaqtan nuna kawan?’ nirnin yarpachakurqä” neqta leyi.
“Bibliam yanapashqa jukläyana kawakuyänampaq” (Täpakoq, 1 de noviembri 2012)