Pëkunano fiel kashun
1 Willapäki más miranampaqmi, 1937 watacho qallamorqan huk mushoq arreglu: precursor especial nishqan. Ollqupis warmipis Reinupita willapäkicho alli yachaqkunam, kushishqa ewayarqan willapäkoq, Jehovapa markan mandanqanman. Kananyaqpis precursor especialkunaqa kayan huk alli ejemplum, noqantsik fiel keninkunata qatinapaq (Heb. 6:12).
2 Nänitam kichayarqan: Punta kaq precursor especialkunam, nänita kichayarqan willapäkicho, tocadiscunkunawan wayin wayin ewarnin. Grabacionkunatapis inshiyarqanmi, revisitakunawan Bibliapita parlarnin. Puntataqa ewayaq hatun markakunacho congregación kaqkunamanmi. Tsepitanam, Jehovapa markan mandanqanman ewayarqan, huk markakunacho ichiklla testigukuna kaqmampis. Bibliapita ichiklla käyeqmampis kutiyaqmi yachatsiyänampaq. Shumaq voluntawan uryayanqampitam atska mushoq congregacionkuna mirarqan. Tseno mana utishpa willapäkuyanqampitam, kananqa atskaman mirëkurqontsik (Isa. 60:22). Kanampis precursor especialkunaqa, Diospa Reinumpita alli willapäkurllam purïkayan, “llapan kamanqan cielupa hawancho” kaqtaqa (Col. 1:23).
3 Rurayanqanta qatinapaqmi këkayan: Wakin precursor especialkunaqa atska watanam Jehovapita willapäkurnin sirwiyan. Kë warmikuna y ollqukunapis tukilaya kawakitam pasayashqa Jehovata sirwirnin, tsemi fëninkunata más alliyätsishqa (1 Ped. 1:6, 7). Imekankunata haqirïkurmi ewakuyarqan precursor especial kayänampaq, mana testigu kaq markakunamampis. Wakinkunaqa awkinnam y tsatsanam kayan, qeshyayanmi y tuki problemakunatam pasayan (2 Cor. 4:16, 17). Tseno, “yulaq aqtsana këkarpis [hawkallam] wayukïkayan” huk planta cuenta (Sal. 92:14). Jehovamanmi confiayan, tsemi bendicionninta chaskiyan (Sal. 34:8; Pro. 10:22).
4 Precursor especialkunataqa allapam kuyëkushwan. Congregacionnikicho precursor especialkuna kaptenqa, pekunawan ime horapis kayë, experienciankunapita yachakurnin. Kuyakïnikita rikatsi, fiel kayanqampita Reinupita willapäkicho. Pekuna aguantayanqampita yachaki, kallpata tarinëkipaq. Pekunapa fëninkunata qateqkunapis, Jehovapa bendicionnintam chaskiyanqa, ‘fidelidacho kawaqkunaqa Diospa kushikïninmi kayan’ (Pro. 12:22).