Imëkatapis rurashun ‘alli willaquita willacunarecur’
1 Nunakuna imëyaqpis alli kawakuyänanrëkurmi, Pablupaqqa alli willakïkunata yachatsikï alläpa precisarqan (1 Cor. 9:16, 19, 23). Tsënölla noqantsikpis rurëta munarmi, Diospita yachatsikunapaq alli kallpachakunantsik.
2 Imakunatataq rurashwan nunakunata tarinapaq: Alli pescaqqa manam kikimpaq alli sitiota ashïkurtsu atarräyanta o anzuëlonta hitan, tsëpa rantenqa mëchöpis más tsarinampaq kaqchömi pescan. Tsënöllam noqantsikpis “nunakuna peskaq” cuenta karnin, pëkunata tarinantsikrëkur imëkanöpapis tiempota horqanantsik, y tsëqa “tukiyläya peskadukunata” tsareqkunanömi atska nunakunata ëllumushun o qorimushun (Mat. 4:19; 13:47, QKW). ¿Yachatsikushwantsuraq tardepëkunapa y qoya qoyalla o wärë wärëlla nänikunachö? Pablum yachatsimarqantsik imë hörapis nuna kanqanchö yachatsikunapaq, pëqa munarqan ‘llapanman alli willakïta chätsitam’ (Hech. 17:17; 20:20, 24, NM).
3 Nunakuna yachakïta wanayanqanmannö yachatsikushun: Pescaqkunaqa, ima pescädotapis tsarita munayanqanmannömi pescayan. Y noqantsikqa, ¿imanötaq yachatsikushwan marka mayintsikkuna wiyamänantsikpaq? Puntataqa imatapis nunakuna musyëta munayanqanmannömi shumaqlla parlapänantsik, y tsëpitanam alli wiyanantsik ima niyanqantapis (Sant. 1:19). Ima pensayanqantapis nirayämunampaqqa tapurinantsikmi (Pro. 20:5). Tsëqa, nunakuna yachakïta wanayanqanmannömi yacharatsishun. Pablum kënö nerqan: “Llapanmanmi rurakarqö [...] imanowpapis wakinkunata salbanäpaq” (1 Cor. 9:22, QKW). Tsënömi pëqa wanayanqanmannö yachatsikorqan, y noqantsikpis tsënöllam ruranantsik nunakunapa shonqunman chänapaq.
4 ¡Imanö kushikïpaqmi “alli kaq noticiapita” willakï! (Isa. 52:7.) Llapan nunakunamanmi chëta munantsik, tsëmi ‘alli willaquita willacunarecur’ imëkatapis ruranantsik (1 Cor. 9:23).
[Yachakunapaq kaqpa tapukïninkuna]
1. ¿Imatataq ruranantsik yachatsikunantsikrëkur y imanir?
2. ¿Imakunatataq ruranantsik más yachatsikunantsikrëkur y imanir?
3, 4. Wayin wayin ëwarnin, ¿imanötaq yachatsikushwan, y imarëkurtaq tsënö rurashwan?