WATUKAQ KUTINËKIPAQ
8 KAQ YACHAKUNËKIPAQ
Pacienciayoq kë
Bibliachö kënö ninqanman pensë: “Kuyakoqqa pacienciayoq[mi]” (1 Cor. 13:4).
¿Imatataq Jesus rurarqan?
1. VIDEUTA rikë o Juan 7:3 a 5 y 1 Corintius 15:3, 4 y 7 ninqanta leyi. Tsëpitana këkunaman pensë:
¿Imanötan qallananllachöqa Jesuspa wawqinkuna kayarqan?
¿Imanötan musyantsik Jesusqa wawqin Santiäguta yanapar sïguinqanta?
¿Imatataq yachakuntsik Jesus ruranqampita?
2. Wakinqa mas tiemputaran wanayan alli noticiakunapita yachakuyta munayänampaq, tsëmi pacienciayoq kanantsik.
Jesus ruranqannö rurë
3. Juknöpa yanapëta procurë. Bibliapita yachakuyänëkipaq niptiki manaraq munaptinqa, ama obliguëtsu. Peru allinö kaptinqa, imanö yachatsikunqantsikta y Bibliapita yachakunqan imanö yanapanampaq kaqta musyanampaq, videukunata y maskunata rikätsi.
4. Jukkunatawan igualatsitsu. Nunakunaqa manam igualtsu kantsik. Pï nunapis o mëqan familiëkipis Bibliapita yachakuyta mana munaptinqa o Bibliachö ninqanman mana fäcil creiptinqa, imanir tsënö kanqanman pensë. ¿Yachakashqa karninku creinqanta dejëta munantsu? ¿Familiankuna o vecïnunkunatsuraq imatapis nikäyan? Parlayanqëkiman pensanampaq y Bibliachö yachakunqanta valoranampaq juk tiempupa shuyäri.
5. Watukanqëki nunapaq Jehoväman mañakuy. Yanapar sïguinëkipaq y shumaq yanapanëkipaq Jehoväman mañakuy. Mana alläpa yachakuyta munaqkunata imë dejanëkipaq kaqta musyanëkipaqpis Jehoväman mañakuy (1 Cor. 9:26).