6 Mana rasun kaq yachatsikï: Imägenkunawanmi Diosta adoranantsik
¿Imanötaq tsë yachatsikï yurimushqa? “Punta cristiänokunaqa manam imägenkunawantsu Diosta adorayarqan [...]. Lluta nunakuna iglesiachö wiyakuyanqampita o librokunata leiyanqampitapis más raslla yachakuyänampaq nirmi, 300 y 400 watakuna witsanchö punta Iglesiaqa imägenkunata katsir qallëkurqan.” (Cyclopedia of Biblical, Theological, and Ecclesiastical Literature, de McClintock y Strong.)
¿Imatataq Bibliaqa yachatsikun? “Ciëlochö këkaqkunatanö, patsachö këkaqkunatanö, ni yaku rurinchö këkaqkunatanöpis manam huk imägenta ruranëkitsu. Manam pëkunaman puktinëkitsu, ni niyäshuptikipis servinëkitsu.” (Éxodo 20:4, 5.) Punta cristiänokunatapis, “ïdolocunapita cuidacur shumag cawacuyanqui” nirqanmi apóstol Juan (1 Juan 5:21, NTCN).
Imägenkunataqa (santokunata) manam adorayätsu, antis tsëtaqa katsiyä unë alli nunakunata respetar yarpäyänallapaqmi niyanmi wakin religionkunachöqa. Pero ¿rasumpatsuraq tsëqa? Huk reqishqa librom kënö nin: “Itsa unëqa yachatsikuyänanllapaq o iglësiakunata adornayänanllapaq imägenkunata katsiyaq, y tsëllapaq katsiyanqantam pï mëpis niyaq. Pero tsëpitaqa Diostanö adorarnam qallëkuyarqan. Y tsëtam rikätsikun Iglesia Ortodoxa nishqampis, pëkunapaqqa imägenkunata katsiyänan alläpam precisan” (The Encyclopedia of Religion). Pero ¿tsë imägenkuna imallachöpis yanapamashwantsuraq? Manam, tsëmi profeta Isaiaspis kënö nirqan: “¿Pï rikoq ninkimanraq Diospaq, y ima imägentaraq pë rikoqta rurankiman?” (Isaías 40:18).
Kë versïculokunata rikäri: Isaías 44:13-19; Hechos 10:25, 26; 17:29; 2 Corintios 5:7.
RASUN KAQ:
Diosqa manam munantsu imägenkunawan adoranata.
¿MËQAN YACHATSIKÏTARAQ AKRANKIMAN?
Këkunachömi rikärirquntsik iglesiakuna ‘falsu cuentukunata’ o mana rasun kaqta yachatsikuyanqan, Biblia yachatsikonqanwan mana igualanqanta (2 Pedru 1:16).
Tsëmi religionnikichö yachatsiyäshunqëki alli o mana alli kanqantapis Diospa Palabranchö rikärinëkipaq niriyaq (Juan 17:17). Tsëqa Biblia nenqannöpis, “rason caqta musyariyaptiqui[m], tse rason caq librariyäshunqui” (Juan 8:32).
[9 kaq päginachö pikunapa kanqan]
Pictorial Archive (Near Eastern History) Est.