LECCIÓN 4
Ashcada colerashca gashcamundami paibu huauquida huañuchirca
Adán y Eva jardín de Edenmunda llujshishca jipaga, ashca huahuagunadami charinajurca. Punta churiga Caín shutimi garca. Paiga frutagunada y verduragunadami tarpush causaj garca. Catij churiga Abelmi garca, y paiga llamagunadami charirca.
Shuj funchami, Caín y Abelga Jehová Diosmun ofrendagunada cunajurca. Ofrendaga, ¿imadi gan? Taita Diosmun cuna regalomi gan. Abel cushca ofrendadami Jehová Diosga munarca, pero Caín cushcadaga na munarcallu. Chaimundami Cainga ashcada colerarca. Jehová Diosga Caindaga cashnami nirca: “Colerada na pasachishaga pidash llaquichi pudinguimi”. Pero Cainga na cazurcallu.
Más bien, Caín Abeldaga cashnami nirca: “Jihua campo pambamun ñucaun jacu”. Chaibi ishquindilla gajushmi Cainga paibu huauquidaga huañuchirca. Pero Jehová Dios chaida rricushaga, ¿imadadi rrurrarca? Caín paibu familiada ama cutindi rricui pudillunmi, caru ladomun cachash castigarca.
¿Imadadi yachai pudinchi? Ñucunchi munashca shina imash na alli llujshijpimi huaquinbiga colerai pudinchi. Rrato coleraj gash o fiñalla pasaj gashaga cambianami ganchi. Na cambiashaga colera rratomi imadash panta rrurrash, llaquibi urmashun.
Abelga, Jehová Diosda ashcada juyashmi paida alli sirvij garca. Chaimundami Jehová Dios paidaga nunca na cungaringa. Cai allpa shuj paraíso tucujpiga, Taita Diosmi Abeldaga causachinga.
“Primero canbu huauquiun buenoyagri, y jipa vueltamush canbu ofrendada cui” (Mateo 5:24).