2 Reyes

1 Acab huañushca qꞌuipami Moab llajtaca Israelpaj contra jatarirca.

2 Chai tiempopica Ocoziasca Samariapimi causacurca. Paica pai causana terraza cuarto ventanamanta* urmashpami chugririrca. Chaimi paipaj huillajcunataca: “Richij, ¿cai chugririshcamanta alliyashachu, manachu alliyasha imashi? nishpa Ecrón llajtapi tiyaj Baal-Zebub diosta tapugrichij” nishpa cacharca. 3 Shinapish Jehová Diospaj angelca Tisbemanta Eliastaca* cashnami nirca: “Samaria llajtamanta reypaj huillajcunahuan tupanaman huichiyai. Paicunamanca: ‘¿Israelpica Diosca manachu tiyan? ¿Imamantataj Ecrón llajtapi tiyaj Baal-Zebub* diosta tapunaman ricunguichij? 4 Jehová Diosca: “Can siricushca camamantaca mana jatarishpami huañunguitaj” ninmi’ ningui” nircami. Chashna nishca huashami Eliasca chaimanta rirca.

5 Huillajcuna rato tigramujpimi Ocoziasca: “¿Imamantataj rato tigramunguichij?” nishpa tapurca. 6 Chashna nijpimi paicunaca: “Shuj runami ñucanchijta tupanaman llujshishpaca: ‘Richij, cancunata cachashca reypajman tigraichij. Paimanca: “Jehová Diosca: ‘¿Israelpica Diosca manachu tiyan? ¿Imamantataj Ecrón llajtapi tiyaj Baal-Zebub diosta tapunaman cachangui? Chaimanta can siricushca camamantaca mana jatarishpami huañunguitaj’ ninmi” ninguichij’ nirca” nishpa cutichircacuna. 7 Chaita uyashpami Ocoziasca: “¿Cancunahuan tupashpa cai shimicunata nij runaca ima layataj carca?” nishpa tapurca. 8 Chashna tapujpimi paicunaca: “Chai runaca animalpaj millmamanta rurashca ropata churarishca, cara cinturonhuan chumbillirishcami carca” nircacuna. Chashna nincami Ocoziasca: “Tisbemanta Eliasmi can” nirca.

9 Reyca 50 soldadocunata pushajtaca paipaj 50 soldadocunahuanmi Eliasta mashcanaman richun cacharca. Paicuna mashcanaman rishpaca Elías shuj urcu jahuapi tiyacujtami ricurcacuna. Chaipimi paica Eliastaca: “Diosta sirvij runa, reyca: ‘Uriyamui’ ninmi” nirca. 10 Shinapish Eliasca 50 soldadocunata pushajtaca: “Ñuca, Diosta sirvij runa cajpica jahua pachamanta nina uriyashpa cantapish, cambaj 50 soldadocunatapish tucuchichun” nishpami cutichirca. Chaimi jahua pachamanta nina uriyashpa paitapish, paipaj 50 soldadocunatapish tucuchirca.

11 Reyca cutinmi shujtaj 50 soldadocunata pushajta, paipaj 50 soldadocunahuan cacharca. Chaimi 50 soldadocunata pushaj rishpaca: “Diosta sirvij runa, reyca: ‘Utca uriyamui’ ninmi” nirca. 12 Shinapish Eliasca: “Ñuca, Diosta sirvij runa cajpica jahua pachamanta nina uriyashpa cantapish, cambaj 50 soldadocunatapish tucuchichun” nishpami cutichirca. Chaimi jahua pachamanta Diospaj nina uriyashpa paitapish, paipaj 50 soldadocunatapish tucuchirca.

13 Chaimi reyca cutinllataj 50 soldadocunata mandaj tercer pushajta paipaj 50 soldadocunahuan cacharca. Shinapish 50 soldadocunata mandaj tercer pushajca huichiyashpami Eliaspaj ñaupajpi cungurishpa cashna nishpa rogai callarirca: “Diosta sirvij runa ñucatapish, cai 50 soldadocunatapish causashpa catichun saquipai. 14 Jahua pachamanta nina uriyamushpamari ishquindij 50 soldadocunata pushajcunatapish, paicunapaj 50 soldadocunandij ña tucuchishca. Shinapish ñuca causaita ama quichuchunmi rogapani” nircami.

15 Chashna nijpimi Jehová Diospaj angelca Eliastaca: “Paihuan uriyailla, ama manchaichu” nirca. Chaimi Eliasca jatarishpa paihuan reyta ricunaman uriyarca. 16 Eliasca reytaca: “Jehová Diosca: ‘Canca Ecrón llajtapi tiyaj Baal-Zebub diosta tapungapajmi huillajcunata cacharcangui. ¿Israelpica Diosca manachu tiyan? ¿Ima nishpataj Diosta mana tapurcangui? Chaita rurashcamantami can siricushca camamantaca mana jatarishpa huañunguitaj’ ninmi” nircami. 17 Chashnami Ocoziasca Jehová Dios Eliasman huillachishca shina huañurca. Ocoziasca churita mana charircachu. Chaimantami Jehoramca* Israelpi catij rey tucurca. Judá llajtata mandaj Jehosafatpaj churi Jehoram ishqui huatacunata mandacujpimi paica chashna mandai callarirca.

18 Ocoziaspaj causaipish, pai imalla rurashcapish Israel llajtamanta reycunapaj causaimanta parlaj libropimi quillcashca tiyacun.