2 Reyes

15 Israel llajtamanta rey Jeroboán* 27 huatacunata mandacujpimi Judá llajtamanta rey Amasiaspaj churi Azariasca* mandai callarirca. 2 Azariasca 16 huatacunata charishpami mandai callarirca. Paica 52 huatacunatami Jerusalenpi mandarca. Paipaj mamaca Jerusalenmanta Jecolías shutimi carca. 3 Azariasca paipaj yaya Amasías rurashca shinami Jehová Diospaj ñaupajpica allita ruraj carca. 4 Pero paica adorana lugarcunataca* mana anchuchircachu. Chaimantami gentecunaca chaicunapi sacrificiocunata ruranatapish, sacrificiota rupachishpa cushnichinatapish mana saquircacuna. 5 Jehová Diosca rey Azariastaca lepra ungüihuanmi castigarca. Paica huañungacamami chai ungüihuan causarca. Chai lepra ungüimantami chꞌicanyachishca huasipi causarca. Huasipica* paipaj churi Jotanmi mandacurca. Jotanmi chai llajtapi causaj gentecunataca juzgaj carca. 6 Azariaspaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun. 7 Azariasca huañurcami.* Paitaca Davidpaj Llajtapimi paipaj ñaupa yayacunahuan pambarcacuna. Qꞌuipaca paipaj churi Jotanmi catij rey tucurca.

8 Judá llajtamanta rey Azarías 38 huatacunata mandacujpimi Israelmanta rey Jeroboanpaj churi Zacariasca Samariapi mandai callarirca. Zacariasca sujta quillacunatami mandarca. 9 Paica paipaj ñaupa yayacuna shinallatajmi Jehová Diospaj ñaupajpica mana allicunata rurarca. Nebatpaj churi Jeroboán mana allita rurashpa israelitacunata juchapi urmachishca shinallatajmi Zacariaspish rurashpa catirca. 10 Qꞌuipaca Jabespaj churi Salummi paipaj contra jatarishpa Zacariastaca huañuchirca. Huañuchishca qꞌuipami paica catij rey tucurca. 11 Zacariaspaj causaica Israel llajtamanta reycunapaj causaimanta parlaj libropimi quillcashca tiyacun. 12 Chashnami Jehová Dios Jehuman nishca shimicunaca pajtarirca. Diosca Jehumanca: “Cambaj churicunataca chuscu huahua huahuacama Israelpi mandachunmi jatun tiyarinapi churasha” nishcami carca. Chaica chashnatajmi pajtarirca.

13 Judá llajtamanta rey Uzías 39 huatacunata mandacujpimi Jabespaj churi Salumca rey tucurca. Salumca shuj quillatami Samaria llajtapi mandarca. 14 Gadipaj churi Menahemca Tirzamantami Samariaman llujshirca. Chaipimi Jabespaj churi Salumtaca Samariapi huañuchirca. Paita huañuchishca qꞌuipaca paica catij reymi tucurca. 15 Salumpaj causaipish, huañuchingapaj ima shina pai yuyarishcapish Israel llajtamanta reycunapaj causaimanta parlaj libropimi quillcashca tiyacun. 16 Menahem Tirzamanta shamushpaca Tifsá llajtata, tucui chai llajtapi causaj gentecunatami llaquichirca. Chai muyundijpi tiyaj llajtacunatapishmi tucuchirca. Chai llajtapaj pungucunata mana pascajpimi tucuita tucuchirca. Tucui chichu huarmicunatapish huijsatami lliquirca.

17 Judá llajtamanta rey Azarías 39 huatacunata mandacujpimi Gadipaj churi Menahemca Israelpaj catij rey tucurca. Menahemca chunga huatacunatami Samariapi mandarca. 18 Paica Jehová Diospaj ñaupajpica mana allicunatami ruraj carca. Shinallataj Menahemca Nebatpaj churi Jeroboán juchacunata rurashpa israelitacunata juchacunapi urmachishca shinallatajmi paipaj tucui causaipica rurashpa catirca. 19 Asiriamanta rey Pulca Israel llajtata mandaj reytami llaquichinaman rirca. Shinapish Menahemca pai mandashpa catingapajmi rey Pulmanca 1.000 talento* cullquita curca. 20 Menahemca chai cullquitaca Israel llajtamanta cullquiyujcunata, rijsishcacunata cobrashpami japishca carca. Asiria llajta reymanca cada cꞌaricunamantami 50 siclo* cullquita curca. Chashna rurajpimi Asiriamanta reyca chai llajtapi mana saquirishpa chaimanta rirca. 21 Menahempaj causaipish, pai tucui imalla rurashcapish Israel llajtamanta reycunapaj causaimanta parlaj libropimi quillcashca tiyacun. 22 Shinaca Menahemca huañurcami.* Paipaj churi Pecahiasmi catij rey tucurca.

23 Judá llajtamanta rey Azarías 50 huatacunata mandacujpimi Menahempaj churi Pecahiasca Samariapi Israel llajtata mandai callarirca. Pecahiasca ishqui huatacunatami mandarca. 24 Paica Jehová Diospaj ñaupajpica mana allicunatami ruraj carca. Nebatpaj churi Jeroboán mana allicunata rurashpa israelitacunata juchapi urmachishca shinallatajmi Pecahiaspish rurashpa catirca. 25 Remaliaspaj churi Pécah runaca Pecahiasta sirvij soldadomi carca. Paimi Pecahiaspaj contra jatarirca. Reypaj huasipi tiyaj sinchi torrepimi Pécah runaca Pecahiastapish, Argobtapish, Arietapish huañuchirca.* Chai torreca Samariapimi carca. Pecahhuanca Galaadmanta 50 cꞌaricunami carca. Reyta huañuchishca qꞌuipami paica catij rey tucurca. 26 Pecahiaspaj causaipish, tucui imalla rurashcapish Israel llajtamanta reycunapaj causaimanta parlaj libropimi quillcasha tiyacun.

27 Judá llajtamanta rey Azarías 52 huatacunata mandacujpimi Remaliaspaj churi Pécah runaca Israel llajtata Samariapi mandai callarirca. Paica 20 huatacunatami mandarca. 28 Paica Jehová Diospaj ñaupajpica mana allicunatami ruraj carca. Nebatpaj churi Jeroboán mana allicunata rurashpa israelitacunata juchapi urmachishca shinallatajmi paipish rurashpa catirca. 29 Israel llajtata mandaj Pécah mandacui punllacunapimi Asiriamanta rey Tiglat-Pileserca Ijón, Abel-Bet-Maacá, Janóah, Quedes, Hazor, Galaad, Galilea llajtacunata mishashpa japirca. Galileaca Neftalipaj tucui allpacunami carca. Chaipi causaj gentecunataca Asiria llajtamanmi prezu shina aparca. 30 Elapaj churi Hoseami Remaliaspaj churi Pecahpaj contra jatarishpa huañuchirca. Uziaspaj churi Jotán 20 huatacunata mandacujpimi Hoseaca catij rey tucurca. 31 Pecahpaj causaipish, pai tucui imalla rurashcapish Israel llajtamanta reycunapaj causaimanta parlaj libropimi quillcashca tiyacun.

32 Israel llajtamanta rey Remaliaspaj churi Pécah segundo huatata mandacujpimi rey Uziaspaj churi Jotanca Judá llajtata mandai callarirca. 33 Jotanca 25 huatacunata charishpami mandai callarirca. Paica 16 huatacunatami Jerusalenpi mandarca. Paipaj mamaca Sadocpaj ushushi Jerusá shuti huarmimi carca. 34 Jotanca paipaj yaya Uzías rurashca shinami Jehová Diospaj ñaupajpica allicunata ruraj carca. 35 Pero Jotanca adorana lugarcunataca mana anchuchircachu. Chaimantami gentecunaca chaicunapi sacrificiocunata ruranatapish, sacrificiota rupachishpa cushnichinatapish mana saquircacuna. Paimi Jehová Diospaj huasipi ashtahuan jahuaman caj punguta shayachirca. 36 Jotanpaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun. 37 Chai punllacunapica Jehová Diosca Siria llajtamanta rey Rezinta, Remaliaspaj churi Pecahtapishmi Judá llajtata llaquichichun cachai callarirca. 38 Qꞌuipaca Jotanca huañurcami.* Paitaca paipaj ñaupa yayacunahuanmi Davidpaj Llajtapi pambarcacuna. Davidca paipaj ñaupa yayami carca. Chai huashaca paipaj churi Acazmi catij rey tucurca.