2 Reyes
21 Manasesca 12 huatacunata charishpami mandai callarirca. Paica 55 huatacunatami Jerusalenpi mandarca. Paipaj mamaca Hefziba shutimi carca. 2 Manasesca Jehová Diospaj ñaupajpica mana allicunatami rurarca. Jehová Dios paipaj pueblo israelitacunapaj ñaupajmanta llujshichishpa cachashca llajtacuna shinallatajmi Manasesca millanana ruraicunata rurashpa causarca. 3 Paica paipaj yaya Ezequías urmachishca adorana lugarcunatami* cutin shayachirca. Baal diospaj altarcunata, adorana postetapishmi shayachirca. Israel llajtamanta rey Acab rurashca shinallatajmi rurarca. Shinallataj intipaj, lunapaj, estrellacunapaj* ñaupajpi cumurishpami chaicunata sirvij carca. 4 Jehová Diosca “Jerusalenpica ñuca shutitami churasha” nishcami carca. Chaita yachashpapish Manasesca Jehová Diospaj huasipimi yanga dioscunapaj altarcunata rurarca. 5 Jehová Diospaj huasi ishqui patiocunapica jahua pachapi tiyaj intipaj, lunapaj, estrellacunapajpishmi altarcunata shayachirca. 6 Manasesca paipaj propio churitapish ninapimi rupachirca. Shinallataj magiatami rurarca. Shamuj punllacunapi ima tucuna cashcata ricujcunatapishmi mashcarca. Huañushcacunahuan parlajcunata,* adivinocunatapishmi nombrarca. Chashnami paica Jehová Diospaj ñaupajpica achca mana allicunata rurashpa paita pꞌiñachirca.
7 Shinallataj Aserá huarmi diosta* rurashpami Diospaj huasiman yaicuchirca. Jehová Diosca Davidman, paipaj churi Salomonmanca cashnami nishca carca: “Cai huasipipish, Jerusalenpipish ñuca shutitami huiñai huiñaipaj churasha. Jerusalentaca tucui Israelpaj familiacunamantami agllashcani. 8 Ñucata sirvij Moisés paicuna pajtachichun cushca tucui Leyta, ñuca tucui mandashcata paicuna alli cazujpica paicunapaj ñaupa yayacunaman cushca allpamantaca israelitacunataca mana cutin llujshichishpa cachashachu” nircami. 9 Pero israelitacunaca mana cazurcacunachu. Manasesca paicunatami pandachishpa catirca. Chashnami paicunataca Jehová Dios israelitacunapaj ñaupajmanta llujshichishpa cachashca llajtacunata yalli millaita rurachishpa catirca.
10 Jehová Diosca paita sirvij profetacunahuanmi cashna nishpa catirca: 11 “Judá llajtamanta rey Manasesca tucui cai millanana ruraicunatami rurashca. Pai manaraj causajpi tiyashca amorreocunatapish yallimi millanana cosascunata rurashpa catishca. Shinallataj millanana rurashcalla dioscunahuanmi Judá llajtataca juchapi urmachishca. 12 Chaimantami israelitacunapaj Jehová Diosca cashna nin: ‘Jerusalenpi causajcunapajpish, Judá llajtapi causajcunapajpish llaquitami apamugrini. Maijanpish cai llaquimanta uyashpaca yallitaj mancharishcami saquiringa. 13 Samaria llajtata midishca huascallahuantajmi Jerusalén llajtatapish midisha. Acabpaj familiata plomadahuan midishca shinallatajmi midisha. Jerusalentaca tazonta pꞌichaj shinallatajmi pꞌichasha. Pꞌichashpaca urisingami churasha. 14 Allpapi saquirij ñuca pueblotami saquisha. Paicunataca contracunapaj maquipi urmachunpishmi saquisha. Paicunapaj tucui contracunami paicunataca prezu apangacuna. Tucui imalla charishcacunatapish contracunami shuhuangacuna. 15 Paicunaca ñuca ñaupajpimi mana allicunata rurarca. Paicunapaj ñaupa yayacunata Egipto llajtamanta llujshichishca punllamanta cunan punllacamami paicunaca chashna pꞌiñachinatapish manataj saquishcacuna. Chaimantami chashna tucuchunca saquisha’ ninmi” nircami.
16 Manasesca ima culpata mana charij gentecunapaj yahuarhuanmi Jerusalenpica shuj lado llajtamanta caishuj lado llajtacama jundachirca. Ashtahuanpish paica Judá llajtatami juchacunapi urmachirca. Judá llajtaca Jehová Diospaj ñaupajpica mana allicunatami rurarca. 17 Manasespaj causaipish, pai tucui imalla rurashcapish, pai rurashca juchacunapish Judá llajtamanta reycunapaj causaimanta parlaj libropimi quillcashca tiyacun. 18 Shinaca Manasesca huañurcami.* Chaimi paitaca paipaj huasi jardinpi pambarcacuna. Chai jardinca Uzá runapajmi carca. Chai qꞌuipaca paipaj churi Amonmi catij rey tucurca.
19 Amonca 22 huatacunata charishpami rey tucurca. Ishqui huatacunatami Jerusalenpi mandarca. Paipaj mamaca Jotbá llajtamanta Haruzpaj ushushi Mesulemetmi carca. 20 Amonca paipaj yaya Manasés rurashca shinallatajmi Jehová Diospaj ñaupajpica mana allicunata ruraj carca. 21 Amonca paipaj yayapaj ejemplotami catirca. Paipaj yaya sirvishca millanana rurashcalla dioscunallatatajmi sirvirca. Chai dioscunapaj ñaupajpipishmi cumurirca. 22 Paipaj ñaupa yayacunapaj Jehová Diostami saquirca. Shinallataj Jehová Diospaj ñanpipish mana purircachu. 23 Rey Amonta sirvijcunaca paipaj contra jatarishpami paipaj propio huasillapitaj paitaca huañuchircacuna. 24 Pero chai llajtapi causaj gentecunaca Amonpaj contra tucui jatarijcunatami huañuchircacuna. Chai huashaca Amonpaj churi Josiastami catij rey cachun churarcacuna. 25 Amonpaj causaipish, pai imalla rurashcapish Judá llajtamanta reycunapaj causaimanta parlaj libropimi quillcashca tiyacun. 26 Amontaca paipaj pambana jutcupi Uzapaj jardinpimi pambarcacuna. Chai qꞌuipaca paipaj churi Josiasmi catij rey tucurca.