1 Crónicas
14 Tiromanta rey Hiramca huillajcunatami Davidpajman cacharca. Shinallataj huasita* shayachichunpish cedro caspicunata, albañilcunata,* carpinterocunatami cacharca. 2 Chashnami Davidca Jehová Dios paiman pi mana cuyuchipaj mandanata Israel llajtapi cushcata intindirca. Diosca paipaj pueblo Israel llajtamantami Davidpaj mandanataca jatunyachishca carca.
3 Davidca Jerusalenpica paipaj huarmicuna cachunca ashtahuan huarmicunatami japirca. Shinallataj ashtahuan churicunapaj, ushushicunapaj yayami tucurca. 4 Jerusalenpi David charishca churicunapaj shuticunaca caicunami can: Samúa, Sobab, Natán, Salomón, 5 Ibhar, Elisúa, Elpélet, 6 Noga, Néfeg, Jafía, 7 Elisamá, Beeliadá, Elifeletpishmi carca.
8 Davidtaca tucui Israel llajtata mandaj cachun agllashcatami filisteocunaca yachaj chayarcacuna. Chaimi tucui filisteocuna paita mashcanaman huichiyarcacuna. Shinapish Davidca chaita yachaj chayashpami paicunahuan macanacungapaj llujshirca. 9 Filisteocunaca Refaím pugru pambaman chayashpami chaipi causajcunata llaquichi callarircacuna. 10 Shinapish Davidca Diostami: “¿Filisteocunahuan macanacungapaj huichiyashachu? ¿Paicunataca ñuca maquipichu churangui?” nishpa tapurca. Chashna nijpimi Jehová Diosca: “Ari, huichiyailla paicunataca cambaj maquipi churashatajmi” nishpa cutichirca. 11 Chaimi Davidca Baal-Perazimman huichiyashpa, filisteocunahuan macanacushpa paicunata misharca. Shinallataj Davidca: “Diosmi ñuca ñaupajta rishpa yacucuna tallirij shina, jatun pircata yacucuna tꞌuñij shina ñucapaj contracunata tucuchirca” nircami. Chaimantami chai lugartaca Baal-Perazim* nishpa shutichircacuna.
12 Chaipimi filisteocunaca paicunapaj rurashcalla dioscunata shitashpa rircacuna. Chaimi Davidca chai rurashcalla dioscunata rupachichun mandarca.
13 Qꞌuipamanca filisteocunaca cutinllatajmi pugru pambapi causajcunahuan macanacui callarirca. 14 Davidca Diosta cutinllataj tapujpimi Diosca cashna nishpa cutichirca: “Paicunahuan chꞌimbapura macanacungapajca ama huichiyangui. Ashtahuanpish paicunapaj muyundijta rishpa, bacá* nishca yuracuna huashapi miticungui. Chaimanta llujshishpa paicunahuanca macanacungui. 15 Soldadocuna marchacuj shina bacá nishca yuracunapaj umacunapi uyarijpimi paicunahuan macanacungapaj llujshina cangui. Chaipimi Diosca cambaj ñaupajta rishpa filisteo soldadocunataca huañuchinga” nircami. 16 Davidca Dios mandashca shinallatajmi rurarca. Chaimi israelitacunaca filisteo soldadocunata Gabaonmanta Guezercama catishpa huañuchircacuna. 17 David chashna rurashcacunaca tucui llajtacunapimi yachaj chayashca carca. Shinallataj Davidta tucui llajtacuna manchaita charichunca Jehová Diosmi ayudashca carca.