1 Crónicas
18 Asha tiempo qꞌuipaca Davidca macanacushpami filisteocunata misharca. Chashnami filisteocunapaj maquimanta Gat llajtata, chai cꞌuchulla pueblocunandij quichurca. 2 Shinallataj Moab llajtatami misharca. Chaimantami moabitacunaca Davidpaj sirvijcuna tucurca. Paicunaca tributocunatapishmi pagajcuna carca.
3 Davidca Zobá llajtata mandaj rey Hadadezertami Hamat llajta cꞌuchullapi macanacushpa misharca. Éufrates jatun yacu cꞌuchulla allpacunata Hadadézer japinaman ricujpimi Davidca chashna misharca. 4 Shinallataj Davidca Hadadezerpaj 1.000 carretacunata, 7.000 caballopi purijcunata, 20.000 chaquillahuan rij soldadocunatami japirca. Chai qꞌuipaca carretacunata aisaj caballocunatami cojota saquirca. Pero carretacunata aisaj 100 caballocunataca mana imata rurarcachu. 5 Damascomanta siriocuna Zobá llajtata mandaj rey Hadadezerta ayudanaman shamujpimi Davidca 22.000 siriocunata huañuchirca. 6 Davidca Siria llajtapi saquirij Damascopimi grupo soldadocunata churarca. Chashnami sirio runacunaca paita sirvijcuna tucurca. Paicunaca tributocunatapishmi pagajcuna carca. Jehová Diosca David maita rijpipish paitaca siempremi cuidaj* carca. 7 Davidca Hadadezerpaj sirvijcunataca oromanta rurashca redondo escudocunata quichushpami Jerusalenman aparca. 8 Shinallataj Hadadézer mandacushca Tibhat llajtamanta, Cun llajtamantami Davidca achca cobreta aparca. Chai cobre apashcahuanmi Salomonca cobre jatun tanqueta,* pilarcunata, cobremanta shujtaj cosascunatapish rurarca.
9 David Zobá llajtamanta rey Hadadezerpaj tucui soldadocunata mishashcata uyashpami, Hamatmanta rey Touca 10 paipaj churi Hadoramta rey David ima shina cashcata tapuchun, Hadadezerhuan macanacushpa mishashcamanta felicitanaman cacharca. (Hadadezerca achca cutinmi Tou shuti reyhuanca macanacushca carca). Hadoramca oromanta rurashca, cullquimanta rurashca, cobremanta rurashca tucui laya cosascunatami Davidpaj aparca. 11 Rey Davidca Edommanta, Moabmanta, ammonitacunamanta, filisteocunamanta, amalequitacunamanta apamushca cullquita, orota, chꞌicanyachij shinallatajmi chai apamushca cosascunataca Jehová Diospaj chꞌicanyachirca.
12 Zeruyapaj churi Abisaica 18.000 edomitacunatami Cachi pugru pambapi huañuchirca. 13 Abisaica Edom llajtapimi grupo soldadocunata churarca. Tucui Edom llajtapi causajcunami Davidpaj sirvijcuna tucurca. Jehová Diosca David maita rijpipish paitaca siempremi cuidaj carca. 14 Davidca tucui Israel llajtatami mandashpa catirca. Shinallataj tucui paipaj llajtapi causaj gentecunatami cashcata rurashpa juzgarca. 15 Zeruyapaj churi Joabmi soldadocunata mandaj carca. Cutin Ahiludpaj churi Jehosafatca reypaj registradormi carca. 16 Ahitubpaj churi Sadoc, Abiatarpaj churi Ahimelecca sacerdotecunami carca. Cutin Savsaca secretariomi carca. 17 Jehoiadapaj churi Benayaca keretitacunata, peletitacunata mandajmi carca. Davidpaj churicunaca reypaj cꞌuchupimi importante cargocunata charijcuna carca.