1 Crónicas

5 Rubenpaj churicunaca caicunami carca. Rubenca Israelpaj punta churimi carca. Paica punta churi cashpapish paipaj yayapaj caishuj huarmihuan huainayashcamantami* punta churi cana derechota chingachirca. Chashnami chai derechoca Josepaj churicunaman pasarca. Joseca Israelpaj churimi carca. Chaimantami Rubén punta churi shina canaca cada familiamanta registrashcacunapi mana quillcashca carca. 2 Judami paipaj tucui huauquicunapuramantaca alli nishca carca. Paipaj huahua huahuamantami pushajca shamurca. Chashna cajpipish punta churi japina derechotaca Josemi chasquirca. 3 Israelpaj punta churi Rubenpaj churicunaca Hanok, Palú, Hezrón, Carmí shuticunami carca. 4 Caicunami Joelpaj huahua huahuacunaca carca. Joelpaj churica Semayami carca. Semayapaj churica Gogmi carca. Gogpaj churica Simeimi carca. 5 Simeipaj churica Miqueasmi carca. Miqueaspaj churica Reayami carca. Reayapaj churica Baalmi carca. 6 Baalpaj churica Beerami carca. Paitami Asiriamanta rey Tilgat-Pilneserca prezu shina aparca. Beeraca rubenitacunata pushajmi carca. 7 Beerapaj huauquicunaca ñaupa yayacunamanta cada familia registrashcacunaca caicunami carca: Pushaj Jeiel, Zacarías, 8 Belapishmi carca. Belaca Azazpaj churimi carca. Azazca Semapaj churimi carca. Semaca Joelpaj churimi carca. Belapaj familiacunaca Aroer llajtamanta Nebo llajtacamami causarcacuna. Baal-Meón llajtapipishmi causarcacuna. 9 Paipaj huagracuna, ovejacunaca Galaad allpapica yallitajmi mirarirca. Chaimantami inti llujshin ladomanca Éufrates jatun yacu cꞌuchu chaquishca pamba callarincama causai callarircacuna. 10 Rey Saulpaj punllacunapica rubenitacunami hagritacunahuan macanacushpa paicunata misharcacuna. Chashnami rubenitacunaca hagritacunapaj carpa huasicunapi Galaad inti llujshin ladopi tiyaj tucui allpacunapi causai callarircacuna.

11 Gadpaj huahua huahuacunaca, Rubenpaj huahua huahuacunapaj cꞌuchupimi Basán allpacunapi Salecá llajtacama causarcacuna. 12 Basán llajtapica Joelmi pushaj carca. Safamca paipaj qꞌuipa pushajmi carca. Janaipish, Safatpish pushajcunami carca. 13 Paicunapaj huauquicunaca paicunapaj yayacunapaj familiacunamantami carca. Paicunaca Miguel, Mesulam, Seba, Jorái, Jacán, Zía, Eberpishmi carca. Tucuica canchismi carcacuna. 14 Abihailpaj churicunaca caicunami carca. Abihailca Huripaj churimi carca. Hurica Jaroahpaj churimi carca. Jaroahca Galaadpaj churimi carca. Galaadca Miguelpaj churimi carca. Miguelca Jesisaipaj churimi carca. Jesisaica Jahdopaj churimi carca. Jahdoca Buzpaj churimi carca. 15 Paicunapaj yayapaj familiata pushajca Ahimi carca. Ahica Abdielpaj churimi carca. Abdielca Gunipaj churimi carca. 16 Paicunaca Galaad llajtapi, Basán llajtapi, chai cꞌuchulla pueblocunapimi causarcacuna. Shinallataj Sarón michina allpacunapi, maicamami chai allpacuna tucurin chaicamami paicunaca causarcacuna. 17 Tucui paicunaca cada familiamanta registrashcacunapimi quillcashca carcacuna. Chaitaca Judá llajtata mandaj Jotanpaj punllacunapi, Israel llajtata mandaj rey Jeroboanpaj* punllacunapimi chashna rurarcacuna.

18 Rubenitacunapish, gaditacunapish, Manasespaj chaupi familiapish 44.760 sinchi macanacuj soldadocunatami charircacuna. Paicunaca escudocunata, espadacunatami charircacuna. Arcocunatapish shitanata alli yachajcunami carcacuna.* Macanacunatapish alli yachajcunami carcacuna. 19 Paicunaca hagritacunahuan, Jeturpaj huahua huahuacunahuan, Nafispaj huahua huahuacunahuan, Nodabpaj huahua huahuacunahuanmi macanacurcacuna. 20 Paicuna macanacucushpaca Diostami ayudachun mañarcacuna. Paipi confiashcamantami Diosca paita rogarishpa mañashcacunataca cutichirca. Chaimantami paicuna macanacucushpaca Diospaj ayudata chasquircacuna. Chaimi paica hagritacunatapish, tucui paicunahuan cajcunatapish paicunapaj maquipi entregarca. 21 Paicunapaj animalcunatapishmi aparcacuna. 50.000 camellocunata, 250.000 ovejacunata, 2.000 burrocunatapishmi aparcacuna. Shinallataj 100.000 gentecunatapishmi aparcacuna. 22 Dios paicunapaj randi macanacuipi macanacushcamantami achca huañushcacuna tiyarca. Shinallataj paicunaca chai gentecunapaj allpacunapimi prezu shina apana punllacunacama causashpa catircacuna.

23 Manasespaj huahua huahuamanta chaupi familiaca yallitajmi mirarishca carca. Paicunaca Basanmantaca Baal-Hermoncama, Senircama, Hermón urcucamami causarcacuna. 24 Paicunapaj familiacunata* pushajcunaca caicunami carca: Éfer, Isí, Eliel, Azriel, Jeremías, Hodavías, Jahdielpishmi carca. Paicunaca sinchi macanacujcuna, rijsishca cꞌaricuna, paicunapaj familiacunata pushajcunapishmi carcacuna. 25 Shinapish paicunaca paicunapaj ñaupa yayacunapaj Diostaca mana cazurcacunachu. Chai llajtacunapi tiyaj pueblocunapaj dioscunahuanpishmi huainayarcacuna.* Chai llajtapi causajcunataca Diosmi paicunapaj ñaupajpi tucuchishca carca. 26 Israelitacunapaj Diosca Asiriamanta rey Pultami (paica Tilgat-Pilnéser nishca reymi can) rubenitacunata, gaditacunata, Manasespaj chaupi familiata prezu shina apachun yuyaita curca. Shinallataj paicunataca Halá, Habor, Hará llajtacunaman, Gozán yacu cꞌuchuman apachunmi yuyaita cushca carca. Chaipimi cunan punllacunacama causashpa caticuncuna.