2 Crónicas
23 Séptimo huatapimi Jehoiadaca mana manchashpa 100 gentecunata pushajcunahuan ari ninacuita rurarca. Paicunaca Jerohampaj churi Azarías, Jehohananpaj churi Ismael, Obedpaj churi Azarías, Adayapaj churi Maaseya, Zicripaj churi Elisafatmi carcacuna. 2 Chai qꞌuipaca paicunaca tucui Judatami rircacuna. Chashnami Judá llajtapi tiyaj llajtacunamantaca levitacunatapish, Israelmanta yayacunapaj familiacunata pushajcunatapish tandachircacuna. Jerusalenman chayashpaca 3 tucui chaipi tandanacushcacunami Diospaj huasipi reyhuan ari ninacurcacuna. Chai qꞌuipaca Jehoiadaca cashnami nirca:
“¡Ricuichij! Reypaj churica Jehová Dios Davidpaj huahua huahuacunaman ari nishca shinami mandanga. 4 Cancunaca caitami rurana canguichij: sábado punllapi sirvij sacerdotecunata, levitacunataca quimsa grupopimi chaupina canguichij. Caimanta shuj grupoca pungutami cuidana canguichij. 5 Cutin quimsapi chaupishca caishuj parteca reypaj huasipimi* cana canguichij. Shinallataj quimsapi chaupishca shujtaj parteca Fundamento Pungu nishcapimi cana canguichij. Tucui tandanacushcacunapish Jehová Diospaj huasi patiocunapimi cangacuna. 6 Jehová Diospaj huasimanca ama pita yaicuchun saquinguichij. Diospaj huasipi sirvicuj sacerdotecunallata, levitacunallata yaicuchun saquinguichij. Paicunaca jucha illaj grupo ucupi cashcamantami chaimanca yaicui tucuncuna. Tucui gentecunapish Jehová Dios ama yaicuchun nishcatami pajtachina can. 7 Reypaj tucui ladocunataca levitacunami cada uno paicunapaj maquicunapi macanacunacunahuan muyundijta shayarina can. Maijanpish cai huasiman yaicujca huañunatajmi can. Rey maiman rijpipish* paihuanmi cana canguichij” nircami.
8 Levitacunapish, tucui Judapi cajcunapish sacerdote Jehoiadá mandashca shinallatajmi rurarcacuna. Cada grupota pushajcunami sábado punllapi sirvijcunatapish, mana sábado punllapi sirvijcunatapish tandachircacuna. Sacerdote Jehoiadaca cada grupopi cajcunataca paicunapaj puestocunata ama saquichunmi mandashca carca. 9 Sacerdote Jehoiadaca 100 soldadocunata pushajcunamanca Diospaj huasipi tiyacuj lanzacunata, uchilla escudocunata, redondo escudocunatami curca. Caicunaca rey Davidpajmi cashca carca. 10 Shinallataj Jehoiadaca tucui gentecunatami huasi alli ladomantaca huasi lluqui ladocama churarca. Paicunaca cada unomi paicunapaj maquipi lanzacunata charicurcacuna. Chashnami paicunaca altar cꞌuchupi, huasi cꞌuchupi reypaj muyundijpi carcacuna. 11 Chaipimi paicunaca reypaj churi Jehoasta llujshichishpaca coronatapish, Diospaj leyta quillcashcatapish paipaj uma jahuapi churarcacuna. Chashnami paitaca reyta rurarcacuna. Jehoiadapish, paipaj churicunapish paitami agllarcacuna. Chai huashaca: “¡Viva rey!” nircacunami.
12 Atalía huarmica gentecuna callpacujta, reyta alabacujtami uyarca. Chaita uyashpami chai rato Jehová Diospaj huasipi caj gentecunapajman rirca. 13 Chaimi Ataliaca huasi pungupi caj pilar cꞌuchupi rey shayacujta ricurca. Shinallataj mandajcunapish, trompetapi tocajcunapish reyhuanmi carcacuna. Tucui chai llajtamanta gentecunapish yallitaj cushicushpa trompetacunapimi tocacurcacuna. Tocana instrumentocunahuan cantajcunapish cushicushpa alabacujcunatami pushacurcacuna. Chai ratomi Ataliaca churanata lliquirishpa: “¡Contramari jatarishca! ¡Contramari jatarishca!” nishpa caparirca. 14 Shinapish sacerdote Jehoiadaca 100 soldadocunata pushajcunata llujshichishpaca: “¡Ataliataca soldadocunapuramanta llujshichichij. Paita pi catijtapish espadahuan huañuchinguichij!” nircami. Shinallataj sacerdote Jehoiadaca “Paitaca Jehová Diospaj huasipica ama huañuchinguichij” nishcami carca. 15 Chaipimi Ataliataca japircacuna. Chashnami reypaj huasipi tiyaj Caballocunapaj Pungu nishca yaicunman chayashpa chaipi paita huañuchircacuna.
16 Chai qꞌuipaca sacerdote Jehoiadaca paipish, tucui chaipi cajcunapish, reypish Jehová Diospaj pueblo shina catingapajmi shuj ari ninacuita rurarcacuna. 17 Chai qꞌuipaca tucui gentecunami Baal diospaj huasiman rircacuna. Chaipica chai huasitami urmachircacuna. Shinallataj chaipi tiyaj altarcunatapish, rurashcalla dioscunatapishmi ñutushpa tucuchircacuna. Chai altarcuna ñaupajpipishmi Baal diospaj sacerdote Matán runataca huañuchircacuna. 18 Sacerdote Jehoiadaca Jehová Diospaj huasipi imalla ruranacunata ricuchunca sacerdotecunata, levitacunatami churarca. Paicunataca Davidca Jehová Diospaj huasipi sirvichunmi grupocunapi churashca carca. Paicunaca Moisesman cushca leypi mandashca shinami Jehová Diosmanca rupachishca sacrificiocunata cujcuna carca. Davidca paicunataca cushicushpa cantocunata cantachunmi mandashca carca. 19 Shinallataj maijanpish imamanta mapa cashpaca chaiman ama yaicuchunmi Jehová Diospaj huasi pungucuna cꞌuchupica punguta cuidajcunata churarca. 20 Chai qꞌuipaca Jehoiadaca 100 soldadocunata pushajcunata, autoridadcunata, chai llajtapaj mandajcunata, tucui chai llajtapi causaj gentecunatami tandachirca. Shinallataj paica reyta cuidashpami paihuan Jehová Diospaj huasimanta uriyarca. Chai huashaca ashtahuan jahuaman caj punguta pasashpami reypaj huasiman rircacuna. Chaipimi reytaca mandanapi tiyachircacuna. 21 Tucui chai llajtapi causaj gentecunaca yallitajmi cushicurcacuna. Atalía huarmita espadahuan huañuchishcamantami chai llajtapica tranquilo causai tiyarca.