2 Crónicas
4 Salomonca cobre altartami* rurarca. Chai cobre altarca largomanca casi iscun metrocunatami* midirca. Shinallataj anchomanca casi iscun metrocunatami midirca, altomanca chuscu metrocuna yallitami* midirca.
2 Paica cobreta yacuyachishpami shuj jatun tanqueta* rurarca. Chai tanqueca redondomi carca. Shuj filomanta caishuj filocamaca chuscu metrocuna yallitami midirca, altomanca ishqui metrocuna yallitami* midirca. Tanque muyundijta midingapajpish 13 metrocunata* charij huascami minishtirirca. 3 Jatun tanque shimi uripica muyundijtami calabazacunahuan adornashca carca. Tucui muyundijtami cada 44 centimetrocuna yallipi* chunga calabazacuna tiyarca. Chai calabazacunaca ishqui filapimi carca. Chai tanquellahuantaj shujllata rurashcami carca. 4 Jatun tanqueca cobremanta rurashca 12 torocuna jahuapimi carca. Quimsa torocunaca janaj ladotami ricucurcacuna. Quimsa torocunaca inti huashicun ladotami ricucurcacuna. Quimsa torocunaca ura ladotami ricucurcacuna. Cutin quimsa torocunaca inti llujshin ladotami ricucurcacuna. Jatun tanqueca torocunapaj jahuapimi carca. Torocunapaj huashaca tanque ucu ladomanmi carca. 5 Jatun tanqueca canchis* centimetrocuna yalli* racumi carca. Filoca copa filo shina, lirio sisa shinami carca. Chai tanqueca 66.000 litrocuna* yacutami apaj carca.
6 Ashtahuanpish chunga tanquecunatami rurarca. Pichcataca alli ladoman, cutin pichcataca lluqui ladomanmi churarca. Chai tanquecunapica rupachishca ofrendacunata cungapaj utilizashca cosascunatami maillajcuna carca. Sacerdotecunaca cobremanta rurashca jatun tanquepimi paicunapaj maquicunata, chaquicunata maillajcuna carca.
7 Shinallataj chunga oro candelerocunatami rurarca. Chai candelerocunataca ima shina rurachun nishca shinallatajmi rurarca. Chaitaca Diospaj huasipimi pichcataca* alli ladoman, pichcataca lluqui ladoman churarca.
8 Chunga mesacunatapishmi rurarca. Chaitaca Diospaj huasipimi churarca. Pichcataca alli ladoman, pichcataca lluqui ladomanmi churarca. Shinallataj 100 oro tazoncunatami rurarca.
9 Qꞌuipaca sacerdotecuna trabajana patiota, jatun patiota, jatun patiopaj pungucunatapishmi rurarca. Chai pungucunataca cobrehuanmi jahuata churarca. 10 Jatun tanquetaca alli ladoman, inti llujshin ladomanmi churarca.
11 Ashtahuanpish Hiramca baldecunata, palacunata, tazoncunatami rurarca.
Chashnami Hiramca rey Salomón mingashca shina Diospaj huasipica trabajocunata tucuchirca. 12 Paica ishqui pilarcunatami rurarca. Shinallataj pilarcuna jahuapi tazón shina ishqui capitelcunatami rurarca. Pilarcuna jahuapi tazón shina ishqui capitelcunata pilluchingapaj ishqui mallacunatapishmi rurarca. 13 Shinallataj ishqui mallacunapajca 400 granadacunatami rurarca. Cada mallapimi ishqui fila granadacunata churarca. Chai mallacunaca pilarcuna jahuapi caj tazón shina ishqui capitelcunata pilluchingapajmi carca. 14 Shinallataj chunga uchilla carretacunatami* rurarca. Chai uchilla carretacuna jahuapi churangapajpish chunga tanquecunatami rurarca. 15 Jatun tanquetapishmi rurarca. Chai tanqueca 12 torocuna jahuapimi carca. 16 Hiram-Abivca rey Salomón mingashca shinami Jehová Diospaj huasipajca baldecunata, palacunata, jatun trinchecunata, tucui laya shujtaj cosascunatapish achijnicuj cobremanta rurarca. 17 Rey Salomonca Jordán jatun yacu cꞌuchullapi caj pugru pambapimi chai cosascunata rurachun mandarca. Chai arcilla pugru pambaca Sucot, Zeredá llajtacuna chaupipimi carca. 18 Salomonca tucui cai cosascunamantaca yallitaj achcatami rurarca. Cobre mashna pesashcaca mana yacharircachu.
19 Salomonca Diospaj huasipajca tucui laya cosascunatami rurarca: oro altarta, Diosman cushca tandata churangapaj mesacunatapishmi rurarca. 20 Shinallataj candelerocunata, lamparacunatapish oro purohuanmi rurarca. Chai lamparacunataca mandashca shinami ashtahuan ucujman caj cuarto ñaupajpi japichishca cachun churarca. 21 Sisacunata, lamparacunata, pinzacunatapish orohuanmi rurarca. Ashtahuan oro purohuanmi rurarca. 22 Ninata huañuchinacunata, tazoncunata, copacunata, braserillocunatapish oro purohuanmi rurarca. Diospajlla ashtahuan chꞌicanyachishca ucupaj pungucunatapish, Diospaj huasi pungucunatapish orohuanmi rurarca.